Read Talaud 2 TAWARIKH 32 Bible Online

2 TAWARIKH 32 - Talaud bible

2 TAWARIKH 32

¹Napawe i Ratu Hizkia napal᷊iatta'u tatuṛṛunne su MAWU, Sanherib ratun Asyur namangalote Yehuda. I tou namangalo manga soa apan pia tanda'a watune wuṛṛu namarenta tantarane niapaaṛṛo manga saranapa.

²Napawe i Hizkia naasingkatta manungku Sanherib pia pandumma mamangalo Yerusalem,

³i tou suadio'a ringannu mamanaran araratuanne wuṛṛu manga piaṛṛa'u tantarane nakkawessu hatto maṛṛappingnga manga tampan ua'a su liuddu soa pandumanne tadea'u manga taumatan Asyur tawe maasomba ua'e napawe i mangitou ma'omate maranin Yerusalem. Manambo atonna taumata apan niapidda niapaṛṛapingnga anambon al᷊imatan kua'e apan mangngelekka su liuddu soa.

⁵Ana see ratu nanohassa tanda'a watu su soa ringannu nangapia darandunge, napararisikku manga menara al᷊iurosone wuṛṛu na'ola'a manga darandunge waine su liudde. Waine lai i tou nangapia tanda'a watu apan niapararisikka su wowon leta'a apan niombo su samba'a ra'i wageangngu soa Yerusalem tabbe. I tou lai nandolokka niaola'a manambo sambeangnga wuṛṛu allungnga.

⁶I Tou namile manga piaṛṛa'u tantara iapapiaṛṛa'u anambon esakka sulal᷊ummu soa, wuṛṛu nandolokki mangitou maammulla su leta'a mal᷊alangnga su saruannu ngara wahewan soa. Ana see i tou nabbisara si mangitou,

⁷“Paatammudde wuṛṛu pangimante; arie paata'uttu ratun Asyur ara'e tantarane. I ite mattohasanna wuassi mangitou.

⁸I tou uatahuanna atatohassu taumata, arawe i ite uatahuanna MAWU Ruatan kite iapasumbala i ite mapapangalo.” Naaringikka manga wisaran ratun mangitou, tumana'u soa nabbal᷊ite waṛṛani.

⁹Manga pira tempo wua'udde napawe i Sanherib wuṛṛu tantarane ta'e su Lakhis, i tou nandolokku daroloṛanna inai ringanni Hizkia wuṛṛu tumana'u Yehuda su Yerusalem iapapasingkattu tanata indi,

¹⁰“I ya'u Sanherib ratun Asyur, indi'o maiwal᷊o anio i yamiu aroddi awaṛṛanine sidutu uatana'a su Yerusalem apan tantal᷊anna pappangaloanna indi.

¹¹Apa i Hizkia mabbisara manungku MAWU Ruatanu sarun mamallossi yamiu wuassu taṛṛinon kami? Arie pangimanna, ana waugu i tou tumba'u mammahia si yamiu. I tou sarun mamalang kamiu mate amal᷊unusanna wuṛṛu marou.

¹²Ete i tou apan manggohakku manga tampan patataṛṛamawuanna wuṛṛu manga mezbah MAWU, ana see mandolokku taumatan Yehuda wuṛṛu Yerusalem mattaṛṛamawu wuṛṛu manambunnu amania tumba'u su mezbah sambau.

¹³Apa i yamiu wagga sarangkanambone apan buatte ta'u niola'a wuṛṛu niola'u al᷊amona'u su saruannu mangawalahanna waine? Taambe saran paassa manga mongannu walahanna waine namallossu pabbawalage wuassu taṛṛinon ratun Asyur!

¹⁴Isai wuassi mangitou apan buatte na'ola'a olangnge udde? Tawe mariaddi monganni yamiu wotongnge maasal᷊amatta si yamiu!

¹⁵Arie pabbala'a ratunu udde mamahia wuṛṛu mamoddo si yamiu! Arie pangimanna si tou! Ana waugu taambe saran paassa mongannu al᷊awo'u walahanna wotongnge mamallossu walahanne wuassu taṛṛinon ratun Asyur. Wuṛṛu mongannu udde lai tawe maapallossi yamiu!”

¹⁶Ta'e lai manambo manga wisara waine apan niwisaran manga daroloṛṛannu ratun Asyur udde ipanggal᷊usa'a MAWU Ruata wuṛṛu si Hizkia, allangngu MAWU udde.

¹⁷Ratun Asyur namoṛṛettu suratta lai apan lullawangnga MAWU, Ruata apan sassubbannu taumatan Israel. Arendi tingikku suratta udde, “Manga mongannu al᷊awo'u walahanna waine apan tawe maapallossu walahanne wuassu taṛṛino'u, aroddi lai monganni Hizkia udde tawe maapallossu walahanne wuassu taṛṛino'u.”

