Read Talaud 1 TAWARIKH 17 Bible Online

1 TAWARIKH 17 - Talaud bible

1 TAWARIKH 17

¹Napawe i Ratu Daud namanuate su wal᷊en araratuanne, su allo sambau i tou namago si Nabi Natan wuṛṛu nabbisara, “Pa'ellege, i ya'u indi uatana'a su wal᷊en araratuanna apan niola'a ringannu alu cemara wuassu Libanon, arawe Wantallu Pa'airen MAWU tumba'u sulal᷊ummu rasanna!”

²I Natan sinumimbakka, “Pa'ola'e al᷊awo'u apulun Tuangnga ana waugu MAWU mantul᷊ungngi Tuangnga.”

³Arawe su ṛabbi udde lai Ruata nabbisara si Natan,

⁴“Inaite wuṛṛu wal᷊oa'a su allang-Ku i Daud tanata-U indi, ‘Wal᷊ine i'o apan sarun mapararisikku wal᷊e-U.

⁵Ro'en walahannu Israel niapasabbangnga wuassu Mesir naddatingngu orassa indi, taambe saran paassa i Ya'u natana'a sulal᷊ummu sambau wal᷊en.

⁶Su al᷊annune i ya'u mammal᷊intadda suadio'a ringannu walahannu Israel taambe saran paassa i Ya'u naiwal᷊o su manga piaṛṛa'a apan buatte Ta'u nipile, anio i mangitou tawe mapararisikku sambau wal᷊en si Ya'u wuassu alu cemara Libanon.’

⁷Ana waugu udde, i Natan, pasingkata'e su allang-Ku Daud manungku i Ya'u, MAWU Apan Lembontaṛṛino, nabbisara si tou, ‘I'o buatte Ta'u nial᷊appa wuassu manaranu mallu'adda domba su wadda'a, wuṛṛu Ta'u nitenega naola'a ratu su Walahang-Ku Israel.

⁸I'o buatte Ta'u nitul᷊ungnga su anambon tampa apan amatannu, wuṛṛu anambon seennu Ta'u nipate sutempo i'o mapapangalo. I'o sarun Ta'u olaanna tumelengnga ere manga piaṛṛa'a apan ahewal᷊anne su runia.

⁹Su pabbawala-U Israel i Ya'u buatte nanaddia tampa maola'a pamamanuanni mangitou tadea'u i mangitou wotongnge mabbiakka matammudda taweddu manal᷊awa'a. Ro'en darantan mangitou watukku leta'a indi dorone, wuṛṛu ro'en i mangitou taambe datu, i mangitou nipangaloannu manga taumata apan mal᷊utu mapapangalo. Arawe olangnge udde tawe nariaddi apia. I Ya'u ma'ire sarun mamaddon anambon seennu, wuṛṛu i Ya'u sarun mangonggolu pallal᷊awanna si yamiu.

¹¹Sutempo addantane napawe nia'omate papatenu wuṛṛu i'o ilabbinga su labbingu al᷊amonanu,sangkatou suwallatu parinsinu sarun Ta'u itenega maola'a ratu. Ete i tou apan sarun mapararisikku Wal᷊e-U. Araratuanne sarun Ta'u tohassanna, wuṛṛu saran mal᷊annu-l᷊annu sangkatou wuassu papapulunne sarun mamarenta maola'a sangkatou ratu.

¹³I Ya'u sarun maola'a iamangnge wuṛṛu i tou sarun maola'a ana-U esakka. I Ya'u sidutu marangngu si tou ere lai buatte nipa'ire-U. Paaire-U si tou sidutu aagasang-Ku, uapapaṛala ere Ta'u niola'a si Saul apan buatte Ta'u niingkatta wuassu aiananne tadea'u i'o wotongnge maola'a ratu.

¹⁴Parinsinu apan Ta'u nipile udde sarun Ta'u itenega ratun Walahang-Ku wuṛṛu araratuang-Ku sarang mal᷊annu-l᷊annu, wuṛṛu papapulunne sarun mamarenta maola'a ratu.’ ”

¹⁵I Natan namasingkatta si Daud al᷊awo'a apan buatte niapal᷊iatta'u MAWU si tou.

¹⁶Ana see i Ratu Daud sinumuttate sulal᷊ummu Rasannu MAWU. I tou inuma'ianna wuṛṛu inumal᷊iomanna, “Oh MAWU Ruata, i ya'u wuṛṛu amonangku tawe sutampane manengkamma apapia apan niapal᷊iatta'u MAWU al᷊annune indi.

¹⁷Ewe'e inolaan-Nu nilumambalanna wua isudde; I'o buatte na'ola'a pa'aire su ola'u papapulungku sutempo addantane. Ewe'e i'o lai na'ola'a si ya'u sangkatou apan a'addatanna.

¹⁸Apate lai apan ta'u iwisara Si'o, oh MAWU Ruata? I'o masingkattu sarangkanambone su allang-Ngu indi, arawe I'o nangonggolu a'addatta si ya'u.

¹⁹Wuassu apulu-Nu sassane wuṛṛu hunane su manara'u I'o na'ola'a anambon manara wahewalla indi ringannu matualaga.

²⁰Tumba'u I'o Ruata, taweddu nassul᷊ung-Ngu. Yami masingkattu olangnge udde ana waugu buatte niapasingkatta ro'en dorone.

²¹Su ahewallu runia tawe walahanna ere Israel. Tumba'u Israel sambau walahanna apan Ta'u nipallossa pattataṛṛualanganna tadea'u maola'a al᷊aṛṛana-U sassane. Al᷊awo'u inolaanna apan wahewalla wuṛṛu maatiangnga niolang-Ngu si mangitou naola'a aran-Nu tinumelengnga su ahewallu runia. I'o namallossu al᷊aṛṛanang-Ngu wuassu Mesir, wuṛṛu nallimbuakka manga walahanna waine sutempo al᷊aṛṛanang-Ngu inai mapapangalo.

²²Walahannu Israel buatte niolang-Ngu al᷊aṛṛanang-Ngu sassane sarangkal᷊o'engnge. Wuṛṛu I'o, oh MAWU, naola'a Ruata mangitou.

²³Orassa indi, oh MAWU Ruata, antimanna manohassa saran mal᷊annu-l᷊annu pa'aire apan niwisara-Nu si ya'u wuṛṛu su ola'u papapulungku. Antimanna mappaamattu sarangkanambone apan buatte nipa'ire-Nu udde.

²⁴Su al᷊awo'u tampa taumata sidutu mammantuga aran-Nu wuṛṛu mabbisara, “MAWU Apan Lembontaṛṛino eteudde Ruatan Israel.” Saran mal᷊annu-l᷊annu sangkatou suwallattu papapulungku sarun mamarenta maola'a ratu.

²⁵I ya'u mattumbaṛṛani batangangku manduittu aal᷊iomanna indi Si'o, oh Ruata, ana waugu I'o sassane buatte namasingkatta si ya'u manungku ana'a wuṛṛu papapulungku sarun itene-Gu maola'a ratun walahanna indi.

²⁶I'o, MAWU, uddewe Ruata, wuṛṛu watti'a apan maṛṛamaga udde buatte nipa'ire-Nu si ya'u.

²⁷Ana waugu udde, i ya'u sumal᷊ande, doronganna mangal᷊amatta papapulungku tadea'u saran mal᷊annu-l᷊annu i mangitou sidutu uapendamma darangngu-Nu. Ana waugu, I'o buatte nangal᷊amatta al᷊aṛṛanang-Ngu, oh MAWU, ne i mangitou sidutu sarun al᷊amatanna saran mal᷊annu-l᷊annu.”