Read Talaud 2 TAWARIKH 9 Bible Online

2 TAWARIKH 9 - Talaud bible

2 TAWARIKH 9

¹Ratun wanua Syeba naaringikka su ola'u i Salomo tinumelengke. Ne i tou nirumanta su Yerusalem manaṛṛasidda si Salomo ringannu aiwal᷊o apan masahadda. I tou nirumanta tatantalongannu manambo taumata wuṛṛu unta apan napene lal᷊uranannu rampa-rampa, watu permata, wuṛṛu wul᷊awanna tumaniten manambo. Sutempo nassombaten Salomo, ratu udde nangapiddu al᷊awo'u aiwal᷊o apan wotongnge asingkatanne.

²Anambon aiwal᷊o udde wotongnge simbaṛṛanni Salomo, tawe saran sambau apan masahadda si tou.

³Ratu nattiala sassane aroddi apandene i Salomo. I tou na'ellega wal᷊en araratuanna apan niola'i Salomo,

⁴atokku manaran manga taumatan araratuanne, wuṛṛu laungnge uasul᷊ungnga see lai wal᷊en mangitou. I tou na'ellega anna apan nisaru, wuṛṛu laubbu manga mangangimbe su andeangnga; i tou na'ellega lai manga sassamba apan nionggoli Salomo su Wal᷊en MAWU. Sarangkanambone udde naatiangnga ratun wanua Syeba wuṛṛu niagukke.

⁵Ne i tou nabbisarate si Ratu Salomo, “Sarangakanambone apan niaringiṛangku su ola'i Tuangnga wuṛṛu apapanden Tuangnga, udde mangke atonna!

⁶Dorone i ya'u tawe mangimanna, arawe napawe i ya'u nirumanta wuṛṛu na'ellega sarangkanambone indi ringannu mata'u sassane, wakkute udde i ya'u nangimanna. Mangke atonna al᷊awo'a apan niaringiṛangku udde taambe naasomba mattangnga wuassu niasiloangku orassa indi. Wutte'e apapande wuṛṛu paa'alan Tuangnga mannamboanna wuassu watti'a apan niapasingkatta si ya'u.

⁷Pal᷊adda apiawe eteapa su manga mamanara apan mangngimbe si Tuangnga wuṛṛu sidutu mammanara ringanni Tuangnga na'oman sara wotongnge maaringikka wuassi Tuangnga sassane al᷊awo'u al᷊aṛa'a apan mapia!

⁸Dalo su MAWU, Ruatan Tuangnga! Ringannu nanenegi Tuangnga naola'a ratu wuṛṛu mammarenta ringannu aran-Ne. I tou napal᷊iatta'a manungku aroddi apiane naung-Nge si Tuangnga. Ana waugu I tou marangngu ṛuangannu Israel wuṛṛu mappandumma tadea'u i mangitou sidutu wiakka, ne i Tou buatte nanenegi Tuangnga maola'a ratun mangitou, tadea'u i Tuangnga wotongnge mappaamattu tita wuṛṛu atatul᷊idda.”

⁹Wua'udde ratun wanua Syeba nanantilla si Salomo manga aonggola apan niapiddi tou, eteudde nilumebbe wuassu 4.000 su kilone wul᷊awanna wuṛṛu manambo lai watu permata see lai manga rampa-rampa. Tate saran paassa lai i Salomo nanengkamma rampa-rampa apan aroddi apiane ere buatte nionggolu ratun wanua Syeba udde si tou. (

¹⁰Mammamanaran Ratu Hiram wuṛṛu mamanaran Ratu Salomo apan uaapiddu wul᷊awanna wuassu Ofir ionggola si Salomo, uaapiddu lai watu permata wuṛṛu alu cendana.

¹¹Alu udde nipaati Salomo niola'a tuaddu Wal᷊en MAWU wuṛṛu wal᷊en araratuanne, see lai niola'a kecapi wuṛṛu gambus nionggola si ngana'a mangangantari. Taambe saran paassa pia ere aroddi su wanua Yehuda.)

¹²Waine wuassu manga aonggola wawal᷊issa apan inanaramanna ia'onggoli Salomo, i Salomo lai nangonggola su ratu wuassu wanua Syeba udde al᷊awo'a apan niroronganne. Wua'udde ratu napul᷊ete watukku wanuane suadio'a ringannu mallal᷊aṛenggene.

¹³Suapan tonna Ratu Salomo mannengkamma maranin 23.000 su kilone wul᷊awanna,

¹⁴taambe lai nireengnga manga wose wuassu taumata ala wuṛṛu mabbawal᷊u'a. Manga ratun Arab see lai manga gubernuren Israel nangonggolu wul᷊awanna wuṛṛu sal᷊a'a si tou.

