Read Talaud 1 TAWARIKH 21 Bible Online

1 TAWARIKH 21 - Talaud bible

1 TAWARIKH 21

¹Setanna maapulu manilaka taumatan Israel; ana waugu udde i tou nassal᷊o'i Daud tadea'u ma'ola'a pandareengnga.

²Ne i Daud nabbisarate si Yoab wuṛṛu manga piaṛṛa'u tantarane, “Pa'ola'e pandareengnga su ahewallu Israel ma'oman sara pentakku wanua, ana waugu i ya'u maapulu maasingkatta sangkura anambone taumatan Israel.”

³I Yoab sinumimbakka, “Antimanna MAWU mapaanambon tumana'u Israel ma'oman sara paaṛasutta anambone wuassu reenganni mangitou orassa indi. Apan Awantuhanne, wal᷊inewe natualage manungku i mangitou uasuṛṛubawa lai si Tuangnga? Anio ma'ola'a lai pandareengnga? Sal᷊immurine, ana waugu pasasal᷊a udde anambon walahanna pandansilananne!”

⁴Arawe ratu sidutu uaagassa parentane udde, nariaddi i Yoab inaite watukku ahewallu Israel, na'oman sara pappi'uanne, wua'udde nabelengke apia su Yerusalem,

⁵wuṛṛu namasingkatta si Ratu Daud manaran pandareengnga udde. Anambon esakka apan botongnge maola'a tantara 1.100.000 su atoune su Israel, wuṛṛu 470.000 su atoune su Yehuda.

⁶Arawe ṛuanganni Lewi wuṛṛu ṛuanganni Benyamin tawe nawal᷊i su reenganna udde. I Yoab tawe nandeengngi mangitou ana waugu i tou maddiri mappaamattu parentan ratu udde.

⁷Ruata tawe mal᷊uassa su pandareengnga udde, ne i Tou nakkuumannu taumatan Israel.

⁸Ana see i Daud inumal᷊iomante su Ruata wisarane, “Oh Ruata, i ya'u tumaniten marosa! Ampungewe i ya'u, ana waugu inolaangku udde tumaniten longonna.”

⁹MAWU nabbisara si Nabi Gad, apan naola'a mabbawal᷊one suwallatti Daud wuṛṛu MAWU,

¹⁰“Roote wal᷊oa'a si Daud manungku i Ya'u mangonggolu tatallu inolaanna apan iapapile. Suapan nipilene udde sarun Ta'u olaanna.”

¹¹Ana see i Gad inaite ringanni Daud wuṛṛu namasingkattu tanatan MAWU udde, wisarane, “Suapane apan sarun pileanni Tuangnga:

¹²Wanua indi aṛṛiaannu elessa al᷊annune tallu tonna, ara'e i Tuangnga tumal᷊angnga a'enggenannu seetta al᷊annune tallu wul᷊anna, ara'e ahewallu wanua indi tallu allo pangaloannu MAWU ringannu hal᷊ele-Ne ere saiddalu, wuṛṛu mala'ekan-Ne mangapiddu papate su al᷊awo'u tampa. Ṛawesa'e orassa indi apa apan ta'u iapasingkatta su MAWU.”

¹³I Daud sinumimbakka, “Uare, nasilakate i ya'u! Arawe wuassu i ya'u iṛṛuumannu taumata, mappianne i ya'u iṛṛuumannu MAWU ana waugu tumaniten nangillembo aakkanna wuṛṛu darangngu-Ne.”

¹⁴Ne MAWU nandantan saidalu su taumatan Israel na'oman sara 70.000 su atoune nate.

¹⁵Ana see MAWU nandolokku sangkatou mala'ekatta niapaṛṛimunsa'a Yerusalem. Arawe sutempo mala'ekatta udde na'omate maranin paṛṛindanna ganduma pussa'an Arauna taumatan Yebus, MAWU namal᷊u parenta-Ne makkuumannu walahanna udde. I Tou nabbisara mala'ekatta udde, “Wotongngete, Taal᷊a'e!”

