Read Talaud 2 TAWARIKH 7 Bible Online

2 TAWARIKH 7 - Talaud bible

2 TAWARIKH 7

¹Napawe i Ratu Salomo buatte niumal᷊iomanna, putungnga niumonto'a wuassu langitta nanutungnga manga sasamba apan nionggola su MAWU. Ana see semakku darantan MAWU namene Wal᷊en MAWU udde,

²na'oman sara manga imam tawe naasutta.

³Sutempo tumana'u Israel naasilo putungnga niumonto'a wuassu langitta wuṛṛu semakku darantan MAWU namane Wal᷊en MAWU, i mangitou niumal᷊intudda ana see nassubba lapiddu naddalo Ruata, ana waugu i Tou mapia wuṛṛu darangngu-Ne saran mal᷊annu-l᷊annu.

⁴Wua'udde i Ratu Salomo wuṛṛu anambon taumata apan uaammulla isudde nangonggolu sasamban su MAWU.

⁵Su sasamban paddarame i Salomo nangonggolu 22.000 sapi wuṛṛu 120.000 domba. Etearoddi ratu wuṛṛu tumanangnge sarangkanambone nallaghu pananantillu wal᷊en patataṛṛamawuanna udde su MAWU.

⁶Manga imam uarisikka su tampane apan tinantunna si mangitou; uasasaruannu taumatan Lewi apan tantal᷊anna maddalo MAWU ringannu mannalangnga musikka apan nilanginni Ratu Daud, lapiddu mangngantari aantari “Darangngu-Ne saran mal᷊annu-l᷊annu!” uasul᷊ungngu ere buatte nirolokki Daud. Manga imam nattiuppa trompeta tantal᷊anna tumanangnge sarangkanambone uarisikka.

⁷Ana see rallakka su wageangngu tangngane apan uasasaruannu wal᷊en patataṛṛamawuanna udde nitantilli Salomo su MAWU. Wua'udde i tou nangonggolu sasamba itattambunna isudde, sasamba gandumma wuṛṛu tawan binatangnga maola'a sasamban paddarame. Sarangkanambone udde nionggoli tou isudde ana waugu mezbah witu'a apan buatte niolangnge tawe pa'ionannu anambon sasamba udde.

⁸Salomo wuṛṛu anambon ṛuangannu Israel na'ola'a ramea Sabbuan Rongnga al᷊annune pitu allo. Tumaniten manambo taumata apan naammulla su ramea udde. I mangitou nirumanta wuassu wanua araune sara Lal᷊annu Hamat su sawannakka naddatingngu passarannu Mesir su timukka.

⁹Pitu allo al᷊annune i mangitou uaammulla su ipallaghu patatenegu mezbah MAWU, wua'udde pitu allo lai su ramea Sabbuan Rongnga. Su allo panginsueanne niola'a ramea panguddusanne,

¹⁰wuṛṛu tiṛṛabbine, su allo 23 wul᷊anna appitune, Salomo nandolokku manga taumata udde niapaapul᷊e. I mangitou lulluassa su sarangkanambone apan mapia apan buatte niola'u MAWU su walahannu Israel al᷊aṛanang-Nge, si Daud wuṛṛu si Salomo.

¹¹Napawe i Salomo nuddusse nandararisikku Wal᷊en MAWU wuṛṛu wal᷊en ratu ere buatte nihol᷊age,

¹²MAWU naipasilon batangan-Ne apia si tou sutempo ṛabbi. MAWU nabbisara si tou, “Aal᷊iomannu buatte niraringiṛang-Ku wuṛṛu i Ya'u namarimmatu Wal᷊en indi maola'a tampa apan apianne pangonggol᷊annu sasamba si Ya'u.

¹³Amungkangu i Ya'u tawe manossokku uranna ara'e i Ya'u mandolokku saṛṛappalanna iapainsue manga sasuanna ara'e mandantan saidalu su al᷊aṛṛana-U,

¹⁴ana see al᷊aṛana-U apan nappaattu arang-Ku udde sumallungngu watanganne, wuṛṛu umal᷊iomanna ana see rumanta ringang-Ku wuṛṛu manatangngu inolaanni mangitou apan lal᷊eo, ne wuassu surga i Ya'u sarun maddaringikka aal᷊iomanni mangitou. I Ya'u sarun mangampungnga manga rosan mangitou wuṛṛu ma'ola'a wanuam mangitou su lal᷊umana'a apia.

¹⁵I Ya'u sidutu ual᷊u'adda Wal᷊e-U indi wuṛṛu uasaddia maddaringikka anambon aal᷊iomanna apan iradduitta wuassu tampa indi.

¹⁶Sarangkanambone udde sarun Ta'u olaanna ana waugu tampa indi buatte Ta'u nipile wuṛṛu Ta'u niṛṛae maola'a tampa patataṛṛamawuanna si Ya'u saran mal᷊annu-l᷊annu. I Ya'u sarun ma'ellega wuṛṛu mallu'adda su al᷊o'engngu tempo.

¹⁷Amungkangu i'o, ere i Daud iamangngu, mabbiakka tuttuṛutta apulu-U wuṛṛu mappaamattu manga tita-U wuṛṛu ma'ola'a sarangkanambone apan niparenta-U si'o,

¹⁸ne i Ya'u sarun manipussa paaire-U si iamangngu Daud manungku sidutu pia sangkatou wuassu papapulunne apan maola'a ratun Israel.

¹⁹Arawe amungkangu i'o wuṛṛu tumanangngu lumawangnga manga tita wuṛṛu manga parenta-U, see lai massubba mawu waine,

²⁰ne i Ya'u sarun mapasabbangngi yamiu wuassu wanua apan buatte Ta'u nionggola si yamiu. I Ya'u lai sarun manantangngu wal᷊en indi apan buatte Ta'u niatokka maola'a tampa patataṛṛamawuanna si Ya'u. Su al᷊awo'u tampa wal᷊en indi sarun al᷊uandahanna wuṛṛu ilallage.

²¹Wal᷊en patataṛṛamawuanna orassa indi mangke aaddatanna, arawe sutempo udde suapan taumata apan sumabbi isudde sarun tumiangnga maasilo. I mangitou sarun mabbisara, ‘Anio MAWU na'ola'a aroddi su wanua wuṛṛu su wal᷊en indi?’

²²Ana see taumata sarun sumimbakka, ‘Ana waugu i mangitou nanantangngu MAWU, Ruatan mangitou, apan buatte nangapiddu al᷊amonan mangitou sinumabbangnga wuassu Mesir. I mangitou massubba wuṛṛu naddiandi tuttuṛutta su manga mawu waine. Ana waugu udde MAWU nandantan asasilaka indi si mangitou.’ ”