Read Talaud EZRA 10 Bible Online

EZRA 10 - Talaud bible

EZRA 10

¹Tantalanna Ezra u'al᷊iomanna lapiddu lulluai wuṛṛu mangnga'u rosa su saruannu Wal᷊en MAWU, manambo atonna taumatan Israel naammulla, mawae esakka, aroddi lai wawine wuṛṛu al᷊aṛṛana'a. I mangitou uapal᷊iwutta si tou lapiddu lulluai ma'ikka-ikkatta.

²Wua'udde Sekhanya ana'i Yehiel wuassu wawosoanni Elam, nabbisara si Ezra, “I yami narosate su MAWU ana waugu buatte naawingngu walahanna waine. Salaiwe aroddi apa ta'e pia antimma su Israel.

³Wette i ite massalu su Ruata, manungku i ite sarun mallimbuakka anambon wawine udde suaddio'a ringannu manga anangnge. I yami sarun tumuṛṛutta al᷊awo'u tatantironu see tatantiron manga taumata waine apan mangngaddatta parentan Duata. I yami sarun tumuṛṛutta Titan Duata.

⁴Ete i'o apan sarun mapaamatta. I yami sarun massumbala saran kakeewalle si'o. Pammanarate ringannu matohasa ma'oman sara masue.”

⁵Ne Ezra nanattakke mammanara. I tou nandolokku manga imam tembonanne, manga taumatan Lewi wuṛṛu manga taumatan Israel waine nassalu manungku i mangitou sarun mapaamattu darorongngi Sekhanya udde.

⁶Napawe i mangitou nassalu, Ezra nanantangken saruannu Wal᷊en MAWU wuṛṛu sinumutta su tampa tatanaanni Yohanan ana'i Elyasib wuṛṛu nanaṛṛabbi isudde. I tou maddiri umanna ara'e ma'inumma ana waugu massusa maṛṛingiddu inolaannu manga taumata niwuangnga udde.

⁷Wua'udde nial᷊iata sambau watti'a su ahewallu Yerusalem wuṛṛu Yehuda su anambon taumata napul᷊ete wuassu pamamuanganna, tadea'u maamulla su Yerusalem.

⁸Isai-sai apan tawe nirumanta sulal᷊ummu tallu allo, sarun anuanna anambon darotongnge wuṛṛu i tou tate lai iwal᷊i su reengannu tumanangnge. Wasiat udde niwartandannu manga piaṛṛa'u tumana'a.

⁹Napawe tallu allo nal᷊iudde, su allo daruan pul᷊o wul᷊anna assione, anambon taumata esakka apan uatana'a su wageangngu leta'a Yehuda wuṛṛu Benyamin nirumanta watukku Yerusalem wuṛṛu naammulla su rallakku Wal᷊en MAWU. Sutempo udde uranna nangansalla ringannu masassagga. Awadaalla mangngiladdu asasunge hatin banua wuṛṛu ana waugu ammul᷊anna udde tumaniten mahuna.

¹⁰Wua'udde Ezra dirumarisikka wuṛṛu nabbisara si mangitou. I tou nabbisara, “I yamiu narosate wuṛṛu nanamba lai pasasal᷊an Israel ringannu naawingngu wawinen balahanna waine.

¹¹Ana waugu udde, panga'ute rosanu su saruannu MAWU, Ruata sassubannu iupungngu al᷊amonan kite, wuṛṛu pa'ola'e pallalagu apan maal᷊uassa naung-Ne. Panginduaten taumata raho apan uatana'a su wanuan kite wuṛṛu limbuaṛṛete mangaawingngu wawine wuassu walahanna raho udde.”

¹²Manga taumata udde sinumimbakka ringannu ma'ikkatta, “I yami sarun tumuṛṛutta tatantironu.”

¹³Ana see unni mangitou apia, “Arawe apan uasemodda isindi tumaniten manambo wuṛṛu uranna aroddi ahewalle. I yami tawe maataṛṛangnga uarisikka su liudde arendi. Wuṛṛu lai indi wal᷊ine hatto apan wotongnge insueanna sulal᷊ummu allo massallo ara'e dua allo, ana waugu manambo atonna wuassi yami apan nasutta sulal᷊ummu rosa indi.

