Read Talaud 2 TAWARIKH 27 Bible Online

2 TAWARIKH 27 - Talaud bible

2 TAWARIKH 27

¹Yotam naola'a ratu su uukka 25 su tonnane, wuṛṛu i tou namarenta su Yerusalem 16 su tonnane al᷊annune. Inangngene eteudde i Yerusa ana'i Zadok.

²Yotam maal᷊uassa naungngu MAWU, ere lai i Uzia iamangnge. Tumba'u i tou tawe manambunnu amania su Wal᷊en MAWU, ere buatte niola'u iamangnge. Salaiwe aroddi, tumana'u soa sidutu ma'ola'a rosa.

³Ete i Yotam apan na'ola'a Ngara Wahewan Sawannakka su Wal᷊en MAWU, wuṛṛu nanohassa darandungngu Yerusalem su wageangngu leta'a apan isassago Ofel.

⁴I tou napararisikku soa su manga panenteannu Yehuda wuṛṛu manga tanda'a watu see lai manga menara pandiaganna su mahurangnge.

⁵I tou namangalo wuṛṛu namaddon ratun Amon suadio'a ringannu tantarane, ana see namata'u taumatan Amon mammaekka wose. Suapan tonna al᷊annune tallu tonna ual᷊al᷊intuṛṛutta i mangitou ṛinone mamaekku 3.400 su kilone sal᷊a'a, wuṛṛu darua hatin gandumma, sambau-sambau 1.000 ton.

⁶Yotam nabbal᷊i lembon mataṛṛino ana waugu i tou matammudda wuṛṛu matuṛṛutta su MAWU Ruatane.

⁷Manga arariadianna waine sutempo i Yotam uaparenta, manga pangalo wuṛṛu manga aalli Yotam, sarangkanambone buatte niwoṛṛetta sulal᷊ummu wuken Watti'u Mararatun Israel wuṛṛu Yehuda.

⁸Yotam uukke 25 su tonnane sutempo i tou naola'a ratu wuṛṛu i tou namarenta su Yerusalem al᷊annune 16 su tonnane.

⁹I tou nate wuṛṛu nilabbinga su Soan Daud, ana see i Ahas anangnge naola'a ratu nallol᷊ossa si tou.