Read Talaud 2 TAWARIKH 20 Bible Online

2 TAWARIKH 20 - Talaud bible

2 TAWARIKH 20

¹Manga pira tempo wua'udde tantaran Moab wuassu Amon, susambau ringannu hawen mangitou tantaran Meunim, namangalo Yehuda.

²Ne nirumantate taumata uaapiddu watti'a indi si Ratu Yosafat, “Tumaniten manambo tantaran Edom nirumanta wuassu samba'an tahal᷊oangnga Nate mamangalo si Tuangnga. I mangitou napangaṛṛote soa Hazezon-Tamar.” (Hazezon-Tamar eteudde aranne waine wuassu soa En-Gedi.)

³Yosafat nata'utte ana see i tou inumal᷊iomante naddorongnga tatantiro wuassu MAWU. Wua'udde i tou namarenta tadea'u lal᷊oṛṛon soa sarangkanambone mappuasa.

⁴Wuassu suapan soa su Yehuda, taumata inaite watukku Yerusalem maiontolla su MAWU.

⁵I mangitou suadio'a ringannu tumana'u Yerusalem naammulla su rallakka wakku su Wal᷊en MAWU. Ratu Yosafat uarisikka su saruanni mangitou,

⁶wuṛṛu inumal᷊iomanna ringannu tingikka ma'ikkatta, “Oh MAWU, Ruatan al᷊amonan kami! I'o Ruata su surga wuṛṛu uaparenta anambon walahanna su runia. I'o mataṛṛino wuṛṛu matohassa; tawe saran sangkatou apan wotongnge lumawangnga Si'o.

⁷Tumba'u I'o Ruatan kami. Sutempo al᷊aṛanang-Ngu, walahannu Israel, nirumanta su wanua indi, I'o nallimbuakka manga taumata apan sutempo udde uatana'a isindi. Ana see I'o nangonggolu wanua indi su papapulunni Abraham, hawe-Nu, maola'a leta'a pussa'an mangitou saran mal᷊annu-l᷊annu.

⁸I mangitou natana'e isindi wuṛṛu napararisikku sambau wal᷊en tampa pasasubbanna Si'o. I mangitou masingkatta

⁹manungku amungkangu i mangitou iṛṛuumanna ana waugu rosan mangitou, wuṛṛu i mangitou naṛṛiaannu pangalo, sa'itta, ara'e ṛutumma, i mangitou wotongnge rumanta ringan-Nu, wuṛṛu rumarisikka su saruannu wal᷊en patataṛamawuanna indi. Sulal᷊ummu asasusan mangitou, i mangitou wotongnge umal᷊iomanna Si'o, wuṛṛu I'o sarun maddaringikka wuṛṛu umontolla si mangitou.

¹⁰Orassa indi walahannu Amon, Moab wuṛṛu Edom mammangalo si yami. Sutempo al᷊amonan kami nirumanta wuassu Mesir, I'o tawe namalan mangitou mamanua su wanuan manga walahanna udde. Ne al᷊amonan kami nanganu lal᷊anna namal᷊iwutta wuṛṛu tawe namate walahannu Amon, Moab wuṛṛu Edom udde.

¹¹Orassa indi ete aroddi inolaannu manga walahanna udde si yami. I mangitou maapulu mallimbuakka si yami wuassu wanua apan nionggolu MAWU si yami.

¹²Ete I'o Ruatan kami! Ṛuumana'e i mangitou, ana waugu yami indi inasueanten ikkatta sumaruanna tantara anambone ereudde, apan mammangalote si yami. Yami waggate tanne yami maola'e apa, ana waugu udde yami rumanta ringannu MAWU maiontolla.”

¹³Tantal᷊anna udde anambon esakku Yehuda su sambau ringannu awingnge wuṛṛu al᷊aṛana'i mangitou su Wal᷊en MAWU.

¹⁴Su pattangngannu taumata manambo udde pia sangkatou taumatan Lewi aranne i Yahaziel. I tou ana'i Zakharia wuassu ṛuanganni Asaf sulal᷊ummu akkittu papapulunni Benaya, Yeiel, Matanya. Sutempo udde Yahaziel niasuttannu Ghaṛṛahon MAWU,

¹⁵ne i tou nabbisara, “Tuangnga Apan Mawantuga see lai manga tuṛṛangnga sarangkanambone. MAWU nabbisara manungku i yamiu tawe wotongnge mallome ara'e mata'utta sumaruanna tantara apan manambo udde. Ana waugu apan mapapangalo wal᷊inewe i yamiu, ewe'e Ruata.

¹⁶Tiṛṛabbi sutempo i mangitou sumaate su lal᷊anna uasendekka su Zis, pangaloite i mangitou. I yamiu sarun masasaruanni mangitou su pentakku wawal᷊anne su saruannu wadda'a maranin Yeruel.

¹⁷I yamiu salaiwe lasa'e mapapangalo sulal᷊ummu pangalo indi. Inaite watukku tampa apan buatte nitantunna si yamiu wuṛṛu pallaṛaddote isudde. I yamiu sarun maasilo MAWU mangonggolu auntunganna si yamiu. Ei tumana'u Yehuda wuṛṛu Yerusalem, arie passinggawanga ara'e mata'utta. Suttate sulal᷊ummu pangalo udde, MAWU sarun mantul᷊ungngi yamiu!”

