Read Talaud 1 TAWARIKH 9 Bible Online

1 TAWARIKH 9 - Talaud bible

1 TAWARIKH 9

¹Anambon taumatan Israel uawoṛṛetta tumuṛṛuttu alahanne sambau-sambau. Aranna udde lai uawoṛṛetta sulal᷊ummu wuken Mararatun Israel. Maola'a sambau ṛuumanna ana waugu rosan mangitou, tumana'u Yehuda niapidda watukku tampa pamamuanganna.

²Suwallatti mangitou apan paarorone nebelengnga su leta'a pussa'a mangitou su manga soa, eteudde taumata wiasa, manga imam, taumatan Lewi wuṛṛu mammamanaran Wal᷊en MAWU.

³Sambageanganna wuassu ṛuanganni Yehuda, i Benyamin, i Efraim wuṛṛu i Manasye nabelengnga wuṛṛu natana'e su Yerusalem.

⁴Pia 690 alahanna wuassu ṛuanganni Yehuda apan uatana'a su Yerusalem, nasutta papapulunnu al᷊aṛṛana'i Yehuda aranne i Peres, i Syela wuṛṛu i Zerah. Papapulunni Peres nipiaṛṛa'i Utai. Akkittu papapulunni Utai wua bowa iree eteudde, i Utai, i Amihud, i Omri, i Imri wuṛṛu i Bani. Papapulunni Syela uapiaṛṛa'a si Asaya. Ete i tou udde uapua alahanna. Papapulunni Zerah uapiaṛṛa'a si Yeuel.

⁷Manga taumatan ṛuanganni Benyamin apan uatana'a su Yerusalem pia 956 alahanna. Uapua manga alahanni mangitou eteudde: i Salu ana'i Mesulam, pulunni Hodawya tuwonuta'i Hasenua i Yibnia ana'i Yeroham i Ela ana'i Uzi, pulunni Mikhri i Mesulam ana'i Sefaca, pulunni Rehuel, tuwonuta'i Yibnia.

¹⁰Manga imam manansunna indi apan uatana'a su Yerusalem: i Yedaya, i Yoyarib wuṛṛu i Yakhin i Azarya ana'i Hilkia, al᷊amonane eteudde i Mesulam, i Zadok, i Merayot wuṛṛu i Ahitub. (I Azarya eteudde uapua mammamanaran Wal᷊en MAWU.) I Adaya ana'i Yeroham, al᷊amonane eteudde Pasyhur wuṛṛu i Malkia. I Masai ana'i Adiel; al᷊amonane eteudde Yahzera, i Mesulam, i Mesilemit, i Imer.

¹³Manga imam apan naola'a uapua alahanna sarangkanambone 1.760 su atoune. I mangitou pande mammanara al᷊awo'u manara su Wal᷊en MAWU.

¹⁴Manga taumatan Lewi manansunna indi apan uatana'a su Yerusalem: i Semaya ana'i Hasub, al᷊amonane eteudde Azrikam wuṛṛu Hasabya wuassu ṛuanganni Merari. i Bakbakar, i Heres wuṛṛu i Galal i Matanya ana'i Mikha; al᷊amonane eteudde i Zikhri wuṛṛu i Asaf i Obaja ana'i Semaya; al᷊amonane eteudde i Galal wuṛṛu i Yedutun i Berekhya ana'i Asa, pulunni Elkana, i tou natana'a su leta'u soa Netofa.

¹⁷Manga mandariaga Wal᷊en MAWU apan uatana'a su Yerusalem su sambau ringannu amonanni mangitou eteudde; i Akub, i Talmon, i Ahiman, wuṛṛu i Salum tembonannu mandariaga.

¹⁸Naddatingngu sara allo indi manga taumata wuassu amonanni mangitou, manarane mandiaga Ngara Pasallanganne Ratu su samba'an ra'i. Dorone manga taumata wuassu amonanni mangitou niapamanara mandiaga manga ngara pasallanganna mattudda paddasanannu taumatan Lewi.

¹⁹Taumata niapamanara mandiaga ngara suttanna watukku Rasannu MAWU eteudde i Salum suadio'a ringannu manga taumata sangkamonanna, eteudde amonanni Korah. (I Salum udde ana'i Kore pulunni Ebyasaf.) Dorone al᷊amonan mangitou lai mammanara manara udde sutempo i mangitou mangngimbe su paddasanannu MAWU.

²⁰I Pinehas ana'i Eleazar — doronganna MAWU mallu'adda si tou! — supaassa buatte namiaṛṛa'i mangitou.

