Read Talaud 2 TAWARIKH 18 Bible Online

2 TAWARIKH 18 - Talaud bible

2 TAWARIKH 18

¹Sutempo i Yosafat ratun Yehuda naalate wuṛṛu tinumelengke, i tou nangawingngu sangkatou tuṛṛangnge ringannu sangkatou tuṛṛangngi Ahab ratun Israel.

²Manga pira tonna wua'udde, Yosafat inaite nattembo si Ahab su soa Samaria. Ipangaddatta si Yosafat wuṛṛu mallal᷊aṛenggene, Ahab na'ola'a andeangnga wuṛṛu nandolokku taumata nipaṛṛata domba wuṛṛu sapi. Su orassa udde i tou nangahe si Yosafat tadea'u mamangalo soan Ramot su Gilead.

³I tou naiwal᷊o, “Mappuluwe i'o hawe inai suadio'a ringangku mamangalo Ramot?” Yosafat sinumimbakka, “Ore, tantara'u sarun maammulla ringannu tantaranu. I ite mamangalote suadio'a.

⁴Arawe mappianne iaddua maiwal᷊o MAWU asuene.”

⁵Ne i Ahab nangammullu nabi iraṛṛangngo 400 su atoune ana see naiwal᷊o si mangitou, “Wotongngewe i ya'u inai mamangalo soan Ramot ara'e tawe?” “Wotongnge!” sasimbakki mangitou. “Ruata sarun manantillu soa udde si Tuangnga.”

⁶Arawe i Yosafat naiwal᷊o apia, “Apa isindi tawe nabi waine apan wotongnge maiwal᷊o MAWU?”

⁷Ahab sinumimbakka, “Ta'e pia sangkatou, i Mikha ana'i Yimla. Arawe i ya'u maddantinni tou, ana waugu taambe saran paassa i tou na'ola'a ira-ira apan mapia si ya'u; sidutu alal᷊eoanne.” “E, arie pabbisara aroddi!” sasimbakki Yosafat.

⁸Ne i Ahab namagote sangkatou mamanaran araratuanne ana see nandolokki tou mal᷊iha-l᷊ihakka niapaal᷊appa si Mikha.

⁹Sutempo udde i Ahab wuṛṛu Yosafat ualuṛṛen laubbu araratuanna, ua'ianna su adderan araratuanna su tampa paṛṛindanna ganduma su saruannu ngara mal᷊oangnga su soa Samaria, tantal᷊anna manga nabi ruddanta sumaruanna mamasingkattu ira-iran mangitou.

¹⁰Sangkatou suwallattu manga nabi udde, aranne i Zedekia ana'i Kenaana, nallanginnu manga tatandu'a atta'a ana see nabbisara si Ahab, “Eteindi apan niapasingkattu MAWU, ‘Ringannu manga tatandu'a ereindi i Tuangnga sarun mamangalo Siria wuṛṛu makkimunsa'a si mangitou.’ ”

¹¹Nabi waine sarangkanambone niumire wuṛṛu nabbisara, “Pamangalote Ramot, i Tuangnga sarun maauntungnga. MAWU sarun mangonggolu auntunganna si Tuangnga.”

¹²Tantal᷊anna udde daroloṛṛanna apan nangal᷊appa si Mikha, nabbisara si Mikha, “Anambon nabi waine buatte namasingkatta manungku auntunganna tumba'u su ratu. Antimanna i Papa lai mangapiddu watti'a mapia ere lai i mangitou.”

¹³Arawe i Mikha sinumimbakka, “Ringannu arannu MAWU apan wiakka, i ya'u tumba'u mamasingkatta apa apan niapasingkattu MAWU si ya'u!”

¹⁴Napawe i Mikha na'omate su saruanni Ratu Ahab, ratu naiwal᷊o, “Wotongngewe i ya'u wuṛṛu i Ratu Yosafat inai mamangalo Ramot ara'e tawe?” “Pangaloite!” sasimbakki Mikha. “Asinungka i Tuangnga sarun maauntungnga. MAWU sarun mangonggolu auntunganna si Tuangnga.”

¹⁵Ahab sinumimbakka, “Amungkangu i'o mabbisara si ya'u ringannu arannu MAWU, pasingkata'e ringannu atonna. Paapirate i'o ṛinone ta'u iapanaungnga su ola'u hatto udde?”

¹⁶Mikha nabbisara, “I ya'u naasilo tantaran Israel nassal᷊iawukka su manga wowone. I mangitou naal᷊ihidda tawe mallal᷊u'adde, wuṛṛu MAWU nabbisara su ola'i mangitou, ‘Manga taumata indi tawe piaṛṛangnge. Wala'ewe i mangitou mapul᷊e ringannu sal᷊amatta.’ ”

¹⁷Ana see i Ahab nabbisara si Yosafat, “Wal᷊inewe atonna wisara'u? Taambe saran paassa i tou namasingkatta si ya'u ringannu mapia! Sidutu tumba'u mammasingkattu al᷊eoanne!”