¹⁸Ne i Ratu Yosafat niumal᷊intuddate. Tumanangnge sarangkanambone lai nattanno si tou niumal᷊intudda nassubba MAWU.

¹⁹Ana see manga taumatan Lewi wuassu ṛuanganni Kehat wuṛṛu Korah dirumarisikka, wuṛṛu nilumala'a naddalo MAWU Ruatan Israel.

²⁰Tiṛṛabbine marua allo maṛṛanggapa, tumanangnge sinumabbangnga wuṛṛu inaite watukku wageangngu wadda'a maranin Tekoa. Sutempo i mangitou umamatte, Yosafat nangonggolu tanata indi si mangitou, “Tumana'u Yehuda wuṛṛu Yerusalem! Pangimante MAWU Ruatanu, ne i yamiu sidutu wiakka. Sengkampe tatantiro wuassu manga nabinu, ne i yamiu sarun maasomba hessine!”

²¹Napawe buatte nabbaidda ringannu tumanangnge, ratu nandolokku mangangantari malluṛṛen laubba uasul᷊ungnga apan wiasane tumba'u ilalluṛṛe su lal᷊aghu pangangagama. Mangangantari udde ṛinone uawarissa ringannu maṛṛamaga su saruannu warisannu tantara lapiddu mangngantari, “Paddalote MAWU! Darangngu-Ne tawe panguddusanne!”

²²Sutempo mangangantari manattakke mangantari, MAWU nangal᷊iba'ukku tantaran seetta apan tantal᷊anna mammangalo.

²³Tantaran Amon wuṛṛu Moab namangalo tantaran Edom na'oman sara nasue niawaddo. Wua'udde i mangitou nabbal᷊i'a uapapangalote sangkatou ringannu sangkatou.

²⁴Sutempo tantaran Yehuda na'omate su wal᷊en pandariaganna su wadda'a wuṛṛu ma'immata tampan seetta, i mangitou naasilo manga winal᷊unannu seetta uatal᷊eṛṛongnga su leta'a. Tawe saran sangkatou wuassu tantaran seetta udde apan ta'e wiakka.

²⁵Ne i Yosafat suadio'a ringannu tantarane inaite nangaṛṛo manga saranapan seetta. I mangitou naasangkalla manambo winatangnga papadul᷊iananna, saranapa ipappaatta, laubba wuṛṛu manga saranapa apan maarega waine. Napawe buatte nangammulu manga saranapa udde tallu allo al᷊annune, ta'e manambo lai manga saranapa waine, na'oman sara tinantangke aroddi.

²⁶Su allo aiappane i mangitou sarangkanambone naammulle su Wawal᷊annu daralo wuṛṛu naddalote MAWU ana waugu sarangkanambone apan buatte niolang-Nge. Ana waugu udde wawal᷊anna udde nissago “Daralo”.

²⁷Ana see i Yosafat namiaṛṛa'u anambon tantara napul᷊e watukku Yerusalem ringannu lulluassa ana waugu MAWU buatte namaddon seetti mangitou.

²⁸Napawe na'omate su soa, i mangitou nabbarisse watukku Wal᷊en MAWU ringannu tingikku kecapi wuṛṛu trompeta.

²⁹Anambon araratuanna waine nata'utta napawe naaringikka ereapa MAWU namaddon manga seettu Israel.

³⁰Ana waugu udde i Yosafat namarentate ringannu matammudda, wuṛṛu MAWU nangonggola si tou paddarame su ahewallu wanua.

³¹Yosafat naola'a ratun Yehuda sutempo uukke 35 su tonnane, wuṛṛu i tou uaparenta su Yerusalem 25 su tonnane al᷊annune. Inangngene eteudde i Azuba ana'i Silhi.

³²Ere lai i Asa iamangnge, Yosafat buatte na'ola'a apapia su aellegu MAWU.

³³Arawe manga tampa pasasubbanna paal᷊uanna tawe nihohakki Yosafat. Tumanangnge taambe lai ringannu ahewallu naungnga massubba Ruatan al᷊amonan mangitou.

³⁴Watti'a waine su ola'i Yosafat, wuassu panattaṛanne maddatingngu panguddusannu pamamarentane, niwoṛṛetta sulal᷊ummu Watti'i Yehu Ana'i Hanani, apan uawoṛṛetta sulal᷊ummu wuken Watti'u Manga Ratun Israel.

³⁵Su sambau tempo i Yosafat ratun Yehuda na'ola'a paa'aukku paggahawe ringanni Ahazia ratun Israel, apan na'ola'a manambo al᷊al᷊eo.

³⁶Su tatul᷊iannu Ezion-Geber i mangitou nallanginnu manga apalla passenggotanna watukku Tarsis.

³⁷Arawe Nabi Eliezer ana'i Dodawa wuassu soa Maresa napaanaungngi Yosafat, wisarane, “Ana waugu i Tuangnga na'ola'a paa'aukku paggahawe ringanni Ahazia, MAWU sarun makkimunsa'a manaran Tuangnga.” Ne manga apalla apan buatte nilanginni mangitou nahohakke na'oman sara tate napassenggota.