Read Talaud 2 TAWARIKH 36 Bible Online

2 TAWARIKH 36 - Talaud bible

2 TAWARIKH 36

¹Tumana'u Yehuda namile wuṛṛu nanenegi Yoahas naola'a ratu su Yerusalem nallol᷊ossa si Yosia, iamangnge.

²Uukki Yoahas 23 su tonnane sutempo i tou naola'a ratun Yehuda, wuṛṛu i tou namarenta su Yerusalem 3 wul᷊anna al᷊annune.

³Nekho ratun Mesir nanametta wuṛṛu nangapiddi Yoahas watukku Mesir, ana see i tou nandolokka tadea'u Yehuda mamaekka wose anambone 3.400 su kilone sal᷊a'a wuṛṛu 34 su kilone wul᷊awanna. Wua'udde i tou nanenegi Elyakim tuṛṛangngi Yoahas naola'a ratu, wuṛṛu namal᷊u aranni Elyakim nabbal᷊i Yoyakim. Wua'udde i Yoahas niapidde watukku Mesir.

⁵Yoyakim uukke 25 su tonnane sutempo i tou naola'a ratun Yehuda, ne i tou namarenta su Yerusalem 11 su tonnane al᷊annune.

⁶Sutempo i Nebukadnezar ratun Babel naapangaṛṛo Yehuda, i tou nanametta si Yoyakim wuṛṛu niapidda ṛaṛṛapusanna watukku Babel.

⁷Sangkawageanganna manga saranapa apan maarega su Wal᷊en MAWU niapiddi Nebukadnezar wuṛṛu sinahipunna su wal᷊en araratuanne su Babel.

⁸Watti'a waine su ola'i Yoyakim, nasutta lai manga inolaanne apan maṛṛagissa wuṛṛu manga al᷊al᷊eone, buatte niwoṛṛetta sulal᷊ummu wuke Watti'u Mararatun Israel wuṛṛu Yehuda. Yoyakhin anangnge naola'a ratu nallol᷊ossa si tou.

⁹Yoyakhin uukke 18 su tonnane sutempo i tou naola'a ratun Yehuda, wuṛṛu i tou namarenta su Yerusalem 3 wul᷊anna 10 allo al᷊annune. I tou na'ola'a rosa su lantakku hatin MAWU.

¹⁰Su panggahanti tonna, i Ratu Nebukadnezar nangapidi Yoyakhin watukku Babel naola'a sangkatou taumata niatawanna, wuṛṛu manga saranapa maarega su Wal᷊en MAWU niapiddi tou lai. Wua'udde i Nebukadnezar namile si Zedekia, tuṛṛangngu iamangngu i Yoyakhin, naola'a ratu su Yehuda wuṛṛu Yerusalem.

¹¹Zedekia uukke 21 su tonnane sutempo i tou naola'a ratun Yehuda. I tou namarenta su Yerusalem 11 su tonnane al᷊annune.

¹²I tou lai na'ola'a rosa su MAWU Ruatane. I tou maddiri sumallungngu watanganne wuṛṛu tawe tumuṛṛutta si Nabi Yeremia apan mammasingkattu tanatan MAWU si tou.

¹³Ratu Nebukadnezar buatte namata'i Zedekia massalu ringannu arannu Ruata manungku i tou sarun matuṛṛutta si Nebukadnezar. Arawe wua'udde i Zedekia namangalo si Nebukadnezar. Zedekia mangke tawe mangimanna MAWU, Ruatan Israel. I tou maddiri manantangngu manga rosane wuṛṛu maddiri mabelengnga ringannu MAWU.

¹⁴Wal᷊ine wua'udde lai, Wal᷊en MAWU apan buatte niṛṛaen MAWU sassane hunan Tou, nil᷊al᷊eon manga piaṛṛa'u Yehuda, manga imam, wuṛṛu tumanangnge, ana waugu i mangitou lai suadio'a massubba paal᷊uanna wuṛṛu nangaṛṛussa ola'u pabbiaṛṛanna apan maarosa wuassu walahanna apan ual᷊indonganni mangitou.

¹⁵MAWU, Ruatan al᷊amonan mangitou, masokkate mandolokku daroloṛṛanne mapanaungngu al᷊aṛanang-Nge, ana waugu i Tou marangngu si mangitou wuṛṛu su wal᷊e-Ne.

¹⁶Arawe i mangitou mannalangnga manga daroloṛṛannu Ruata udde, wuṛṛu lullagen manga nabi-Ne see lai tawe maddaringikka manga wisara-Ne. Panginsueanne MAWU aroddi nasa'u si mangitou na'oman sara tate dal᷊anna sabbanganni mangitou tadea'u mapallossa wuassu ṛuuman-Ne.

¹⁷MAWU nangal᷊oren naungngu ratun Babel tadea'u mamangalo si mangitou. Ratu udde namate taumatan Yehuda apan ta'e saṛṛen tumuwo, nasutta lai i mangitou isudde su Wal᷊en MAWU. I Tou niumakkannu saran sangkatou, mawae ete timmadde ara'e dario'a, esakka ara'e wawine, mapia ara'e maradda'a. I mangitou sarangkanambone tinatillu Ruata su ratun Babel.

¹⁸Manga aola'u Wal᷊en MAWU wuṛṛu manga saranapane apan maarega, see lai paa'alan ratu wuṛṛu manga mamanaran araratuanne, sarangkanambone niaṛṛon ratun Babel udde ana see niapidda watukku Babel.

¹⁹I tou nanggohakku darandungngu soa Yerusalem, wuṛṛu nanoṛṛobba soa udde, nasutta lai Wal᷊en MAWU wuṛṛu wal᷊en araratuanna suadio'a ringannu manga saranapa maarega apan ta'e sulal᷊ummu wal᷊en araratuanna udde.

²⁰Tumanangnge apan ta'e wiakka niapidde watukku Babel. Poiaroddi i mangitou nabbal᷊i allangnge wuṛṛu allangngu papapulunne naddatingngu tempon araratuannu Persia mamarenta.

²¹Etearoddi natipusse sarangkanambone apan niwisaran MAWU si Yeremia manungku wanua udde sarun maola'a wanua lol᷊okka 70 su tonnane al᷊annune apan maola'a lal᷊anna'u manga allon Sabat apan tawe ilaghu.

²²Su tonna paarorone sutempo i Kores uaparenta, ratun Persia, MAWU nanipussu sarangkanambone apan buatte niapasingkan-Ne si Nabi Yeremia. MAWU nangal᷊oren naungngi Kores tadea'u mapasabbangngu sambau parenta apan iwasa su ahewallu araratuanne. Tingikke arendi:

²³“Eteindi parentan Kores, ratun Persia! I ya'u buatte nitenegu Ruata uataṛṛino su surga mabbal᷊i ratu su ahewallu runia, wuṛṛu nandolo'u niapaola'a wal᷊e-Ne su Yerusalem su leta'u Yehuda. Nariaddi, i yamiu sarangkanambone apan nabbal᷊i al᷊aṛṛana'u Ruata ṛinone mabelengnga poiaroddi! Antimanna MAWU Ruatanu mallu'adda si yamiu.”