¹⁸Mikha nabbisara apia, “Orassa indi paddaringikke wisaran MAWU! I ya'u naasilo MAWU ua'ianna su adderan araratuan-Ne su surga, wuṛṛu anambon mala'ekatta uarisikka marani-Ne.

¹⁹MAWU naiwal᷊o, ‘Isai inai massal᷊o'i Ahab tadea'u i tou inai mapapangalo wuṛṛu mate su Ramot su Gilead?’ Sasimbakku manga mala'ekatta udde uapapaṛṛala.

²⁰Panginsueanne sambau ghaṛṛaho nirumantate. I tou nangundanin MAWU wuṛṛu nabbisara, ‘Ia'ute massal᷊o'i ahab.’ ‘Ewe'e ereapa lal᷊anne?’ aiwal᷊on MAWU.

²¹Ghaṛṛaho udde sinumimbakka, ‘I ya'u sarun inai wuṛṛu anambon nabi-nabin Ahab iapaawusu.’ MAWU nabbisara, ‘Mapia, ola'e udde, i'o sarun maasal᷊o'i tou.’ ”

²²Wua'udde i Mikha nabbisara, “Ne, eteudde apan sarun mariaddi! MAWU buatte na'ola'a manga nabin Tuangnga nangawusu si Tuangnga ana waugu MAWU buatte nanantunna mandantan asasilaka si Tuangnga!”

²³Ne i Nabi Zedekia niumamatte nangundanin Mikha ana see namero hatine wuṛṛu nabbisara, “Tawe mariaddi Ghaṛṛahon MAWU manantangku wuṛṛu ana see maggahattonu?”

²⁴Mikha sinumimbakka, “I'o sarun maasilo sutempo i'o sumutta ma'imbuni sulal᷊ummu wabbo'a!”

²⁵“Sametta i tou!” parentan ratu Ahab, “wuṛṛu apira'a i tou ringanni Amon, tembonannu soa, wuṛṛu ringannu Pangeran Yoas.

²⁶Doloṛṛa'a i mangitou mantaṛṛon Mikha sulal᷊ummu tattupanna, wuṛṛu mangonggolu anna paadio'a ma'oman sara i ya'u mabelengnga ringannu sal᷊amatta.”

²⁷Mikha nabbisara, “Amungkangu i Tuangnga mabelengnga ringannu sal᷊amatta, udde atappasanne manungku MAWU tawe nabbisara si ya'u. Sarangkanambone apan uasemodda indi maola'a matatialane.”

²⁸Wua'udde i Ahab ratun Israel, wuṛṛu i Yosafat ratun Yehuda inaite namangalo soa Ramot su Gilead.

²⁹Ahab nabbisara si Yosafat, “I ya'u sarun mamal᷊u hati wuṛṛu inai lai mapapangalo, arawe i'o sidutu palluṛṛen laubbu araratuannu.” Etearoddi ratun Israel namal᷊u hati sutempo i tou inaite napapangalo.

³⁰Sutempo udde tembonannu tantaran keretan pangalon Siria buatte niparentannu ratune tumba'u iapapangalo ratun Israel.

³¹Nariaddi sutempo i mangitou naasilo si Ratu Yosafat, i mangitou sarangkanambone nassunna manungku i tou ratun Israel. Ana waugu udde i mangitou namangalo si tou. Arawe i Yosafat nangintul᷊i, ne MAWU Ruata nangontolla si tou, wuṛṛu nangapiddu pangalo udde su lal᷊anna waine.

³²Napawe tembonannu tantaran keretan pangalon Siria naatutukka manungku udde wal᷊ine ratun Israel, i mangitou tate namangalo si tou.

³³Ringannu tawe nipattatudda, sangkatou tantaran Siria namiti'u anaanne ringannu walate apitingnge. Arawe anaanna udde naṛṛino si Ahab su laubbu pangalone su passampaannu pananabi'anne. “I ya'u niaṛṛinoanne!” aintul᷊in Ahab su mangangapiddu keretane, “Wal᷊eṛṛoa'a wuṛṛu tal᷊anga'a i ya'u wuassu tampan pangalo!”

³⁴Arawe ana waugu pangalo ta'e ammahane, i Ratu Ahab sidutu ta'e uarisikka lapiddu sasenganna sulal᷊ummu keretane uasaruanna tantaran Siria. Sutempo matannallo nattuppa i tou natete.