¹⁵I Salomo nallanginnu 200 su waune allungnga wahewalla wuassu wul᷊awanna nisassalla. Wul᷊awanna apan nipaatta su allungnga sambau udde iraṛṛangngo 7 kilo.

¹⁶I Tou lai nallanginnu 300 su waune allungnga wul᷊awanna apan maradio'a. Wul᷊awanna apan nipaatta su sambau allungnga maradio'a udde iraṛṛangngo 3 kilo, sarangkanambone wuassu wul᷊awanna nisassalla. Manga allungnga udde sinahipunni Salomo su wal᷊en apan aranne Balai Mahurangngu Libanon.

¹⁷Ratu lai nallanginnu sambau adderan araratuanna apan wahewalla wuṛṛu niola'a wuassu gadinga wuṛṛu nilogaṛannu wul᷊awanna tutune.

¹⁸Addera udde pia tata'iakke wuṛṛu su ruan baane pia paal᷊uannu singa. Addera udde lai pia tal᷊attaddu tuadde, annumma, wuṛṛu sambau pangangandangannu ledda apan nioosannu wul᷊awanna. Tampan ledda udde niṛṛaiddu adderane.

¹⁹Su pentakke aiṛṛi wuṛṛu su pentakke aikkatanna suapan tal᷊ataddu tuaddu addera udde pia paal᷊uannu singa — sarangkanambone mapul᷊o dua su waune. Tawe addera aroddi su al᷊awo'u araratuanna su runia indi.

²⁰Anambon tampa pa'inumanni Salomo niola'a wuassu wul᷊awanna, wuṛṛu anambon saranapa su Balai Mahurangngu Libanon niola'a lai wuassu wul᷊awanna tutune. Sutempo i Salomo uaparenta, sal᷊a'a udde tawe aregane.

²¹i Salomo uatahuanna maambo apalla wahewalla apan massenggotta su tahal᷊oangnga mal᷊alangnga, suadio'a ringannu manga apalla tatahuananni Ratu Hiram. Tallu tonna paassa manga apalla mabelengnga uaapiddu wul᷊awanna, sal᷊a'a, gadinga, mangki wuṛṛu manu'a merak.

²²Ratu Salomo maalanna wuṛṛu mappandeanna wuassu al᷊awo'u ratu su runia indi.

²³Anambon ratu maddea'a maisasomban Salomo tadea'u maddaringikka al᷊aṛṛa'a maapande apan nionggolu Ruata si tou.

²⁴I mangitou sambau-sambau nirumanta ringannu uaapiddu aonggola si Salomo. I mangitou nangonggolu manga saranapa sal᷊a'a wul᷊awanna, laubba, lutangnga, rampa-rampa, awal᷊o wuṛṛu domba. Etearoddi tonna ual᷊alol᷊ossa tonna.

²⁵Ratu Salomo lai uatahuanna 4.000 tanda'u awal᷊o wuṛṛu keretane. Awal᷊on pangalone 12.000 anambone. Sambageanganna niaddo su Yerusalem, wuṛṛu lambene su al᷊awo'u soa pangangaddoannu manga keretan pangalone.

²⁶I Tou uataṛṛino anambon ratu su wageangngu leta'a apan uapannatta wuassu Sal᷊ukku Efrat maddatingngu wanua Filistin wuṛṛu passarannu Mesir.

²⁷Sulal᷊ummu tempo i Salomo uaparenta, sal᷊a'a naola'a sambau saranapa wiasa su Yerusalem, ere lai watu, wuṛṛu alu cendana Libanon manambo atonna ere alu ara wiasa.

²⁸Salomo nananatan awal᷊o wuassu Mesir wuṛṛu wuassu waine lai.

²⁹Watti'a waine su ola'i Salomo wuassu panattaṛanne naddatingngu panguddusanne buatte niwoṛṛetta sulal᷊ummu wuke Wa'en Nabi Natan wuṛṛu sulal᷊ummu wuken Papattan Ahia taumatan Silo wuṛṛu sulal᷊ummu wuke Sondappi Nabi Ido, apan namoṛṛettu lai watti'u pamamarentan Yerobeam ratun Israel.

³⁰Appatu pul᷊o su tonnane al᷊annune i Salomo uaparenta su Yerusalem su ahewallu Israel.

³¹Wua'udde i tou natete wuṛṛu nilabbinga su Soan Daud. Ana see i Rehabeam anangnge naola'a ratu nallol᷊ossa si tou.