Read Talaud EZRA 7 Bible Online

EZRA 7 - Talaud bible

EZRA 7

¹Manga pira tonna wua'udde, sutempo Artahsasta uaparenta naola'a ratun Persia, pia sangkatou esakka aranne Ezra, wuassu papapulunni Imam Mawantuga Harun. Akkittu pallaṛṛitene wua bowa ire'e eteudde ere manansunna indi: i Ezra i Seraya i Azarya i Hilkia

²i Salum i Zadok i Ahitub

³i Amarya i Azarya i Merayot

⁴i Zerahya i Uzi i Buki

⁵i Abisua i Pinehas i Eleazar i Imam Mawantuga Harun

⁶I Ezra sangkatou apan pia si'olane wuṛṛu masingkattu su ola'u anambon Tita apan nionggollu MAWU, Ruatan Israel si Musa. Ana waugu Ezra nial᷊amatannu MAWU Ruatane, ne ratu nangonggolla si tou al᷊awo'a apan raddoronganne. Su tonna appitune sutempo i Ratu Artahsasta uaparenta, Ezra napul᷊ete wuassu Babel mattuddan Yerusalem suaddio'a ringannu ammul᷊annu taumatan Israel eteudde manga pira imam, taumatan Lewi, mangangantari see mandariagga ngara su Wal᷊en MAWU, wuṛṛu manga mamamanara.

⁸I mangitou nanantangu Babel su allo paarorone wul᷊anna paarorone wuṛṛu su tul᷊ungannu Ruata, i mangitou na'omate su Yerusalem su allo paarorone wul᷊anna al᷊imane.

¹⁰I Ezra buatte nanginsue allone su ipanaṛṛassidda Titan MAWU, su mappaamatta see manatiro al᷊awo'u atokke wuṛṛu atoranne su walahannu Israel.

¹¹Eteindi suratta sasahipunanna apan noonggolli Ratu Artahsasta si Ezra, sangkatou imam wuṛṛu panden Tita,

¹²“Wuassi Ratu Artahsasta iwuna'a si Ezra, sangkatou imam wuṛṛu panden Titan Duata uataṛṛino su surga.

¹³I ya'u namarenta manungku anambon imam, taumatan Lewi wuṛṛu taumatan Israel waine su ahewallu araratuangku, apan mappulu inai watukku Yerusalem, iwala inai ringannu Tuṛṛangnga.

¹⁴Ana waugu i ya'u wuṛṛu siri pitu mananatiro'u mandolokku Tuṛṛangnga watukku Yerusalem wuṛṛu Yehuda manaṛṛassidda olangnge wuṛṛu ma'ellega tanne Titan Duata apan buatte nitantilla su Tuṛṛangnga, atonna-tonna niapaamatta.

¹⁵I ya'u wuṛṛu manga mananantiro'u mangonggollu sasamba wul᷊awanna wuṛṛu sal᷊a'a su Ruatan Israel, Ruata apan uatana'a su Yerusalem. Apira'e sasamban kami udde.

¹⁶Apira'e lai anambon wul᷊awanna wuṛṛu sal᷊a'a apan niammullu Tuṛṛangnga su ahewallu Babel wuṛṛu al᷊awo'u sasumbalan balahannu Israel see manga imammi mangitou su Wal᷊en MAWU Ruatan mangitou su Yerusalem.

¹⁷Paata'e roitta udde ringannu mapia su ipamalli sapi esakka, domba esakka, ana'u domba, gandumma wuṛṛu anggore. Ola'e sasamba sarangkanambone udde su wowon mezbah Wal᷊en MAWU su Yerusalem.

¹⁸Sal᷊a'a wuṛṛu wul᷊awanna apan nallambe wotongnge ipaatti Tuṛṛangnga hunan hausannu Tuṛṛangnga wuṛṛu manga hawen Tuṛṛangnga, ere su ipaapulun Duatan Tuṛṛangnga.

¹⁹Tantila'e su Ruata su Yerusalem al᷊awo'u saranapa apan buatte nitantilla su Tuṛṛangnga hunan patataṛṛamawu su Wal᷊en Duata.

²⁰Wuṛṛu al᷊awo'u hausanna waine su Wal᷊en MAWU, Tuṛṛangnga wotongnge maddorongnga wuassu roittu araratuanna.

²¹Su anambon mamanaran pangangaddoannu roittu araratuanna su propinsi Efrat Waṛṛatta i ya'u mamarenta tadea'u al᷊awo'u apa apan doronganni Imam Ezra, panden Titan Duata uataṛṛino su surga, ionggolla si tou ringannu mal᷊ihakka,

²²maddatingngu reenganna anambon indi: sal᷊a'a maddatingngu 3.400 kg, gandumma maddatingngu 10.000 kg, anggore maddatingngu 2.000 litere, lanan zaitun maddatingngu 2.000 litere, wuṛṛu haramma su anambon pappandumanna.

²³Pammanarate ringannu mapia sulal᷊ummu manaddia al᷊awo'u saranapa apan nirorongannu Ruata uataṛṛino su surga hunan Wal᷊en-Ne, tadea'u i Tou tawe masa'u si ya'u ara'e su manga taumata apan mamarenta mallol᷊ossa si ya'u.

²⁴I yamiu imbaṛṛangnga maddorongnga wose su manga imam, taumatan Lewi, mangangantari, manddariaga ngara wahewalla, mamanara, ara'e isai-isai apan pia paa'aukka su Wal᷊en MAWU.

²⁵Tuṛṛangnga Ezra, paata'e asingkatta apan buatte nionggollu Ruata su Tuṛṛangnga, wuṛṛu pamilete manga piaṛṛa'a wuṛṛu manga mallaṛṛuungnga tadea'u mamarenta anambon taumata su propinsi Efrat Waṛṛatta apan mabbiakka tumuṛṛuttu Titan Duatan Tuṛṛangnga. Ṛinone Tuṛṛangnga mangaṛṛa'u Tita udde su anambon taumata apan taambe naasingkatta.

²⁶Suapan taumata apan tawe tumuṛṛutta manga titan Duatan Tuṛṛangnga, ara'e manga titan araratuanna, ṛinone lapiddu iṛṛuumanna pateanna, ara'e iramme, ara'e anuanna darotongnge, ara'e itaṛṛo su tattupanna.”

²⁷Ana see Ezra nabbisara, “Paddalote MAWU, Ruata apan sassubbannu iupungngu al᷊amonan kite! I Tou buatte nangal᷊oren naungngu ratu na'oman sara i tou nangonggollu sasumbala pina'ola'a Wal᷊en MAWU su Yerusalem.

²⁸Ringannu tul᷊ungannu Ruata i ya'u raddangnguannu ratu, manga mananantirone wuṛṛu manga tembonanne apan uataṛṛino udde; MAWU Ruata'u buatte nangonggollu ikkatta si ya'u, na'oman sara i ya'u wotongnge nangahe anambon tembonannu wawosoannu Israel mapul᷊e watukku Yerusalem.”