Read Talaud 1 TAWARIKH 4 Bible Online

1 TAWARIKH 4 - Talaud bible

1 TAWARIKH 4

¹Manansunna indi sambageanganna wuassu papapulunni Yehuda: i Peres, i Hezron, i Karmi, i Hur wuṛṛu i Syobal.

²I Syobal udde iamangngi Reaya, i Reaya iamangngi Yahat, i Yahat pia darua ana'a esakka i Ahumai wuṛṛu i Lahad. Itarua al᷊amonan tumana'u soa Zora.

³Ana'i Kaleb esakka pahul᷊une wuassu awingnge aranne i Efrat eteudde i Hur. Papapulunni Hur eteudde mandararisikku soan Betlehem, i Etam, i Pnuel wuṛṛu i Ezer. I Etam pia siri tallu ana'a esakka aranne i Yizreel, i Isma wuṛṛu i Idbas, wuṛṛu sangkatou ana'a wawine aranne i Hazelelponi. I Pnuel napararisikku soan Gedor wuṛṛu i Ezer napararisikku soan Husa.

⁵I Asyhur apan napararisikku soan Tekoa pia darua awingnge, eteudde i Hela wuṛṛu Naara.

⁶Ringanni Naara i tou naasomba siri appatta ana'a esakka; i Ahuzam, i Hefer, i Temeni wuṛṛu i Ahastari.

⁷Ringanni Hela, i Asyhur naasomba siri tallu ana'a esakka, eteudde i Zeret, i Yezohar wuṛṛu i Etnan.

⁸I Anub wuṛṛu i Hozobeba eteudde esakka ana'i Kos al᷊amonan amonanna papapulunni Aharhel ana'i Harum.

⁹Pia sangkatou esakka aranne i Yabes; i tou lembon a'addatanna wuassu manga tuṛṛangnge. Ṛatangannu inangngene i tou nisaggo Yabes, ana waugu inangngene tumaniten natataṛṛanga sutempo nanungkangi tou.

¹⁰Arawe i Yabes niumal᷊iomanna su Ruata apan sassubbannu taumatan Israel, wisarane, “Oh Ruata, al᷊amatewe i ya'u, wuṛṛu antimanna hewal᷊anna wageangngu leta'a paparentangku. Tannoiwe i ya'u wuṛṛu paaraua'a asasilaka tadea'u i ya'u tawe matataṛangnga.” Ne Ruata naddaringikka darorongnge.

¹¹I Kelub tuṛṛangngi Suha pia ana'a esakka aranne i Mehir. Ana'i Mehir eteudde i Eston,

¹²wuṛṛu i Eston pia siri tallu ana'a esakka, eteudde i Bet-Rafa, i Paseah wuṛṛu i Tehina, apan napararisikku soa Nahas. Papapulunnu manga taumata udde uatana'a su soa Reka.

¹³I Kenas pia darua ana'a esakka aranne i Otniel wuṛṛu Seraya. I Otniel pia darua lai ana'a esakka, eteudde i Hatat wuṛṛu i Meonotai.

¹⁴Ana'i Meonotai eteudde i Ofra. Ana'i Seraya eteudde i Yoab napararisikku Wawal᷊annu Manganguitta Alu. Anambon tumana'a su wawal᷊anne udde pande mallanginnu mammamanaran lima.

¹⁵I Kaleb ana'i Yefune pia siri tallu ana'a esakka: i Iru, i Ela wuṛṛu i Naam. Ana'i Ela eteudde i Kenas.

¹⁶I Yehaleleel pia siri appatta ana'a esakka: i Zif, i Zifa, i Tireya wuṛṛu i Asareel.

¹⁷I Ezra pia siri appatta ana'a esakka; i Yeter, i Mered, i Efer wuṛṛu i Yalon. I Mered na'awingngi Bica sinangiannu ratun Mesir. Itarua naasomba sangkatou ana'a wawine aranne i Miryam, wuṛṛu ruan katou ana'a esakka aranne i Samai wuṛṛu i Yisba. I Yisba uddewe nandararisikku soa Estemoa. I Mered naawingngu lai sangkatou wawine wuassu ruanganni Yehuda; itarua naasomba ana'a siri tallu; i Yered mandararisikku soan Gedor, i Heber mandararisikku soan Sokho, wuṛṛu i Yekutiel mandararisikku soan Zanoah.

