Read Talaud 2 TAWARIKH 23 Bible Online

2 TAWARIKH 23 - Talaud bible

2 TAWARIKH 23

¹Su tonna appitune Imam Yoyada nakkawessa mapapangalo. I tou nanggol᷊agu paaire ringannu siri lima piaṛṛa'u tantara, eteudde, Azarya ana'i Yeroham, Ismail ana'i Yohanan, Azarya ana'i Obed, Maaseya ana'i Adaya, wuṛṛu Elisafat ana'i Zikhri.

²I mangitou inaite watukku anambon soa su Yehuda, wuṛṛu nangammulu manga taumatan Lewi wuṛṛu anambon matatimmadu ṛuanganna ana see nangapiddi mangitou watukku Yerusalem.

³I mangitou naammule su Wal᷊en MAWU, wuṛṛu na'ireten Yoas ana'u ratu udde. Yoyada nabbisara si mangitou, “Eteindi sangkatou esakka ana'i Ratu Ahazia! Orassa indi i tou ṛinone itenega maola'a ratu, ana waugu MAWU buatte naddiandi manungku papapulunni Ratu Daud sidutu sarun uaparenta.

⁴Eteindi apan ṛinone manaranni ite: Napawe manga imam wuṛṛu taumatan Lewi buatte nammanara su allon Sabat, i mangitou imbaṛṛangnga mapul᷊e. Tatallun kawageanganna wuassi mangitou ṛinone lai uariaga su manga ngara wahewalla su Wal᷊en MAWU,

⁵tatallu wageangnge lai su wal᷊en araratuanna, wuṛṛu lambene su Ngara Wahewalla Wantane. Tumanangnge sarangkanambone ṛinone maammula su rallakku Wal᷊en MAWU.

⁶Tawe saran sangkatou apan wotongnge maasutta su Wal᷊en MAWU tumba'u manga imam wuṛṛu taumatan Lewi apan tantal᷊anna uariaga. I mangitou wotongnge sumutta ana waugu i mangitou buatte nipile hunane su MAWU. Manga taumata waine ṛinone uararingikka atorannu MAWU wuṛṛu uaṛṛaddo su liudde.

⁷Manga taumatan Lewi ṛinone uarisikka uapal᷊iwutta ratu ringannu uaagassa hal᷊ele, wuṛṛu ual᷊u'adda ratu suapan amatanne. Isai apan mappandumma sumutta su Wal᷊en MAWU, i tou ṛinone pateanna.”

⁸Parentan Yoyada udde niapaamattu taumatan Lewi wuṛṛu tumana'u Yehuda. Manga taumata apan buatte nammanara su allon Sabat tawe wotongnge mapul᷊e. Nariaddi manga tembonannu tantara wotongnge mandolokku manga taumata apan buatte nammanara ara'e lai wakkute nirumanta mammanara.

⁹Su manga tembonannu tantara udde i Yoyada nattahia wangkau wuṛṛu allungnga pussa'an Ratu Daud apan sasahipunanna su Wal᷊en MAWU.

¹⁰Yoyada lai napariagan taumata ringannu uaaggassa hal᷊ele uapal᷊iwutta su saruannu Wal᷊en MAWU ipandiaga ratu.

¹¹Wua'udde i Yoyada nangapiddi Yoas sinumabbangnga, ana see niluṛeannu araposan araratuanna su puane, wuṛṛu nanantilla si tou wuke Titan Duata Etearoddi i Yoas nitenega naola'a ratu. Wua'udde Imam Yoyada wuṛṛu al᷊aṛanangnge nallal᷊innu lanan lal᷊aghu patatenega si Yoas, ana see anambon taumata nangintul᷊i, “Nabbiakke Ratu!”

¹²Atalya naaringikka tumana'u soa mangngintul᷊i maddalo ratu. I tou mal᷊iha-l᷊ihakka inaite watukku Wal᷊en MAWU suapan taumata manambo uaṛimpulunna.

¹³I tou naasilo ratu apan wakku udde uarisikka su ngara suttannu Wal᷊en MAWU, suapa i tou nitenega, papal᷊iwutannu manga tembonannu tantara wuṛṛu mananiuppa trompeta. Tumana'u soa sarangkanambone mangngintul᷊i lullala'a lapiddu manniuppa trompeta, wuṛṛu manga mananal᷊angnga musikka su Wal᷊en MAWU nilumala'u ramea udde ringannu anambon musikki mangitou. Ringannu naungnga lal᷊eo i Atalya nanggesa'a laubba wuṛṛu nangintul᷊i, “Mandal᷊al᷊eo! Mandal᷊al᷊eo!”

¹⁴Yoyada tawe namalan Atalya pateanna maranin Wal᷊en MAWU, ne i tou nabbisara su manga tembonannu tantara, “Apira'e i tou su liudde sumabbi barisannu mandariaga, wuṛṛu mangke pate amungkangu pia taumata apan maddea'a lal᷊anne manal᷊amatta si tou.”

¹⁵I mangitou nanametta si Atalya, ana see niapidda watukku wal᷊en araratuanna. Poiaroddi i tou nipate su Ngara Wahewan Awal᷊o.

¹⁶Imam Yoyada nangahe si Ratu Yoas wuṛṛu tumana'u soa suadio'a ringanni tou na'ire manungku i mangitou sarun maola'a al᷊aṛṛana'u MAWU.

¹⁷Wua'udde i mangitou sarangkanambone namangalo wuṛṛu nanggohakku passubanna si Baal. Mezbah see lai manga paal᷊uanna niṛṛimunsa'a, wuṛṛu i Matan imammi Balla nipate su saruannu manga mezbah udde.

¹⁸Ana see i Yoyada nandolokku manga imam wuṛṛu taumatan Lewi iapaatokku manara su Wal᷊en MAWU tumuṛṛuttu tahian manara apan buatte niatokki Ratu Daud. I mangitou ṛinone mangonggolu sasamba itattambunna su MAWU — uasul᷊ungngu manga titan Musa — ringannu ramea wuṛṛu manga aantari ere buatte niatokki Daud.

¹⁹Su manga ngara wahewalla su Wal᷊en MAWU, Yoyada napatana'u mandariaga iapataṛṛapa tadea'u taumata apan tawe massubba MAWU imbaṛṛangnga sumutta.

²⁰Manga tembonannu tantara, manga timmaddu wanua, manga mamanaran araratuanna, wuṛṛu tumana'u soa sarangkanambone uatantalongnga si Yoyada mammatuga si Ratu Yoas wuassu Wal᷊en MAWU watukku wal᷊en araratuanna. I mangitou sinumutta wuassu ngara wahewalla paarorone ana see ratu niuma'iante su adderan araratuanna.

²¹Tumanangnge sarangkanambone lullala'a, ne soa mal᷊angngante wuṛṛu i Atalya buatte nipate.