Read Talaud 2 TAWARIKH 28 Bible Online

2 TAWARIKH 28 - Talaud bible

2 TAWARIKH 28

¹Ahas naola'a ratu sutempo i tou uukke 20 su tonnane, wuṛṛu i tou namarenta Yerusalem 16 su tonnane al᷊annune. I tou tawe nangaṛṛussa pallal᷊agu apan mapia wuassi Ratu Daud, iupungnge, ewe'e inolaanne tawe maal᷊uassa naungngu MAWU.

²I tou mabbiakka naal᷊ihidda manga ratun Israel wuṛṛu nandolokku taumata niapal᷊anginnu manga paal᷊uanni Baal wuassu atta'a,

³ana see nanambunnu amania su Wawal᷊annu Hinom. Ewe'e lai anangnge esakka sassane nionggola maola'a sasamba su monganna, tumuṛṛuttu anaramma lal᷊eo wuassu manga taumata apan buatte nilimbuaṛannu MAWU wuassu wanua Kanaan sutempo taumatan Israel sinumutta su wanua udde.

⁴Ahas nangonggolu sasamba wuṛṛu nanambunnu amania su manga tampa passubbanna monganna su manga wowone wuṛṛu su manga al᷊ungngu aaluanna masindumunna.

⁵Ana waugu i Ratu Ahas na'ola'a rosa, MAWU Ruatane namalan tou niawaddon ratun Siria wuṛṛu lai nangapiddu manambo taumatan Yehuda apan niatawanna niapidda watukku Damsyik. MAWU lai namalan Ahas niawaddon Ratu Pekah ana'i Remalya wuassu Israel, apan sulal᷊ummu allo massallo namate 120.000 tantaran Yehuda apan awaṛṛanianne. MAWU, Ruatan al᷊amonan mangitou namalan sarangkanambone udde nariaddi, ana waugu tumana'u Yehuda tate lai maddaringikka MAWU.

⁷Ana'i Ahas, aranne i Maaseya nipaten Zikhri sangkatou piaṛṛa'u tantaran Israel. I Zikhri lai nipaten Azrikam, mallal᷊u'addu wal᷊en araratuanna, wuṛṛu i Elkana, taumata apangimanannu ratu.

⁸Salaiwe manga taumatan Yehuda sambalahannu walahannu Israel, arawe tantaran Israel nanawanna 200.000 su atoune wawine wuṛṛu al᷊aṛṛana'a, ana see i mangitou niapidda watukku Samaria suadio'a ringannu saranapa niaṛṛo apan tumaniten manambo.

⁹Sangkatou Nabi MAWU aranne i Oded uatana'a su Samaria. Sutempo tantaran Israel nabelengnga uaapiddu taumata niatawanna wuassu Yehuda, Oded naisasomban mangitou sutempo i mangitou sumuttate su soa. I tou nabbisara, “I yamiu buatte namaddon taumatan Yehuda ana waugu MAWU Ruatan al᷊amonanu nasa'ute si mangitou. Arawe MAWU naddaringikka tumaniten maṛṛagissa i yamiu namate tantaran Yehuda udde.

¹⁰Wuṛṛu orassa indi manga taumatan Yerusalem olaante manga allangngi yamiu! I yamiu wagga manungku i yamiu lai narosate su lantakku hatin MAWU Ruatanu?

¹¹Paddaringikka! Manga taumata apan niatawanna indi uddewe manga tuṛṛangngu. Nariaddi i mangitou doloṛṛa'e paapul᷊ea'a. Amungkangu tawe, MAWU sarun masa'u wuṛṛu makkuumanni yamiu.”

¹²Siri appatta matatimmadu Israel, eteudde i Azarya ana'i Yohanam, Berekhya ana'i Mesilemot, Yehizkia ana'i Salum, wuṛṛu Amasa ana'i Hadlai, nilumawangnga lai inolaannu tantara apan napul᷊e udde.

¹³I mangitou nabbisara, “Imbaṛṛangnga mangapiddu manga taumata niatawanna udde inawarendi! I ite narosate su saruannu MAWU, wuṛṛu manga rosan kite tumaniten manambo tadea'u ipakkuumanni ite. Orassa indi yamiu tumba'u na'ola'a sambau inolaanna apan tumba'u maatamba pasasal᷊an kite.”

