Read Talaud 2 TAWARIKH 10 Bible Online

2 TAWARIKH 10 - Talaud bible

2 TAWARIKH 10

¹Rehabeam inaite watukku Sikhem ana waugu anambon tumana'u Israel su wageangngu sawannakka uaammulle poiaroddi manenegi tou maola'a ratu.

²Sutempo udde Yerobeam ana'i Nebat ta'e su Mesir ana waugu tinumal᷊angngi Ratu Salomo. Napawe i tou naaringikka ola'i Rehabeam, i tou nabelengke apia watukku Israel.

³Tumanangnge su wageangngu sawannakka namago si Yerobeam, ana see i mangitou suadio'a inaite sinumaruanna si Rehabeam. Unni mangitou,

⁴“Salomo iamangngi Tuangnga buatte nangonggolu winabbawa apan mawakkatta si yami. Amungkangu i Tuangnga makkanna winabbawa wuṛṛu manggaingnga asasusan kami, yami sarun massuṛṛubbawa si Tuangnga.”

⁵Rehabeam sinumimbakka, “I ya'u maṛṛingidda asuene. Rantate apia tallu allo mal᷊iudda.” Ne manga taumata udde napul᷊ete.

⁶Ana see i Rehabeam naddorongnga tatantiro su manga matatimmade apan buatte naola'a mananantiron Salomo iamangngi Rehabeam, “Ereapa ṛinone i ya'u sumimbakka wisaran manga taumata udde?” i Rehabeam naiwal᷊o. “Apa tatantiron kamiu?”

⁷I mangitou sinumimbakka, “Amungkangu i Tuangnga maapulu mangapia tumana'u soa, wuṛṛu malluassa naungngi mangitou, onggol᷊eten sasimbakka apan mapia si mangitou, ne i mangitou sarun tumuṛṛutta si Tuangnga saran mal᷊annu-l᷊annu.”

⁸Arawe tatantiron manga matatimmade udde tawe niraringiṛṛanni Rehabeam. Ewe'e lai i tou inaite ringannu dario'a apan salluwane wuṛṛu orassa udde uasumbala si tou.

⁹Si mangitou i tou naiwal᷊o, “Apate al᷊aṛṛa'i yamiu si ya'u ipanimbakka aiwal᷊on awadaalla apan maddorongnga tadea'u i ya'u makkanna winabbawan mangitou?”

¹⁰I mangitou sinumimbakka, “Arendiwe ṛinone iwisaran Tuangnga si mangitou, ‘Salaiwe i ya'u lome, arawe i ya'u ta'e mattohasanna wuassu iamangku.

¹¹Iamangku nangonggolu winabbawa apan mawakkatta si ya'u, arawe i ya'u sarun mangonggolu awakkatanne lai. I tou nanggesekka si yamiu ringannu sambokka, arawe i ya'u sarun manggesekka ringannu sambokka ṛoangnge atta'a!’ ”

¹²Tallu allo wua'udde i Yerobeam wuṛṛu anambon taumata udde, nabelengnga sinumaruanna si Ratu Rehabeam, ere buatte nirolokke.

¹³Uapapaṛṛalan al᷊aṛṛa'u matatimmade, awadaalla apan nirumanta ringanni tou udde niwo'anna ringannu maṛṛagissa.

¹⁴Nassul᷊ungngu al᷊aṛṛa'u dario'a, i tou nabbisara, “Iamangku nangonggolu winabbawa apan mawakkatta si yamiu, arawe i ya'u sarun ma'ola'a winabbawa udde mabbakkatanna lai. I tou nanggesekka si yamiu ringannu sambokka, arawe i ya'u sarun manggesekka si yamiu ringannu sambokka ṛoangnge atta'a!”

¹⁵Darorongngu awadaalla tawe niraringiṛṛanne. Arawe udde apulun MAWU Ruata. Apa apan niwisaran MAWU si Nabi Ahia wuassu Silo su ola'i Yerobeam ana'i Nebat ṛinone matipussa.

¹⁶Napawe tumana'u Israel naatutukka manungku ratu maddiri maddaringikka si mangitou, i mangitou nangintul᷊i, “Ipa'ura lai i Daud wuṛṛu papapulunne! I mangitou tawe inolaanne apa-apa si ite. Tumana'u Israel, wette i ite mapul᷊ete! Wala'e i Rehabeam udde mangatokku watanganne sassane!” Ne tumana'u Israel napul᷊ete,

¹⁷wuṛṛu i Rehabeam naola'e ratu tumba'u su wageangngu leta'u Yehuda.

¹⁸Salaiwe aroddi i Ratu Rehabeam ta'e lai nandolokki Adoniram, sangkatou tembonannu mamanara wata'a, mapal᷊annabbu awadaalla. Arawe i tou tinuntunganni mangitou watu na'oman sara nate. i Rehabeam sassane naal᷊assangnga wuṛṛu mal᷊iha-l᷊ihakka sinuma'e keretane wuṛṛu tinumal᷊angngu watanganne watukku Yerusalem.

¹⁹Nanattakka orassa udde tumanangnge su wageangngu sawannakku araratuannu Israel sidutu mammangalo manga ratu papapulunni Daud.