Read Talaud 1 TAWARIKH 5 Bible Online

1 TAWARIKH 5 - Talaud bible

1 TAWARIKH 5

¹I Ruben eteudde ana'i Yakub pahul᷊une. Arawe ana waugu i Ruben buatte nandal᷊eo arannu sangkatou awingngu iamangnge waine, ne pussa'ane sangkatou ana'a pahul᷊u niul᷊eanna wuṛṛu nionggola si Yusuf. Salaiwe aroddi atohassanne wuassu wallattu papapulunni Yakub wal᷊inewe ruanganni Yusuf ewe'e ruanganni Yehuda. Ewe'e lai dorone naola'a ratu su ahewallu Israel eteudde wuassu ruanganni Yehuda udde.

³I Ruben ana'i Yakub pahul᷊une, pia sire appatta ana'a esakka; i Henokh, i Palu, i Hezron wuṛṛu i Karmi.

⁴Eteindi papapulunni Yoel; i Semaya, i Gog, i Simei, i Mikha, i Reaya, i Baal wuṛṛu i Beera. I Beera eteudde piaṛṛa'u ruanganni Ruben sutempo i tou sinametti Tiglat-Pileser ratun Asyur, wuṛṛu niapidda su leta'a pamamuanganna.

⁷Sulal᷊ummu watti'u inasossoṛanna uawoṛṛetta lai manga tembonannu ṛuanganna sulal᷊ummu ruanganni Ruben ereindi; i Yeiel, i Zakharia,

⁸wuṛṛu i Bela ana'i Azas, pulunni Sema wuassu amonanni Yoel. Ruanganni Ruben uatana'a su Aroër wuṛṛu su wageangngu leta'a apan nanattakka wuassu Aroër watukku sawannakka maddatingngu Nebo wuṛṛu Baal-Meon.

⁹I mangitou uapadul᷊i manambo winatangnga su wageangngu Gilead. Ana waugu udde, i mangitou namanua su wageangngu samba'an ra'i na'oman sara su wadda'a apan uapannatta araune naddatingngu Sal᷊ukku Efrat.

¹⁰Sutempo i Ratu Saul, ruanganni Ruben namangalo wuṛṛu namaddon taumatan Hagri su Gilead samba'an ra'i, ana see i mangitou namanuate su wanua udde.

¹¹Su samba'an sawannakka su wageangngu leta'u ruanganni Ruben uatana'a walagi Gad su leta'u Basan naddatingngu araune sara Salka su samba'an ra'i.

¹²Wuassu ruanganni Gad udde i Yoel uddewe al᷊amona amonanna apan apianne wuṛṛu i Safam uddewe al᷊amonan amonanna aruane. I Yaenai wuṛṛu i Safat eteudde al᷊amonan manga amonanna baine su Basan.

¹³Manga taumata waine sulal᷊ummu ruanganni Gad apan nasutta sulal᷊ummu amonanna pitu eteudde: i Mikhael, i Mesulam, i Syeba, i Yorai, i Yakan, i Ziya wuṛṛu i Eber.

¹⁴I mangitou papapulunni Abihail ana'i Huri. Akkittu niasossoṛṛanni mangitou wua bowa iree ere manansunna indi: i Abihail, i Huri, i Yaroah, i Gilead, i Mikhael, i Yesisai, i Yahdo, i Bus.

¹⁵Tembonannu manga amonanna eteudde i Ahi ana'i Abdiel, pulunni Guni.

¹⁶I mangitou uatana'a su wageangngu leta'u Basan wuṛṛu Gilead, wuṛṛu su manga soa su wageangngu leta'a udde wuṛṛu su ahewallu wadda'u nannal᷊o su Saron.

¹⁷Niasossoṛṛanna indi niwoṛṛetta sutempo i Yotam ratun i Yehuda, wuṛṛu Yerobeam ratun Israel.

¹⁸Sulal᷊ummu ṛuanganni Ruben, i Gad wuṛṛu ṛuanganni Manasye su samba'a ra'in Yordan pia 44.760 su atoune tantara apan masiṛṛongke wuṛṛu masokkate mapapangalo mappaattu allungnga, hal᷊ele wuṛṛu alatti'anna.

¹⁹I mangitou napapangalo nando'appa ṛuangannu Yetur, Nafis wuṛṛu Nodab, eteudde manga ṛuanganna sulal᷊ummu walahanni Hagri.

²⁰Manga tantara udde mangngimanna Ruata wuṛṛu ma'iontolla si Tou, ne Ruata naddaringikka darorongngi mangitou wuṛṛu nangonggolu auntunganna si mangitou su manga taumatan Hagri wuṛṛu manga hawene.

²¹Ana waugu pangalo udde nariaddi wuassu apulun Duata, ne manambo seetta apan nipaten mangitou. I mangitou lai nanawanna 100.000 su atoune, wuṛṛu nangaṛṛo 50.000 unta, 250.000 domba wuṛṛu 2.000 keledai. Wua'udde i mangitou namanuate su wageangngu leta'a udde na'oman sara sutempon walahannu Israel niatawanna wuṛṛu niapidda watukku tampa pandammeanna.

²³Sambageanganna ṛuanganni Manasye uatana'a su leta'u Basan na'oman sara watukku sawannakka araune naddatingngu Baal-Hermon. I mangitou mallannu aatambanna anambone.

²⁴Eteindi manga tembonannu amonanni mangitou: i Hefer, i Yisei, i Eliel, i Azriel, i Yeremia, i Hodawya wuṛṛu i Yahdiel. I mangitou sarangkanambone tantara mangkawaṛṛani wuṛṛu matohassa.

²⁵Taumatan Israel mal᷊awangnga Ruata apan sassubbannu al᷊amonan mangitou. I mangitou nanantangngu Ruata wuṛṛu mattaṛṛamawu manga mongannu walahanna apan nilimbuaṛṛannu Ruata wuassu wanua Kanaan.

²⁶Ana waugu udde Ruata nangal᷊oren naungngi Pul ratun Asyur, ne i tou inaite namangalo wanua udde. I Pul iasaggo lai i Tiglat-Pileser. Ana see ṛuanganni Ruben, i Gad wuṛṛu i Manasye apan uatana'a su samba'a ra'in Yordan niapidda naola'a taumata niatawanna wuṛṛu niwuangnga su Halah, Habor, Hara wuṛṛu watukku sambau tampa maranin Sal᷊ukku Gozan. Poiaroddi i mangitou natana'a wuṛṛu namanua naddatingngu allo indi.