Read Talaud EZRA 5 Bible Online

EZRA 5 - Talaud bible

EZRA 5

¹Sutempo udde ruan katau nabi, eteudde Hagai wuṛṛu Zakharia ana'i Ido, mannattakke mabbisara ringannu arannu Ruatan Israel su taumatan Yahudi su Yerusalem.

²Naaringikka wisaran nabi darua udde, Zerubabel ana'i Sealtiel wuṛṛu Yesua ana'i Yozadak lapiddu na'ola'a apia pandararisikku Wal᷊en MAWU su Yerusalem, nilal᷊imannu nabi darua udde.

³Arawe Tatnai, gubernure propinsi Efrat Waṛṛatta, suadio'a ringanni Syetar-Boznai wuṛṛu manga hawen mangitou nasasaṛṛawutta nirumanta su Yerusalem wuṛṛu naiwal᷊o su manga taumatan Yahudi, “Isai nandolokki yamiu napararisikka wuṛṛu manuungngu Wal᷊en Patataṛṛamawuanna indi?”

⁴I mangitou naiwal᷊o lai arannu anambon taumata apan nallal᷊ima mapararisikku Wal᷊en MAWU udde.

⁵Arawe Ruata nandiagga wuṛṛu nallu'adda manga piaṛṛa'u Yahudi udde, na'oman sara taumata lal᷊eo Persia nakkawessa tadea'u tate manal᷊are tantal᷊anna i mangitou taambe nangirimmu suratta si Darius wuṛṛu naasengkamma sasimbakke.

⁶Eteindi aalae apan niiringngi mangitou su Ratu,

⁷“Su saruanni Ratu Darius. Antimanna i Tuangnga mamarenta ringannu mal᷊angnganna!

⁸Daronganna i Tuangnga masingkatta, manungku i yami buatte wuassu propinsi Yehuda wuṛṛu naasilo manungku Wal᷊en MAWU, Ruata Apan Wahewalla, tantal᷊anna a'olaanna apia ringannu manga watu wahewalla wuṛṛu manga darandungnga apan nilapisannu alu. Manara udde niola'a ringannu maaddunna wuṛṛu mauukka see manarane malihakka.

⁹Wua'udde i yami naiwal᷊o su manga piaṛṛa'u walahanna udde, isai apan buatte nandolokki mangitou mapararisikku apia Wal᷊en Patataṛṛamawuanna udde wuṛṛu manuungnga.

¹⁰I yami naiwal᷊o lai manga aranni mangitou tadea'u wotongnge iwal᷊o si Tuangnga isai apan uapiaṛṛa'u manara udde.

¹¹I mangitou sinumimbakka, ‘I yami tantal᷊anna mapararisikku apia Wal᷊en MAWU apan nipararisikka wuṛṛu nisuuangnga piraten pul᷊o su tonnane nal᷊iu apan niola'u sangkatou ratun Israel apan mawantuga.

¹²Arawe ana waugu manga al᷊amonan kami buatte napaasabbangngu asasa'un Duata uataṛṛino surga, ne i Tou namantilli mangitou su taṛṛinon Nebukadnezar, ratun Babel wuassu papapulunnu Kasdim. I Tou nakkimunsa'a Wal᷊en udde wuṛṛu naṛṛootta walahanni yami watukku Babel.

¹³Wua'udde i Kores naola'a ratun Babel wuṛṛu su tonna paarorone i tou uaparenta, i tou napassabbangngu parenta tadea'u ma'ola'a apia Wal᷊en MAWU udde.

¹⁴Ewe'e niwelengnge lai manga saranapa wul᷊awanna wuṛṛu sal᷊a'a apan ipappaatta su Wal᷊en MAWU wuṛṛu apan buatte nianun Nebukadnezar wuassu Yerusalem ana see niaddo sulal᷊ummu kuilla su Babel. Manga saranapa udde nitantilli Ratu Kores su taumata aranne Sesbazar, apan buatte nitenege naola'a gubernuren Yehuda.

¹⁵Ratu nandolokki tou mangal᷊appa manga saranapa udde wuṛṛu iapawelengnga watukku Wal᷊en MAWU su Yerusalem, see mapararisikku apia Wal᷊en udde.

¹⁶Ana see nirumantate Sesbazar watukku Yerusalem wuṛṛu nangaddon rapappakku Wal᷊en MAWU udde. Nanattakka orassa udde naddatingngu orassa indi pamamangunna udde sidutu u'amatta, arawe taambe lai nasue.’

¹⁷Amungkangngu i Tuangnga mamala, i yami maddorongnga tadea'u olaanna pananaṛṛassidda sulal᷊ummu buken araratuanna su Babel. Ringannu aroddi wotongnge asingkatanna tanne atonna pia parentan Ratu Kores ipa'ola'a apia Wal᷊en su Yerusalem indi. Wua'udde i yami maddorongnga watti'a ereapa inaappuanni Tuangnga su ola'u hatto udde.”