Read Talaud 1 TAWARIKH 18 Bible Online

1 TAWARIKH 18 - Talaud bible

1 TAWARIKH 18

¹Manga pira tempo wua'udde i Ratu Daud namangalote wuṛṛu namaddon taumatan Filistin see nangaṛṛote soan Gad suadio'a ringannu manga ampungnga maranine.

²I Daud namaddon taumatan Moab lai na'oman sara i mangitou uasuṛṛubawate wuṛṛu mammaekke wose si tou.

³Wua'udde i Daud namaddon Hadadezer, ratu su Zoba maranin leta'u Hamat su wanuan Siria. Sutempo udde i Hadadezer tantal᷊anna sulal᷊ummu amatanna inai mamangalo leta'a maranin ul᷊une su Sal᷊ukku Efrat.

⁴I Daud napaangaṛṛo 1.000 keretan pangalo, wuṛṛu nanawanna 7.000 su atoune tantaran awal᷊o see lai 20.000 tantara u'amattu ledda. I tou napaal᷊omen anambon awal᷊o, nallambe sambageanganna tumba'u 100 keretan pangalo.

⁵Taumatan Siria wuassu Damsyik nandolokku tantara niapaontolla si Ratu Hadadezer, arawe i Daud namaddon mangitou wuṛṛu namate 22.000 su atoune.

⁶Wua'udde i tou napararisikku manga paddasanannu tantaran mangitou ne i mangitou nassuṛṛubawate lapiddu mammaekka wose si tou. MAWU nangonggolu auntunganna si Daud su al᷊awo'u tampa pangaloanne.

⁷Manga allungnga wul᷊awanna apan nipaattu tantaran Hadadezer niaṛṛon Daud wuṛṛu niapidda watukku Yerusalem.

⁸Waine wua'udde lai i Daud nanganu tumaniten manambo witu'a wuassu Tibhat wuṛṛu Kun, manga soa apan dorone paparentanni Hadadezer. (Su allo murine manga witu'a udde nipaatti Salomo pinallanginnu wensadda, wuṛṛu manga diṛṛi see lai saranapa apan ipattaṛṛamawu su Wal᷊en MAWU.)

⁹I Ratu Tou wuassu Hamat naaringikka manungku i Daud buatte namaddon anambon tantaran Hadadezer.

¹⁰Ne i tou nandolokki Yoram parinsine niapawal᷊on tabea si Ratu Daud wuṛṛu iapawal᷊o lai sal᷊amatta su auntunganna udde, ana waugu i Hadadezer masokkate mapapangalon Ratu Tou. I Yoram nirumantate ringanni Daud uaapiddu manambo aonggola wul᷊awanna, sal᷊a'a wuṛṛu witu'a.

¹¹I Ratu Daud nangonggolu anambon aonggola udde su MAWU apan ipa'atta sulal᷊ummu lal᷊aghu patataṛṛamawu. Aroddi lai su manga saranapa wul᷊awanna wuṛṛu sal᷊a'a apan buatte niaṛṛon Daud si Hadadezer wuṛṛu manga walahanna apan buatte niwaddone, eteudde walahannu Edom, Moab, Amon, Filistin wuṛṛu Amalek.

¹²I Abisai (inangngene aranne i Zeruya) namaddon seetta wuṛṛu namate 18.000 su atoune taumatan Edom su wawal᷊annu Asin

¹³ana see napararisikku manga paddasanannu tantara su ahewallu Edom. Ne manga taumatan Edom nassuṛṛubawate si Ratu Daud. MAWU nangonggolu auntunganna si Daud suapan tampa i tou mapapangalo.

¹⁴Etearoddi i Daud namarenta ahewallu Israel wuṛṛu uariaga tadea'u suapan tumanangnge sidutu olaanna ringannu matul᷊idda wuṛṛu mapia.

¹⁵Eteindi manga mammamanaran araratuanni Daud apan atanggaṛṛanne wuṛṛu buatte nitenegi Daud: Tembonannu tantara: i Yoab iaangngi Abisai. Mamamoṛṛettu wal᷊en araratuanna: i Yosafat ana'i Ahilud. Manga Imam: i Zadok ana'i Ahitub wuṛṛu i Ahimelekh ana'i Abyatar. Mamamoṛṛettu araratuanna; i Sausa Tembonannu mandariaga ratu; i Benaya ana'i Yoyada. Manga uaagassa lai manara mahuna su araratuanna.