Read Talaud 2 TAWARIKH 24 Bible Online

2 TAWARIKH 24 - Talaud bible

2 TAWARIKH 24

¹Yoas uukke pitu tonna sutempo i tou naola'a ratun Yehuda, wuṛṛu i tou namarenta su Yerusalem 40 su tonnane al᷊annune. Inangngene aranne i Zibya wuassu Soa Bersyeba.

²Su al᷊annune Imam Yoyada ta'e wiakka, inolaanni Yoas sidutu maal᷊uassa naungngu MAWU.

³Yoyada namile ruan katou wawine maola'a awingngi Yoas, wuṛṛu wuassi tarua i Yoas naasomba ana'a esakka wuṛṛu wawine.

⁴Napawe uaparentate manga pira tempo al᷊annune, Yoas nakkawessa mangapia Wal᷊en MAWU.

⁵Manga Imam wuṛṛu taumatan Lewi niprentanne inai watukku manga soa su Yehuda wuṛṛu mangammullu roitta wuassu anambon tumanangnge ipangapia Wal᷊en MAWU suapan tonna. i Yoas nandolokki mangitou ringannu mal᷊ihakka nipamanara manara udde, arawe manga taumatan Lewi mal᷊iwue mammanara.

⁶Ana waugu udde i tou namago si Imam Yoyada, piaṛṛa'i mangitou, ana see nabbisara, “Wal᷊inewe i Musa allangngu MAWU buatte nandolokku tumanangnge iapawaekka wose tadea'u ipangapia Rasannu MAWU? Orassa indi, anio manga taumatan Lewi udde tawe iwata'i papa iapaammulu wose wuassu tumana'u Yehuda wuṛṛu Yerusalem?” (

⁷Manga mallal᷊aṛenggeni Atalya, eteudde wawine lal᷊eo apan buatte nanggohakku Wal᷊en MAWU, wuṛṛu manambo wuassu manga saranapa apan niṛṛae hunan Duata buatte nipaatti mangitou pinassubba si Baal.)

⁸Ne ratu namarenta tadea'u taumatan Lewi mallanginnu sambau pato'an roitta wuṛṛu niaddo su saruannu ngara wahewalla su Wal᷊en MAWU.

⁹Su ahewallu Yerusalem wuṛṛu Yehuda nial᷊iata manungku anambon taumata ṛinone mangapiddu wose su MAWU ere lai buatte nititan Musa.

¹⁰Al᷊iata udde naal᷊uassa naungngu tumanangnge wuṛṛu manga piaṛṛa'i mangitou. Su sambau i mangitou nantaṛṛon doittu wose mangitou sulal᷊ummu pato'a udde.

¹¹Allo-allo pato'a udde iaapiddu manga taumatan Lewi su mamanaran araratuanna ana see parikisanna. Napawe pato'a udde napenete mamamoṛṛettu araratuanna wuṛṛu tepellu Imam Wahewalla napasabbangu roitta ana see pato'a udde niapawelengnga apia su tampane paarorone. Etearoddi i mangitou mammanara miallo-miallo, wuṛṛu manambo atonna roitta niammulla.

¹²Wua'udde napawe ratu wuṛṛu i Yoyada nanantillu roitta udde su manga taumata apan uapiaṛṛa'u taumata mangangapia Wal᷊en MAWU udde. Ana see mangataumata udde namaekka mamameselle, wasen kalu wuṛṛu wasen titta'a iapamanara manara udde.

¹³Ne manga base udde nanattakke mangngapia Wal᷊en MAWU. I mangitou sarangkanambone mammanara aroddi apiane na'oman sara panginsueanne Wal᷊en udde naola'a matohassa wuṛṛu maṛṛansangnga ere paarorone.

¹⁴Napawe manara udde nasuete, wul᷊awanna wuṛṛu sal᷊a'a lambene nitantilla su Ratu wuṛṛu si Yoyada. Ana see wul᷊awanna wuṛṛu sal᷊a'a apan nipaatta pina'ola'a manga saranapa su Wal᷊en MAWU, erenai: saranapa ipappaatta su ipallaghu patataṛṛamawu, sasamba itattambunna, manga lama'a pangadoannu amania, wuṛṛu manga mangko. Su al᷊annune Imam Yoyada ta'e wiakka, sasamba itattambunna sidutu ia'onggola su Wal᷊en MAWU.

