Read Talaud 2 TAWARIKH 1 Bible Online

2 TAWARIKH 1 - Talaud bible

2 TAWARIKH 1

¹Salomo ana'i Daud naola'e ratu apan matohassa pamamarentane sulal᷊ummu araratuannu Israel. MAWU Ruatane nangal᷊amatta si tou wuṛṛu na'ola'a si tou lembon uataṛṛino.

²Anambon tembonannu tantara 1.000 wuṛṛu tantara 100, anambon mamanaran araratuanna, wuṛṛu anambon tembonannu amonannu Israel niparentanni Salomo

³inai suadio'a ringanni tou watukku tampan patataṛamawuanna su Gibeon. I mangitou inai poiaroddi, ana waugu ete isudde pia Rasannu MAWU apan niola'i Musa allangngu MAWU sutempo i tou su wadda'a. (

⁴Arawe Wantallu Paairen MAWU niaddo su Yerusalem sulal᷊ummu rasanna apan niola'i Daud pangaddoannu Wantalla udde sutempo niingkatti Daud wuassu Kiryat Yearim.)

⁵Mezbah witu'a apan niola'i Bezaleel ana'i Uri, pulunni Hur, uaraddo poiaroddi lai su Gibeon su saruannu Rasannu MAWU. Ratu Salomo wuṛṛu anambon tumana'u soa mattaṛṛamawu su MAWU poiaroddi.

⁶Su saruannu Rasanna udde ratu nangonggolu sasambane su wowon mezbah witu'a 1.000 winatangnga maola'a sasamba su MAWU.

⁷Ṛabbi udde Ruata naipasilon batangan-Ne si Salomo wuṛṛu nabbisara, “Salomo, paddorongke apa apan ipaapulunu, udde sarun Ta'u ionggolla si'o!”

⁸Salomo sinumimbakka, “Oh Ruata, I'o buatte namasilo manungku I'o lembon marangngu iamangku Daud, wuṛṛu i ya'u buatte nitenegu MAWU naola'a ratu pinallol᷊ossa si tou.

⁹Orassa indi, oh MAWU Ruata, antimanna I'o manipussu paaire-Nu su iamangku. I ya'u buatte nitenegu MAWU naola'a ratu su walahanna wahewalla indi apan tawe iareengnga anambone.

¹⁰Ana waugu udde onggol᷊aawe si ya'u apande wuṛṛu asingkatta apan ta'u pandumanna ipamiaṛṛa'i mangitou. Amungkangu tawe aroddi, ereapa i ya'u wotongnge mamarenta al᷊aṛṛanang-Ngu apan manambo indi?”

¹¹Ruata sinumimbakka si Salomo, “Darorongngu udde mapia. I'o tawe naddorongnga paa'ala ara'e darotongnga ara'e aaddata ara'e papaten manga seennu ara'e uukka mal᷊o'engnga su waddangngu sassane, ewe'e apande wuṛṛu asingkatta ipamarenta al᷊aṛṛana-U apan buatte Ta'u itantilla si'o.

¹²Ana waugu udde apande wuṛṛu asingkatta sarun Ta'u ionggolla si'o. Wal᷊ine wua'udde lai, Ya'u sarun ma'ola'a si'o lembon su lal᷊umanna'a, lembon ala wuṛṛu lembon tumelengnga wuassu al᷊awo'u ratu mawae ete sutempo paarorone aroddi lai sutempo apan addantane.”

¹³Wua'udde i Salomo nanantangngu tampa patataṛamawuanna su Gibeon suapa poiaroddi pia Dasannu MAWU, ana see nabelengke watukku Yerusalem. Wua isudde i tou napaamattu pamamaretane su Israel.

¹⁴I Tou nanuungngu ammul᷊annu tantarane ringannu 1.400 keretan pangalo wuṛṛu 12.000 awal᷊on pangalo. Sambageanganna niaddon Salomo su Yerusalem, wuṛṛu lambene su al᷊awo'u soa waine.

¹⁵Sulal᷊ummu tempo i Salomo uaparenta, wul᷊awanna wuṛṛu sal᷊a'a naola'a saranapa wiasa su Yerusalem, ere lai watu; wuṛṛu alu cemaran Libanon tumaniten manambo ere alu ara wiasa.

¹⁶Wuassu manaran manga mabbawal᷊u'a apan uasumbala ratu, awal᷊o niwallianna wuassu Mesir wuṛṛu Kewe,

¹⁷wuṛṛu manga keretan pangalo niwallianna wuassu Mesir, wua'udde niwal᷊u'a lai su manga ratun Het wuṛṛu manga ratun Siria ringanna aregane 150 roitta sal᷊a'a aregan awal᷊o sambau, wuṛṛu 600 roitta sal᷊a'a aregan keretan pangalo sambau.