Read Talaud 2 TAWARIKH 22 Bible Online

2 TAWARIKH 22 - Talaud bible

2 TAWARIKH 22

¹Sulal᷊ummu sambau pangalon ammul᷊annu taumatan Arab, anambon ana'i Yehoram esakka ringanna nipate, nallambe i Ahazia iapa atuarianne. Ana waugu udde tumana'u Yerusalem nanenegi Ahazia naola'a ratu pinallol᷊ossa iamangnge.

²Ahazia naola'a ratu sutempo uukke 22 su tonnane, wuṛṛu i tou namarenta su Yerusalem santonna al᷊annune. Ahazia lai mabbiakka ere amonanni Ratu Ahab, ana waugu Atalya inangngene mangngaṛṛa'a si tou tadea'u ma'ola'a al᷊al᷊eo. Atalaya eteudde sangkatou maṛṛuala ana'i Ratu Ahab, pulunni Omri ratun Israel.

⁴Ahazia na'ola'a rosa su lantakku hatin MAWU, ere lai amonanni Ahab, ana waugu ete i mangitou udde mangangaṛṛange napawe iamangnge natete. Ete manga mangangaṛṛange udde apan naasilaka si tou.

⁵Wuassu al᷊aṛṛa'i mangitou, i tou naammuli Yoram ratun Israel inai mapapangalo mando'appa si Hazael ratun Siria. I mangitou napapangalo su Ramot, leta'a wageangngu Gilead. Yoram nal᷊essa sulal᷊ummu pangalo udde,

⁶ana see i tou nabelengke watukku soa Yizreel ana waugu undamanna, ne i Ahazia inaite nattembo si Yoram poiaroddi.

⁷Ruata buatte nanantunna manungku i Ahazia sarun aratingannu papatene sutempo i tou mattembo si Yoram. Su patatembo udde Ahazia wuṛṛu i Yoram naasomba lal᷊awangnga wuassu sangkatou esakka aranne i Yehu ana'i Nimsi, apan buatte nipilen MAWU iapapate amonanni Ratu Ahab.

⁸Tantal᷊anna i Yehu mappaamattu ṛuumannu MAWU su amonanna udde, i tou nassomban sambau ammul᷊annu tembonannu Yehuda wuṛṛu manga tuṛṛangngi Ahazia apan uatantalongnga lai sulal᷊ummu patatembo udde. Ne i Yehu namate si mangitou sarangkanambone.

⁹Wua'udde i tou nandolokku taumata niaparea'a si Ahazia apan sutempo udde uaimbuni su Samaria. Napawe i Ahazia niasombangante, i tou niapidda ringanni Yehu wua'udde nipate. Salaiwe aroddi i tou nilabbingi mangitou lai ana waugu i mangitou mangngaddata si Ratu Yosafat, iupungnge apan mangngaddata MAWU ringannu ahewallu naungnge. Wuassu amonanni Ahazia tawe saran sangkatou apan wotongnge mamarenta.

¹⁰Napawe i Atalya naasingkatta manungku i Ratu Ahazia anangnge natete, i tou namarenta tadea'u amonannu ratun Yehuda sarangkanambone pateanna.

¹¹Ahazia pia sangkatou tuṛṛangnga wawine aranne i Yoseba apan naawingngu sangkatou imam aranne i Yoyada. Ringannu mal᷊anna-l᷊annabba Yoseba nanganu sangkatou ana'i Ahazia esakka aranne i Yoas wuassu wallatu al᷊aṛṛana'u ratu apan pateanni Atalya. Ana suadio'a ringannu mallal᷊u'adde niwuni sulal᷊ummu sambau wabbo'a su Wal᷊en MAWU. Etearoddi i Yoseba nandalukka ana'a udde na'oman sara tawe niapaten Atalya.

¹²Annummu tonna al᷊annune i Yoas uawuni su Wal᷊en MAWU tantal᷊anna i Atalya uaparenta naola'a sangkatou ratu.