²¹I Zakharia ana'i Meselemya i tou lai mandariaga ngara pasallangannu Rasannu MAWU.

²²Sarangkanambone apan nipile maola'a mandariaga manga ngara pasallanganna 212 su atoune. I mangitou nawoṛṛetta tumuṛṛuttu manga ampungnga apan atatanaanni mangitou. Iupungngi mangitou nionggol᷊anni Ratu Daud wuṛṛu i Nabi Samuel manga manara.

²³Nanattakka orassa udde i mangitou wuṛṛu papapulunne sidutu naola'a mandariaga Ngara Pasallanganna Wal᷊en MAWU.

²⁴Ngarane 4: sambau su samba'an sawannakka, sambau su samba'an timukka, sambau su samba'an ra'i, sambau su samba'an waṛṛatta. Suapan ngarane udde pia sangkatou taumatan Lewi apan naola'a tembonannu mandariaga.

²⁵Manga tuṛṛangngi mangitou apan uatana'a su manga ampungnga, massumbala lai si mangitou ringannu mallal᷊ol᷊ossa — sangkamisa paassa.

²⁶Arawe siri appatta tembonannu mandariaga udde mammanara miallo-miallo. I mangitou uataṛṛapa manga wabbo'a su Wal᷊en MAWU wuṛṛu manga saranapa apan uaraddo isudde.

²⁷I mangitou utana'a maranin Wal᷊en MAWU, ana waugu i mangitou ṛinone mandiaga wal᷊en udde wuṛṛu mamu'essa manga ngaran pasallanganna suapan marua allo.

²⁸Sambageanganna taumatan Lewi waine manarane mallu'adda manga saranapa patataṛṛamawuanna. Ete i mangitou mandareengnge sutempo iapasabbangnga wuṛṛu sutempo iapawelengnga apia.

²⁹Sambageanganna lai manarane mallu'adda imannu patataṛṛamawuanna, wuṛṛu taponna, anggore, lanan zaitun, amania, see lai rampa-rampa.

³⁰Arawe apan manarane mallo'an rampa-rampa, eteudde manga imam.

³¹Iapa manarane ma'ola'a sasamba apan iattapa eteudde sangkatou taumatan Lewi aranne i Matica, ana'a pahul᷊un Salum wuassu amonanni Korah.

³²Manga taumata wuassu ṛuanganni Kehat manarane mandiahi roti ipangimbe MAWU suapan allon Sabat.

³³Sambageanganna taumatan Lewi waine manarane mangngantari su Wal᷊en MAWU. Manga tembonannu amonanni mangitou uatana'a su manga pira sabbua su Wal᷊en MAWU. I mangitou tawe nionggol᷊annu manara waine, ana waugu i mangitou mammanara allo wuṛṛu ṛabbi.

³⁴Manga taumata apan nisago dorone, eteudde manga tembonannu alahanni Lewi tumuṛṛuttu akkittu sinossoṛṛanni mangitou. Ete i mangitou udde manga piaṛṛa'a apan uatana'a su Yerusalem.

³⁵Yeiel napararisikku soa Gibeon, ana see natana'e isudde. Awingnge aranne i Maakha,

³⁶wuṛṛu anangnge esakka, iapa pahul᷊une aranne i Abdon, wuṛṛu ingana'a tuarine aranne i Zur, i Kish, i Baal, i Ner, i Nadab,

³⁷i Gedor, i Ahyo, i Zakharia wuṛṛu i Miklot,

³⁸iamangngi Simea. Papapulunni mangitou uatana'a su Yerusalem suadio'a ringannu manga alahanna waine apan sangkamonanni mangitou.

³⁹Iamangngi Ratu Saul aranne i Kish wuṛṛu iupungnge aranne i Ner. I Saul pia siri appatta ana'a esakka: i Yonatan, i Malkisua, i Abinadab, wuṛṛu i Esybaal.

⁴⁰I Yonatan pia ana'a esakka aranne i Meribaal, iamangngi Mikha.

⁴¹I Mikha pia siri 4 ana'a esakka: i Piton, i Melekh, i Tahrea wuṛṛu i Ahas.

⁴²Ana'i Ahas aranne i Yoada apan pia anangnge esakka siri tallu: i Alemet, i Asmawet wuṛṛu i Zimri. Akkittu sinossoṛṛanni Zimri eteudde i Moza,

⁴³i Bina, i Rafa, i Elasa wuṛṛu i Azel.

⁴⁴I Asael pia siri 6 ana'a esakka; i Azrikam, i Bokhru, i Ismael, i Searya, i Obaja wuṛṛu i Hanan.