¹⁵Yoyada nal᷊al᷊appa uukka mal᷊o'engnga wuṛṛu nate su uukka 130 su tonnane.

¹⁶I tou nilabbinga su labbingu manga ratu su Soan Daud, ipangaregan manga sahadde su Ruata, su Wal᷊en MAWU wuṛṛu su taumatan Israel.

¹⁷Napawe i Yoyada natete, Yoas niasal᷊o'a wuṛṛu niawono'annu manga piaṛṛa'u Yehuda na'oman sara i tou tate lai maddaringikka al᷊aṛṛa'i Yoyada.

¹⁸Ne tumanangnge tate lai mattaṛṛamawu su Wal᷊en MAWU, Ruatan al᷊amonan mangitou, arawe massubbate monganna wuṛṛu paal᷊uannu Asyera. Rosan mangitou udde naasa'u MAWU su tumana'u Yehuda wuṛṛu Yerusalem.

¹⁹MAWU nandolokku manga nabi niapatagu si mangitou tadea'u mabelengnga apia mattaṛṛamawu MAWU, arawe tumanangnge maddirite maddaringikka.

²⁰Ana see Ghaṛṛahon Duata nangintaṛṛo si Zakharia ana'i Imam Yoyada. I Zakharia dirumarisikka su saruannu tumana'u soa, ana see nabbisara, “MAWU Ruata nabbisara, ‘Anio i yamiu maddirite tumuṛṛutta manga parenta-U wuṛṛu manilakate watanganni yamiu sassane. I yamiu tate maddaringikka si ya'u, ne i Ya'u lai tate maddaringikka darorongngi yamiu!’ ”

²¹Arawe awadaalla apan uaammula udde suadio'a ringanni Ratu Yoas mannal᷊are si Zakharia. I tou tate mannaungnga inasaharanna wuṛṛu tatuṛṛutti Yoyada, iamangngi Zakharia. Wuassu parentan datu, Zakharia tinuntungannu watu na'oman sara nate su rallakku Wal᷊en MAWU. Sutempo i tou matete, i Zakharia sinumal᷊ande, “Antimanna MAWU ma'ellega inolaanna indi wuṛṛu mabbal᷊issa!”

²³Tonna udde lai, sutempo watianna mawal᷊ute, tantaran Siria namangalo Yehuda wuṛṛu Yerusalem. I mangitou namate anambon piaṛṛa'a wuṛṛu nallurannu manambo saranapa apan niaṛṛo watukku Damsyik.

²⁴Tantaran Damsyik tumaniten matul᷊ungnga, arawe MAWU namalan mangitou mamaddon tantaran Yehuda apan tumaniten manambo, ana waugu taumatan Yehuda tate maddaringikka MAWU, Ruatan al᷊amonan mangitou. Ringannu olangnge aroddi MAWU nakkuumanni Ratu Yoas.

²⁵Yoas nal᷊essa wahewalla. Napawe tantaran seetta napul᷊ete, ruang katou mamanarane nabbaidda. Itarua mamate si Yoas su tampa atatiil᷊anne ipabbal᷊issa ere lai i tou namate ana'i Imam Yoyada. Ratu Yoas nilabbinga su Soan Daud, arawe tawe su labbingu manga ratu. (

²⁶Manga taumata apan nabbaidda mando'appa si tou eteudde: Zabad ana'i Simeat wawinen Amon, wuṛṛu Yozabad ana'i Simrit wawine wuassu Moab.)

²⁷Watti'a su ola'u al᷊aṛana'i Yoas, su ola'u manga pangginau apan lal᷊eo si tou, wuṛṛu su ola'u ereapa i tou nangapia Wal᷊en MAWU, sarangkanambone uawoṛṛetta sulal᷊ummu wuke Tatal᷊a'a Wuken Mararatu. Amazia, ana'i Yoas, naola'a ratu nallol᷊ossa iamangnge.