¹⁴Wala'e manga piaṛṛa'i yami matana'a su Yerusalem wuṛṛu ma'ola'a hatto udde. Ana see suapan taumata su manga soan kami, apan pia awingnge wuassu walahannu raho, ṛinone rumanta sutempo apan buatte nitantunna, suaddio'a ringannu manga piaṛṛa'a wuṛṛu mallaṛṛuungngu soane sambau-sambau. Ringannu aroddi Ruata tate lai masa'u si ite ana waugu hatto udde.”

¹⁵Tawe saran sangkatou napasabbangngu sasal᷊arene su ola'u hol᷊aga udde, tumba'u Yonatan ana'i Asael wuṛṛu Yahzeya ana'i Tikwa, nitambannu ruan katou taumatan Lewi, eteudde Mesulam wuṛṛu Sabetai.

¹⁶Manga taumata niwuangnga apan nawelengke udde sidutu mappaamattu hol᷊aga udde, ana waugu udde Imam Ezra namile manga pira taumata suwallattu manga tembonannu wawosoanna, ana see namaoṛṛettu aranni mangitou. Su allo paarorone wul᷊anna mapul᷊o i mangitou mannattakke maammulla maddea'a manaṛṛassidda hatto udde.

¹⁷Sulal᷊ummu tallu wul᷊anna manansunna i mangitou napanginsuete pamamarikissa su anambon esakka apan buatte naawingngu wawine wuassu walahannu raho.

¹⁸Eteindi arannu manga taumata apan pia awingnge wuassu walahannu raho: Manga Imam, nawoṛṛetta ringannu wawosoanne: Wawosoanni Yesua ringannu manga tuṛṛangnge, manga ana'i Yozadak: Maaseya, Eliezer, Yarib wuṛṛu Gedalya.

¹⁹I mangitou naddiandi sarun manindo awingngi mangitou, ana see i mangitou mangonggollu sasamba domba esakka maola'a sasamba aampungnga rosan mangitou.

²⁰Wawosoanni Imer: Hanani wuṛṛu Zebaja.

²¹Wawosoanni Harim: Maaseya, Elia, Semaya, Yehiel wuṛṛu Uzia.

²²Wawosoanni Pasyhur: Elyoënai, Maaseya, Ismael, Netaneel, Yozabad wuṛṛu Elasa.

²³Manga taumatan Lewi: Yozabad, Simei, Kelaya (isassaggo lai Kelita), Petahya, Yuda wuṛṛu Eliezer.

²⁴Manga mangangantari: Elyasib Manga mandariagga ngara wahewalla su Wal᷊en MAWU: Salum, Telem wuṛṛu Uri.

²⁵Manga taumatan Israel waine: Wawosoanni Paros: Ramya, Yezia, Miyamin, Eleazar, Malkia wuṛṛu Benaya.

²⁶Wawosoanni Elam: Matanya, Zakharia, Yehiel, Abdi, Yeremot wuṛṛu Elia.

²⁷Wawosoanni Zatu: Elyoënai, Elyasib, Matanya, Yeremot, Zabad wuṛṛu Aziza.

²⁸Wawosoanni Bebai: Yohanan, Hananya, Zabai wuṛṛu Atlai.

²⁹Wawosoanni Bani: Mesulam, Malukh, Adaya, Yasub, Seal wuṛṛu Yeramot.

³⁰Wawosoanni Pahat-Moab: Adna, Kelal, Benaya, Maaseya, Matanya, Bezaleel, Binui wuṛṛu Manasye.

³¹Wawosoanni Harim: Eliezer, Yisia, Malkia, Semaya, Simeon, Benyamin, Malukh wuṛṛu Semarya.

³³Wawosoanni Hasum: Matnai, Matata, Zabad, Elifelet, Yeremai, Manasye wuṛṛu Simei.

³⁴Wawosoanni Bani: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai,

³⁸Wawosoanni Binui: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya wuṛṛu Yusuf.

⁴³Wawosoanni Nebo: Yeiel, Matica, Zabad, Zebina, Yadai, Yoel wuṛṛu Benaya.

⁴⁴Anambon taumata udde naawingngu wawine walahannu raho. Ne manga awingnge udde nissindoanna wuṛṛu nilimbuaṛṛanna suaddio'a ringannu manga ana'i mangitou.