¹⁶I Daud naasilo mala'ekatta udde tuttalla'a suwallatu langitta wuṛṛu runia. Ringannu uaagassa hal᷊ele, mala'ekatta udde nasaddiate makkimunsa'a Yerusalem. Ne i Daud wuṛṛu manga matatimmadu tumanangnge, apan sutempo udde tantal᷊anna ual᷊uṛṛen laubba karongnga maola'a tatiala sussassila, niumal᷊intudda su leta'a.

¹⁷Daud inumal᷊iomanna, wisarane, “Oh MAWU, ete i ya'u apan nassal᷊a. Ete i ya'u apan nandolokka napaola'a pandareengnga udde. Walahanna indi mangke atonna tawe sal᷊ane! Oh MAWU, Ruata'u, ṛuumana'e i ya'u wuṛṛu amonangku, arawe liua'a asasilaka indi wuassu al᷊aṛṛanang-Ngu.”

¹⁸Ana see mala'ekattu MAWU nandolokki Gad niapawal᷊o si Daud manungku i tou ṛinone suma'a watukku tampa paṛṛindanna ganduma pussa'an Arauna wuṛṛu mapararisikku mezbah su MAWU isudde.

¹⁹Ne i Daud inaite uasul᷊ungngu parentan MAWU apan niapasingkatti Gad si tou.

²⁰Sutampa paṛṛindanna ganduma udde, i Arauna wuṛṛu siri appatta anangnge esakka tantal᷊anna maṛṛinda ganduma. Naasilo mala'ekatta, siri appatta ana'i Arauna udde tinumal᷊angnga na'imbuni.

²¹Napawe i Arauna naasilo si Ratu Daud nirumanta, i tou naisasomban Daud wuṛṛu niumal᷊intudda su saruanne.

²²I Daud nabbisara si tou, “I ya'u maapulu mapararisikku mezbah MAWU sutampa indi, tadea'u sa'itta indi matta'alle. Ana waugu udde wal᷊ua'e leta'a indi si ya'u. Wal᷊oa'e sangkura aregane, indete ta'u waeṛṛanna.”

²³“Ah, anute aroddi, Tuangnga,” sasimbakki Arauna, “wuṛṛu pa'ola'e sarangkanambone apan tumuṛṛutti Tuangnga udde mapia. Indi manga sapi wuṛṛu sasamba itattambunna, wuṛṛu alu ipanutungnga i Tuangnga wotongnge mappaattu manga pappallu pallaṛṛindanna ganduma indi. Panganute ganduma olaanna sasamba. I ya'u mangonggolu sarangkanambone udde, i Tuangnga lasa'e pamaekka.”

²⁴Arawe ratu sinumimbakka, “Arie i ya'u maapulu mamalli ringannu arega suṛṛinone. I ya'u maddiri mangonggola su MAWU saranapa tatahuannanu ara'e apan niasombangangku ringannu tawe sahadde.”

²⁵Ne i Daud namaekke si Arauna 600 roitta wul᷊awanna nipamalli leta'a udde.

²⁶Ana see i Daud napararisikku sambau mezbah MAWU isudde, wuṛṛu nangonggolu sasamba itattambunna see lai sasamban paddarame. Wua'udde i tou inumal᷊iomanna ne MAWU sinumimbakka aal᷊iomanne udde ringannu nanossokku putungnga wuassu langitta apan nanutungnga manga sasamba apan uarandanga su mezbah udde.

²⁷Ana see MAWU nandolokku mala'ekatta udde niapataṛṛo hal᷊elene su ṛomane, ne mala'ekatta udde naddaringikke parentan MAWU.

²⁸Sutempo i Daud naasilo manungku MAWU sinumimbakka aal᷊iomanna ana waugu sasambane udde, ne i tou nangonggolu lai sasamba su mezbah udde.

²⁹Sutempo udde Rasannu MAWU apan niola'i Musa su wadda'a, wuṛṛu mezbah panambunannu sasamba ta'e udde sutampa patataṛamawuanna su Gibeon.

³⁰Arawe i Daud tawe waṛṛani inai poaroddi maggahatton Ruata, ana waugu i tou matta'uttu hel᷊elen mala'ekattu MAWU udde.