¹⁹I Hodia na'awingngu tuṛṛangngi Naham wawine. Papapulunni mangitou eteudde al᷊amonan amonanni Garmi wuṛṛu amonanni Maakha. Amonanni Garmi uatana'a su soa Kehila, wuṛṛu amonanni Maakha uatana'a su soa Estemoa.

²⁰I Simon pia siri appatta ana'a esakka; i Amnon, i Rina, i Benhanan wuṛṛu i Tilon. I Yisei pia darua ana'a esakka; i Zohet wuṛṛu i Ben-Zohet.

²¹Sangkatou suwallatu ana'i Yehuda aranne i Sela. Papapulunne eteudde ere manansunna indi: i Er napararisikku soa Lekha i Lada napararisikku soa Maresa Amonanna mandaraddu'u mal᷊aṛṛenessa linen su soa Bet-Asybea i Yokim Tumana'u soa Kozeba i Yoas i Saraf na'awingngu manga wawinen Moab wua'udde nabelengke su Betlehem. Woṛṛettu aranna indi nial᷊inna wuassu woṛṛettu al᷊amona.

²³I mangitou sarangkanambone mallal᷊anginnu pangangadoannu ua'e tinaṛṛiti wuṛṛu wensaddu ratu apan uatana'a su soa Netaim wuṛṛu Gedera.

²⁴I Simeon pia siri lima ana'a esakka; i Nemuel, i Yamin, i Yarib, i Zerah wuṛṛu i Saul.

²⁵Papapulunni Saul ere manansunna indi: i Salum i Mibsam i Misma i Hamuel i Zakur i Simei.

²⁷Ana'i Simei 22 su atoune; esakka 16 wuṛṛu wawine 6 su atoune. Arawe tuṛṛangngi Simei matul᷊ungnga anangnge. Papapulunni Simeon anambone tawe ere papapulunni Yehuda.

²⁸Naddatingngu sara tempo i Ratu Daud uaparenta, papapulunni Simeon uatana'a su manga soa indi; Bersyeba, Molada, Hazar-Sual,

²⁹Bilha, Ezem, Tolad,

³⁰Betuel, Horma, Ziklag,

³¹Bet-Markabot, Hazar-Susim, Bet-Biri wuṛṛu Saaraim.

³²I mangitou lai uatana'a su lima tampa waine, eteudde Etam, Ain, Rimon, Tokhen, Asan,

³³wuṛṛu manga ampungnga maranin manga tampa udde naddatingngu araune sara soa Baal su samba'an taṛṛanganna. Etearoddi woṛṛettu papapulunni Simeon su ola'u sinossoṛanna wuṛṛu manga tampa atatanaanni mangitou.

³⁴Manansunna indi eteudde manga arannu timmadu amonanna sulal᷊ummu ruanganni Simeon: i Mesobab i Yamlekh i Yosa ana'i Amazia i Yoel i Yehu ana'i Yosibya (i Yosibya eteudde ana'i Seraya, pulunni Asiel) i Elyoënai i Yaakoba i Yesohaya i Asaya i Adiel i Yesimiel i Benaya i Ziza ana'i Sifei (akkitu sinossoṛanni Sifei ire'e eteudde: i Alon, i Yedaya, i Simri, i Semaya). Ana waugu manga alahanni mangitou sidutu a'atambanna,

³⁹ne i mangitou nassal᷊iawukke watukku waṛṛatta naddatingngu maranin Soa Gedor apan addone su sambau wal᷊anne. Su samba'a ra'i wuassu wal᷊anne udde i mangitou naasangkalla wadda'u nannal᷊o apan masuwukka see lai mal᷊alangnga wuṛṛu tawe angngone su pappadul᷊iananna winatangngi mangitou. Dorone wageangngu leta'a udde wawanuannu manga taumatan Ham apan mabbiakka ringannu paddarame.

⁴¹Sutempo i Hizkia ratun Yehuda, papapulunni Simeon udde namangalo Gedor. I mangitou nanggohakku manga rasannu tumana'u soa udde wuṛṛu taumatan Meunim, ana see nallimbuakka tumanangnge. Wua'udde i mangitou namanuate poiaroddi ana waugu manambo nannal᷊one apan maola'a wiakku winatangngi mangitou.

⁴²Su al᷊ungngu piaṛṛa'u ana'i Yisei, eteudde i Pelaca, Nearya, Refaya wuṛṛu Uziel, 500 taumata waine wuassu ruanganni Simeon nangingkatta watukku Edom su samba'an ra'i.

⁴³I mangitou namate manga taumatan Amalek lambene, ana see namanuate isudde nanattakka orassa udde.