Read Talaud 1 TAWARIKH 23 Bible Online

1 TAWARIKH 23 - Talaud bible

1 TAWARIKH 23

¹Sutempo i Daud timmadete atonna, i tou nanenegi Salomo naola'a ratun Israel.

²I Ratu Daud nangammullu anambon piaṛṛa'u Israel, manga imam wuṛṛu taumatan Lewi,

³ana see nandeengngu anambon taumata esakka ṛuanganni Lewi apan uukke tallu pul᷊o su tonanne iree. Sarangkanambone 38.000 su atoune.

⁴Ana see 24.000 su atoune suwallati mangitou niapamanara mallu'adda Wal᷊en MAWU, 6.000 su atoune manarane mangngatokku pamamoṛṛetta wuṛṛu manga hatto pallaruungnga,

⁵4.000 su atoune manarane mandiaga, wuṛṛu 4.000 sua atoune lai manarane maddalo MAWU ringannu mannengkella musikka apan buatte nisaddia.

⁶I Daud nattahia manga taumatan Lewi sulal᷊ummu tallun kawageanganna tumuṛṛuttu amonanni mangitou, eteudde amonanni Gerson, i Kehat wuṛṛu i Merari.

⁷I Gerson pia darua ana'a esakka; i Ladan wuṛṛu i Simei.

⁸I Ladan pia siri tallu ana'a esakka; i Yehiel, i Zetam wuṛṛu i Yoel.

⁹I mangitou udde tembonannu amonannu papapulunni Ladan. (I Selomit, i Haziel wuṛṛu i Haran uddewe esakka al᷊aṛṛana'i Simei.)

¹⁰Siri appatta esakka ana'i Simei tumuṛṛuttu uukki mangitou eteudde: i Yahat, i Ziza, i Yeus wuṛṛu i Beria. Papapulunni Yeus wuṛṛu i Beria tawe manambo, nariaddi itarua nireengnga ere lai ṛuanganna sambau.

¹²I Kehat anangnge esakka siri appatta: i Amram, i Yizhar, i Hebron wuṛṛu i Uziel.

¹³I Amram eteudde iamangngi Harun wuṛṛu i Musa. (I Harun wuṛṛu papapulunne saran mal᷊annu-l᷊annu buatte niṛṛa'e iapapadul᷊i manga saranapa patataṛṛamawuanna, manamlunnu amania hunan MAWU, mangngimbe MAWU, wuṛṛu mangngal᷊amatta tumana'u soa ringannu arannu MAWU.

¹⁴Al᷊aṛṛana'i Musa allangngu Ruata nireengnga lai sulal᷊ummu ṛuanganni Lewi.)

¹⁵I Musa anangnge esakka ruan katou, eteudde i Gerson wuṛṛu i Eliezer.

¹⁶Apan naola'a piaṛṛa'u al᷊aṛṛana'i Gersom eteudde i Sebuel.

¹⁷I Eliezer tumba'u pia sangkatou ana'a esakka, aranne i Rehabya. Arawe i Rehabya pia anangnge tumaniten manambo.

¹⁸I Yizhar, ana'i Kehat aruane, pia ana'a esakka aranne i Selomit; ete i tou tembonannu amonanna.

¹⁹I Hebron, ana'i Kehat atallune, pia siri appatta ana'a esakka; i Yeria pahul᷊une, manansunna i Amarya, i Yehaziel wuṛṛu i Yekameam.

²⁰I Uzial ana'i Kehat aiappanne, pia darua ana'a esakka: i Mikha pahul᷊une, wuṛṛu i Yizia.

²¹I Merari pia darua ana'a esakka, aranne i Mahli wuṛṛu i Musi. I Mahli pia darua ana'a esakka, eteudde i Eleazar wuṛṛu i Kish,

²²arawe i Eleazar nate tawe naasomba ana'a esakka tumba'u ana'a wawine apan naawingngu manga ana'u tuṛṛangngu iamangngi mangitou, eteudde al᷊aṛṛana'i Kish.

²³I Musi ana'i Merari aruane, pia siri tallu ana'a esakka: i Mahli, i Eder wuṛṛu i Yeremot.

²⁴Eteudde manga arannu papapulunni Lewi apan uawoṛṛetta tumuṛṛuttu arannu tembonannu ṛuanganna wuṛṛu amonanne sambau-sambau. Uukki mangitou ruan pul᷊o su tonnane iree wuṛṛu naasomba manara su Wal᷊en MAWU.

²⁵I Daud nabbisara, “MAWU Ruatan Israel buatte nangonggolu paddarame su al᷊aṛṛanang-Nge, wuṛṛu i Tou sassane uatana'a su Yerusalem saran mal᷊annu-l᷊annu.

²⁶Ana waugu udde, Rasannu MAWU wuṛṛu anambon saranapa apan ipappaatta ipattaṛṛamawu tate lai pasannanannu taumatan Lewi.”

²⁷Ringannu tinumuṛṛutta manga parenta panginsueanne wuassi Daud, anambon taumatan Lewi, napawe uukka 20 su tonnane, ṛinone iwoṛṛetta ana see iapamanarate.

²⁸I mangitou ṛinone massumbala manga imam papapulunni Harun sulal᷊ummu mapaamattu lal᷊aghu patataṛṛamawu su Wal᷊en MAWU, mammaresi manga rallakka wuṛṛu manga wabbo'a su Wal᷊en MAWU udde, wuṛṛu mallu'adda tadea'u al᷊awo'u saranapa apan buatte niṛṛae hunan MAWU tawe luhuranna.

²⁹I mangitou lai mammanara manara manansunna indi: roti apan ia'onggola su Ruata, taponna apan ipappaatta ipassubba MAWU, kukisse manipissa apan niola'a tawe ragine, sasamba nitapa, wuṛṛu taponna apan nilo'annu lanan zaitun. I mangitou lai ṛinone masingkattu awakkanne wuṛṛu manguukka manga sasamba apan iapidda su Wal᷊en MAWU.

³⁰Waine wua'udde lai mangitou ṛinone mangantari maddalo MAWU suapan marua allo wuṛṛu ṛabbi;

³¹wuṛṛu lai suapan tempo napawe pia sasamba apan itattambunna ionggola su MAWU su allon Sabat, su ramean Bul᷊anna Wakku, wuṛṛu su manga ramea waine. Su ola'u reengannu taumatan Lewi apan ṛinone mammanara miallo-miallo, buatte lai niolaanna atoranne. Saran mal᷊annu-l᷊annu taumatan Lewi mappaamattu manara udde.

³²I mangitou lai nionggol᷊annu manara iapal᷊u'adda Rasannu MAWU wuṛṛu aiapasumbala manga tuṛṛangngi mangitou, eteudde manga imam papapulunni Harun, sulal᷊ummu mappaamattu pattataṛṛamawu sutampa udde.