Read Talaud 1 TAWARIKH 19 Bible Online

1 TAWARIKH 19 - Talaud bible

1 TAWARIKH 19

¹Manga pira tempo wua'udde, i Nahas ratun Amon nate, wuṛṛu i Hanun parisine naola'a ratu.

²Ana see i Ratu Daud nabbisarate, “Nahas udde hawe'u apan satia, nariaddi ya'u ṛinone aroddi lai si Hanum anangnge.” Ana waugu udde i Daud nandolokku daroloṛanna inai watukku wanuan Amon iapal᷊uassa si tou ana waugu papaten iamangnge. Napawe i mangitou na'omate su Amon,

³manga piaṛṛa'u wanua udde nabbisara si ratu Hanum, “Ariewe i Tuangnga maṛṛingidda i Daud nandolokku daroloṛanne udde ana waugu i tou mangaddatta iamangngi Tuangnga! I tou nandolokku manga taumata udde inawarendi maola'a matataṛṛaso'o wuṛṛu iapaparikissa wanuan kite, tadea'u wotongnge aṛṛoanna!”

⁴I Ratu Hanun nanametta manga daroloṛanni Daud udde, nangiṛṛi omengngi mangitou, namonggo'a laubba aaunne sara tapanna'a, wuṛṛu nandolokki mangitou niapapul᷊e.

⁵Arawe i mangitou massili mapul᷊e, nariaddi i mangitou inaite watukku Yerikho. Napawe hatto udde niapasingkatta si Daud, i tou nananata tadea'u manga daroloṛanna udde atana'e su Yerikho ma'oman sara omengngi mangitou tumuwote apia.

⁶Ana see i Ratu Hanun wuṛṛu taumatan Amon naatutukka manungku inolaanni mangitou naasa'u si Daud. Ana waugu udde i mangitou nangonggolu 34.000 su kilone sal᷊a'a watukku leta'u Mesopotamia Rosone, see lai watukku Maakha wuṛṛu Zoba su Siria ipanewa 32.000 keretan pangalo wuṛṛu tantara uasa'e awal᷊o. Ne tantaran ratu Maakha ringannu anambon keretan pangalo nisewanna udde wuṛṛu naddasanna maranin Medeba. Taumatan Amon nirumanta lai wuassu anambon soan mangitou ana waugu inai mapapangalo.

⁸Napawe i Daud naaringikka olangnge udde i tou nandolokki Yoab wuṛṛu anambon tantarane inai mando'appa seetta.

⁹Taumatan Amon sinumabbanga wuṛṛu nangatokku barisanni mangitou su saruannu ngara pasallangannu Raba, inangngu soan mangitou, arawe manga ratu apan buatte nirumanta massumbala si mangitou, nangatokku barisanne su wadda'a.

¹⁰I Yoab naasilo manungku i tou tatangngannu tantaran seetta su saruanne wuṛṛu su liudde. Ana waugu udde i tou namile tantaran Israel apan apianne wuṛṛu i mangitou niaddo uasasaruannu tantaran Siria.

¹¹Lebbene wuassu tantaran Israel tinantilla si Abisai tuarine, apan nangatokku barisanni mangitou uasasaruannu tantaran Amon.

¹²Yoab nabbisara su tuarine udde, “Napawe i ya'u tate maaro'appa tantaran Siria, paasaṛṛawutta rumanta mangontolla si ya'u. Arawe amungkangu i'o tate maaro'appa tantaran Amon, i ya'u sarun rumanta mangontolla si'o.

¹³Paatammudda! Wette i ite inaite mapapangalo ringannu waṛṛani hunan walahanni ite wuṛṛu manga soan Ruatan kite. Antimanna MAWU mammanara su ereapa ipaapulu-Ne.”

¹⁴I Yoab wuṛṛu tantarane inaite namangalo, na'oman sara tantaran Siria tinumal᷊angnga.

¹⁵Napawe taumatan Amon naasilo tantaran Siria tinumal᷊angngu watanganne, i mangitou lai tinumal᷊angngi Abisai wuṛṛu sinumoṛṛotta sulal᷊ummu soa. Napawe buatte namangalo taumatan Amon, i Yoab napul᷊ete watukku Yerusalem.

¹⁶Taumatan Siria naatutukka manungku i mangitou niawaddoten taumatan Israel. Ne i mangitou namagote tantarane wuassu leta'u samba'a ra'in Sal᷊ukku Efrat wuṛṛu nandolokku tantarane udde mapapangalo su piaṛṛa'i Sobakh tembonannu tantaran Hadadezer ratun Zoba.

¹⁷Naaringikka hatto udde, i Daud nangammullu anambon tantaran Israel, ana see niluwessa Sal᷊ukku Yordan wuṛṛu nangatokku barisanne nasasaruannu tantaran Siria. Ne i mangitou napapangalote

¹⁸wuṛṛu tantaran Siria nienggenannu tantaran Israel. I Daud wuṛṛu tantarane namate 7.000 su atoune mangangapiddu keretan pangalo wuṛṛu 40.000 su atoune tantara u'amattu ledda. I Sobakh tembonannu tantaran Siria udde nipate lai.

¹⁹Napawe manga ratu apan paparentanni Hadadezer naasilo manungku i mangitou niawaddote tantaran Israel, i mangitou naddorongke paddarame wuassi Daud, wuṛṛu nassuṛṛubawate si tou. Wua'udde taumatan Siria maddirite lai massumbala taumatan Amon.