¹⁴Ne manga tantara udde nanantillu manga taumata apan niatawanna wuṛṛu manga saranapa apan buatte niaaṛṛo su tumana'u soa wuṛṛu su manga piaṛṛa'i mangitou.

¹⁵Ana see siri appata matatimmadde udde nabuatte wuṛṛu napaannu manga taumata niatawanna udde. I mangitou nattahia laubba wuassu saranapa apan buatte niaaṛṛo udde wuṛṛu nionggola su taumata apan mappandumma. I mangitou lai nattahia sapatu, anna wuṛṛu ua'e. Manga taumata niatawanna apan nal᷊essa niundamannu lanan zaitun. Ingana'a ete lome umamatta, niluranna su keledai, ana see anambon taumata niatawanna udde niapidde watukku Yerikho, soan manga punnu alu kurma, tadea'u wotongnge maapule watukku manga ampungngi mangitou su Yehuda. Wua'udde taumatan Israel napul᷊ete su Samaria.

¹⁶Manga taumatan Edom nanattakke apia namangalo Yehuda wuṛṛu nanawanna manambo taumata. Ana waugu udde i Ratu Ahaz naddorongnga si Tiglat-Pileser, ratun Asyur, tadea'u mangonggolu sasumbala.

¹⁸Sutempo udde lai manga taumatan Filistin tantal᷊anna mammangalo manga soa su wageangngu wawal᷊annu wowone samba'a waṛṛatta, wuṛṛu su wageangngu samba'a timukku Yehuda. I mangitou napangaṛṛo soa Bet-Semes, Ayalon wuṛṛu Gederot, see lai soa Sokho, Timna, wuṛṛu Gomzo see lai ampungnga ual᷊indongannu soa tatallu udde ana see namanuate isudde.

¹⁹Ana waugu i Ahas ratun Yehuda nanantangngu MAWU wuṛṛu tawe mamarenta tumanangnge ringannu mapia, ne MAWU nandantan asasusa su Yehuda.

²⁰Ratun Asyur udde nirumanta wal᷊inewe massumbala si Ahas ewe'e mapasusan Ahas.

²¹Nal᷊are i Ahas nanganu wul᷊awanna su Wal᷊en MAWU, su wal᷊en araratuanna, wuṛṛu su manga wal᷊en piaṛṛa'u tumanangnge, ana see tinantilla si ratun Asyur. Arawe udde lai tawe gunane si tou.

²²Sulal᷊ummu tempo apan masuṛṛippita udde, i Ahas ewe'e lai aatambanna rosane su saruannu MAWU.

²³I tou nanilaka watanganne wuṛṛu tumanangnge ana waugu nangonggolu sasamba su manga mongannu taumatan Siria apan buatte namaddon tou. I tou maṛṛingidda, “Manga mongannu Siria buatte nassumbala manga ratun Siria, nariaddi amungkangu i ya'u mangonggolu sasamba si mangitou, asinungka i mangitou lai sarun umontolla si ya'u.”

²⁴Wua'udde i tou nanganu anambon saranapa su Wal᷊en MAWU ana see niṛṛimunsa'i tou. Wua'udde i tou naṛṛuuddu ngaran Wal᷊en MAWU, wuṛṛu napararisikku manga mezbah su ahewallu Yerusalem.

²⁵Su al᷊awo'u soa wuṛṛu ampungnga su Yehuda i tou nallanginnu manga tampa passubbanna paal᷊uanna wuṛṛu panambunannu amania su manga mongannu walahanna waine. Ringannu inolaanne udde MAWU Ruatan al᷊amonane nasa'u si tou.

²⁶Watti'a waine su ola'u pamamarentane wuṛṛu pallal᷊agune wuassu panattaṛṛanne maddatingngu panginsueanne niwoṛṛetta sulal᷊ummu wuken Watti'u Mararatun Yehuda wuṛṛu Israel.

²⁷Ahaz natete; wuṛṛu nilabbinga su Yerusalem, arawe wal᷊ine su labbingu manga ratu. Hizkia anangnge esakka naola'a ratu nallol᷊ossa si tou.