¹⁸Manga daroloṛṛanni ratun Asyur mangngintul᷊i wisara sarangkanambone udde sulal᷊ummu sasinaukku Ibrani tadea'u ipammata'utta wuṛṛu ipangngadio'a naungngu taumatan Yerusalem apan roso uariaga su darandungngu soa, tadea'u i mangitou wotongnge mapangaṛṛo soa udde ringannu mal᷊uassa.

¹⁹I mangitou uahahatton ola'u Ruata apan sassubbanna su Yerusalem ere lai su ola'u manga mongannu walahanna waine, eteudde manga paal᷊uanna apan nilanginnu liman taumata.

²⁰Ne niumal᷊iomante i Ratu Hizkia wuṛṛu Nabi Yesaya ana'i Amos. Itarua sussal᷊ande maddorongnga aontolla wuassu Ruata.

²¹Ana see MAWU nandolokku sangkatou mala'ekatta apan niapapate manga tantara wuṛṛu manga tembonannu tantaran Asyur udde. Ringannu tumaniten nasili ratun Asyur nabelengke watukku wanuane. Su allo sambau sutempo i tou tantal᷊anna sulal᷊ummu wal᷊en monganne, siri pira manga anangnge sassane nirumanta namate si tou ringannu hal᷊ele.

²²Etearoddi olangnge MAWU namallossi Ratu Hizkia wuṛṛu tumana'u Yerusalem wuassu tarṛinon Sanherib ratun Asyur, wuṛṛu wuassu manga seetti mangitou waine. MAWU nangonggola si mangitou mabbiakka mal᷊angnganna taweddu manal᷊are wuassu manga araratuanna su al᷊indonganni mangitou.

²³Manambo taumata nirumanta watukku Yerusalem uaapiddu sasamba su MAWU wuṛṛu manga aonggola si Hizkia, na'oman sara nanattakka orassa udde i tou aaddatannu anambon walahanna.

²⁴Iraṛṛangngo sutempo udde i Ratu Hizkia nirumadda'a. Raddangnge aroddi ahewalle na'oman sara i tou maraniten mate. I tou niumal᷊iomanna, ne MAWU nangonggolu tatiala si tou manungku i tou sarun mapia wuassu raddangnge.

²⁵Arawe ana waugu i tou mawunga, i tou tawe naadiangkamanna su apapia apan buatte nionggolu MAWU si tou. Ana waugu' udde MAWU nasa'u su Yehuda wuṛṛu Yerusalem.

²⁶Arawe panginsueanne i Hizkia wuṛṛu manga taumatan Yerusalem sinumallungngu watanganne, ne su al᷊annune i Hizkia ta'e wiakka ṛuumanna udde sidutu iapaamatta.

²⁷Ratu Hizkia nabbal᷊i tumaniten ala, wuṛṛu aadatannu anambon taumata. I tou na'ola'a manga wabbo'a pangangadoannu paa'alane eteudde: Wul᷊awanna, sal᷊a'a, manga watun permata, rampa-rampa, allungnga wuṛṛu manga saranapa maarega waine.

²⁸I tou lai pia manga wal᷊ingkakka pangangadoannu hessin sinuananne eteudde: ganduma, anggore, wuṛṛu lanan zaitun; see lai tandu'u manga sapi wuṛṛu manga dombane apan tumaniten manambo.

²⁹Waine wua'udde lai i tou namangunna manambo soa. Paa'ala apan nionggolu Ruata si tou mangke aroddi anambone.

³⁰Ete i Ratu Hizkia udde apan nakkapingnga al᷊imatan ua'en Gihon, wuṛṛu ua'ene niapaelekka sulal᷊ummu leta'a watukku soa Yerusalem. Sarangkanambone apan niola'i Hizkia pia batukke.

³¹Wuṛṛu sutempo manga daroloṛṛanna wuassu Babel nirumanta naiwal᷊o si tou su ola'u apapiane apan maatiangnga, MAWU namalan Hizkia mangatokka sassane, tadea'u wotongnge manaṛṛassidda naungnge.

³²Watti'a waine su ola'i Ratu Hizkia, wuṛṛu su ola'u darangngune su MAWU, niwoṛṛetta sulal᷊ummu wuken Sondappa Wuassu Ruata si Nabi Yesaya Ana'i Amos, wuṛṛu sulal᷊ummu wuken Watti'u Mararatun Yehuda wuṛṛu Israel.

³³I Hizkia nate, ana see nilabbinga su wageangnge leta'a uasendekka tampa labbingu manga ratu. Tumana'u Yehuda wuṛṛu Yerusalem sarangkanambone nangonggolu aaddata apan nangilembo si tou sutempo i tou nate. Manasye anangnge naola'a ratu nallol᷊ossa si tou.