Read Talaud 2 TAWARIKH 11 Bible Online

2 TAWARIKH 11 - Talaud bible

2 TAWARIKH 11

¹Napawe i Ratu Rehabeam na'omate su Yerusalem, i tou nangammulu 180.000 tantarane apan apianne wuassu ṛuanganni Yehuda wuṛṛu Benyamin iapapangalo taumatan Israel wuṛṛu mapawelengngu taṛṛinone apia su manga ṛuanganna su wageangngu sawannakku Israel.

²Arawe MAWU nandolokki Nabi Semaya

³niapapasingkattu tanata indi si Rehabeam wuṛṛu su anambon taumata sulal᷊ummu ṛuanganna Yehuda wuṛṛu Benyamin,

⁴“Ariewe pamangalo manga tuṛṛangngu taumatan Israel. Apul᷊ete! Sarangkanambone apan nariaddi udde apulu-U.” Ne i mangitou sarangkanambone tinumuṛṛutte parentan MAWU wuṛṛu tate nariaddi inai mamangalo si Yerobeam.

⁵Rehabeam natana'a su Yerusalem wuṛṛu nandolokku taumata niapaola'a tanda'a watu su manga soa su wageangngu Yehuda wuṛṛu Benyamin, eteudde:

⁶soa Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon wuṛṛu Hebron.

¹¹I tou nanohassa manga soa apan pia tanda'a watune udde wuṛṛu napatana'au sangkatou piaṛṛa'u tantara su anambon soa udde. Sambau-sambau soa udde pia saddiane anna, lanan zaitun wuṛṛu anggore

¹²see lai allungnga wuṛṛu wangkao. Ringannu aroddi wageangngu leta'u Yehuda wuṛṛu Benyamin sidutu sulal᷊ummu taṛṛinone.

¹³Manga imam wuṛṛu taumatan Lewi wuassu anambon wageangngu leta'u Israel inaite naammuli Rehabeam.

¹⁴Manga taumatan Lewi udde nanantangngu manga wadda'u nannal᷊o wuṛṛu leta'i mangitou ana see nangingkatte watukku Yehuda wuṛṛu Yerusalem, ana waugu i Yerobeam wuṛṛu manga ratu apan nallol᷊ossa si tou tawe mamalan mangitou mammanara naola'a imam su MAWU.

¹⁵Yerobeam nanenegu manga imam apan hunane si tou sassane ipa'imbe su manga tampa pasasubbanna paal᷊uanna wuṛṛu ipassubba manga setanna see lai paal᷊uannu sapi apan nilanginne sassane.

¹⁶Manga taumata wuassu anambon ṛuangannu Israel apan atonna-tonna maapulu massubba MAWU, Ruatan Israel, nangingkatte watukku Yerusalem, tinumantalongnga manga taumatan Lewi udde tadea'u wotongnge mangonggolu sasamba su MAWU, Ruata apan sassubbannu al᷊amonan mangitou.

¹⁷Ringannu aroddi araratuannu Yehuda nabbal᷊i matohassa. Al᷊annune tallu tonna i mangitou uasamba'a manaran Rehabeam ana'i Salomo udde, wuṛṛu mabbiakka ere sutempo i Ratu Daud wuṛṛu i Ratu Salomo uaparenta.

¹⁸Rehabeam naawingngi Mahalat; iamangngi Mahalat eteudde Yerimot ana'i Daud, wuṛṛu inangngene eteudde i Abihail ana'i Eliab, pulunni Isai.

¹⁹Itarua pia ana'a esakka siri tallu: Yeus, Semarya wuṛṛu Zaham.

²⁰Wua'udde Rehabeam naawingngi Maakha ana'i Absalom. I tarua naasomba ana'a esakka siri appata: Abia, Atai, Ziza, wuṛṛu Selomit.

²¹Rehabeam pia awingnge siri 18 wuṛṛu awingnge su liudde 60, 28 ana'a esakka wuṛṛu 60 ana'a wawine. Wuassu anambon awingnge wuṛṛu awingnge su liudde udde, apan lembon arangnguanne eteudde i Maakha.

²²Ana waugu udde Abia ana'i Maakha arangnguanne wuassu anambon anangnge waine, na'oman sara ete i Abia lai apan nipilene naola'a ratu nallol᷊ossa si tou.

²³Ringannu apandene i Rehabeam nangonggolu manga manara su manga anangnge esakka wuṛṛu niapatana'a su manga soa apan pia tanda'a watune su ahewallu leta'u Yehuda wuṛṛu Benyamin. I tou nangonggolu anna si mangitou manambo-nambo, wuṛṛu nanaddia awingngi mangitou apan manambo.