Read Talaud 1 TAWARIKH 24 Bible Online

1 TAWARIKH 24 - Talaud bible

1 TAWARIKH 24

¹I Harun pia siri appatta ana'a esakka: i Nadab, i Abihu, i Eleazar wuṛṛu i Itamar. I Nadab wuṛṛu i Abihu dorone nate wuassu iamangngi mangitou ringannu tawe ana'a. Ana waugu udde i Eleazar wuṛṛu i Itamar manga tuṛṛangngi tarua naola'a imam. I Daud nattahia papapulunni Harun sulal᷊ummu wageangnge tumuṛṛuttu manaran mangitou. Sulal᷊ummu manara pattatahia udde i Daud nilal᷊imanni Zadok papapulunni Eleazar wuṛṛu i Ahimelekh papapulunni Itamar.

⁴Papapulunni Itamar naola'a ual᷊un wageangnge, arawe papapuluni Eleazar naola'a mapul᷊o annumma su wageangnge, ana waugu sulal᷊ummu papulunni Eleazar mannamboanna esakka tembonannu amonanna.

⁵Ana waugu mawae su papapulunni Eleazar aroddi lai sulal᷊ummu papapulunni Itamar pia mammamanaran Wal᷊en MAWU wuṛṛu manga piaṛṛa'u agama, ne pattatahia manara niundi.

⁶Papapulunni Eleazar wuṛṛu papapulunni Itamar ual᷊al᷊ol᷊ossa manganu undi, ana see manga aranni mangitou iwoṛṛettu sangkatou mamamoṛṛetta aranne i Semaya ana'i Netaneel taumatan Lewi. Sarangkanambone udde niola'a su saruannu ratu ringannu manga tepellene, i Imam Zadok, i Ahimelekh ana'i Abyatar see manga tembonannu amonannu taumatan Lewi.

⁷Eteindi arannu mammamanara apan nitantunna niundi wuṛṛu ual᷊al᷊intuṛṛutta su ruan pul᷊o appatta wageangnge udde: 1. i Yoyarib — 13. i Hupa 2. i Yedaya — 14. i Yesebeab 3. i Harim — 15. i Bilga 4. i Seorim — 16. i Imer 5. i Malkia — 17. i Hezir 6. i Miyamin — 18. i Hapizes 7. i Hakos — 19. i Petahya 8. i Abia — 20. i Yehezkiel 9. i Yesua — 21. i Yakhim 10. i Sekhanya — 22. i Gamul 11. i Elyasib — 23. i Delaya 12. i Yakim — 24. i Maazya.

¹⁹Arannu manga taumata udde niwoṛṛetta tumuṛṛuttu hiliranni mangitou sumutta su Wal᷊en MAWU wuṛṛu mappaamattu manaran patataṛṛamawu apan buatte niatokki Harun, al᷊amonan mangitou, ere lai parentan MAWU Ruatan Israel.

²⁰Wal᷊ine lai wua'udde sulal᷊ummu papapulunni Lewi ta'e nasutta lai manga tembonannu amonanna manansunna indi: i Yehdeya, papapulunni Amram wuassu akkittu papapulunni Subael; i Yisia, papapulunni Rehabya; i Yahat, papapulunni Yizhar wuassu akkittu papapulunni Selomot; i Yeria, i Amarya, i Yehaziel wuṛṛu i Yekameam al᷊aṛṛana'i Hebron tumuṛṛuttu uukka apan ual᷊al᷊isansunna; i Samir, papapulunni Uziel wuassu akkittu papapulunni Mikha; i Zakharia, papapulunni Uziel wuassu akkittu papapulunni Yisia tuṛṛangngi Mikha; i Mahli, i Musi wuṛṛu i Yaazia, papapulunni Merari.

²⁷I Yaazia pia anangnge esakka siri tallu: i Syoham, i Zakur wuṛṛu i Hibri.

²⁸I Mahli pia anangnge esakka darua aranne i Eleazar wuṛṛu i Kish. I Eleazar tawe anangnge esakka, arawe i Kish pia sangkatou ana'a esakka aranne i Yerahmeel.

³⁰I Musi pia anangnge esakka siri tallu: i Mahli, i Eder wuṛṛu i Yerimot. Eteudde manga amonanna sulal᷊ummu ṛuanganni Lewi.

³¹Su atokku manaran mangitou, suapan tembonannu amonanna suadio'a ringannu tuarine esakka manganu undi ere lai buatte niola'u tuṛṛangngi mangitou, eteudde manga imam papapulunni Harun. Panganganu undi udde lai aellehanni Daud wuṛṛu i Zadok, i Ahimelekh see lai manga tembonannu amonanna wuassu wageangngu manga imam wuṛṛu wuassu wageangngu taumatan Lewi.