Read Talaud EZRA 8 Bible Online

EZRA 8 - Talaud bible

EZRA 8

¹Eteindi arannu manga tembonannu wawosoanna apan buatte niwuangnga su Babel wuṛṛu nabbelengnga suadio'a ringangku, Ezra, watukku Yerusalem sutempo Artahsasta uaparenta naola'a sangkatou ratu:

²Gersom, wuassu wawosoanni Pinehas Daniel, wuassu wawosoanni Itamar Hatus ana'i Sekhanya, wuassu wawosoanni Daud Zakharia, wuassu wawosoanni Paros, suaddio'a ringannu 150 esakka wuassu wawosoanne (pia boṛṛetta su ola'u pallaṛṛiten mangitou) Elyoënai ana'i Zerahya, wuassu wawaosoanni Pahat-Moab, suaddio'a ringannu 200 esakka Sekhanya ana'i Yahaziel, wuassu wawaosoanni Zatu, suaddio'a ringannu 300 esakha Ebed ana'i Yonatan, wuassu wawosoanni Adin, suaddio'a ringannu 50 esakka Yesaya ana'i Atalya, wuassu wawosoanni Elam, suaddio'a ringannu 70 esakka Zebaja ana'i Mikhael, wuassu wawosoanni Sefaca, suaddio'a ringannu 80 esakka Obaja ana'i Yehiel, wuassu wawosoanni Yoab, suaddio'a ringannu 218 esakka Selomit ana'i Yosifya, wuassu wawosoanni Bani, suaddio'a ringannu 160 esakka Zakharia ana'i Bebai, wuassu wawosoanni Bebai, suaddio'a ringannu 28 esakka Yohanan ana'i Hakatan, wuassu wawosoanni Azgad, suaddio'a ringannu 110 esakk(...)

¹⁵Anambon ammul᷊anna udde ta'u niammulla su winggin sal᷊ukka apan mangelekka watukku soa Ahawa, ana see i yami naddasante poiaroddi al᷊annune tallu allo. Napawe ta'u niparikisanna, inauranna pia manga pira imam suwallatti mangitou, arawe tawe saran sangkatou wuassu ṛuanganni Lewi.

¹⁶Ana see ta'u niwaggoanna siri sio suwallattu manga piaṛṛa'a, eteudde: Eliezer, Ariel, Semaya, Elnatan, Yarib, Elnatan, Natan, Zakharia, Mesulam wuṛṛu lai darua huru, eteudde Yoyarib wuṛṛu Elnatan.

¹⁷Wua'udde i mangitou ta'u nirolokka maisasomban Ido, tembonannu tumana'a su Kasifya, ringannu darorongnga tadea'u Ido wuṛṛu hawene mammanara su Wal᷊en MAWU, mangirimma si yami manga taumata mangimbe su Wal᷊en MAWU.

¹⁸Ana waugu apapian naungngu Ruata, i mangitou nangirimma si yami Serebya, sangkatou Lewi apan pande wuassu wawosoanni Mahli. Suaddio'a lai ringanni tou nirumanta al᷊aṛṛana'a wuṛṛu manga tuṛṛangnge, anambone 18 su atoune.

¹⁹Hasabya wuṛṛu Yesaya wuassu wawosoanni Merari, ringannu daruan pul᷊o su atoune tuṛṛangngi mangitou, niiringnga lai si yami.

²⁰Wal᷊ine wua'udde pia 220 taumata mammanara su Wal᷊en MAWU apan aranne uawoṛṛetta. Al᷊amonan mangitou ro'en dorone nitantunni Ratu Daud wuṛṛu manga tembonannu araratuanna iapasumbala taumatan Lewi.

²¹Ana see su wingngin Sal᷊ukku Ahawa udde i ya'u niumal᷊iata manungku sarangkanambone ṛinone mappuasa wuṛṛu uma'ukku'u watanganne su saruannu Ruata. I yami niumal᷊iomanna tadea'u Ruata mamiaṛṛa'i yami sulal᷊ummu amatanna udde, see mallu'adda si yami, manga ana'i yami, wuṛṛu al᷊awo'u darotongngi yami.

²²I ya'u maddiri maddorongnga tantaran awal᷊o su ratu tadea'u iapariagga si yami wuassu pangalon seetta sulal᷊ummu amatanna. Ana waugu i ya'u buatte nabbisara si tou, manungku Ruatan kami mangngal᷊amatta suapan taumata apan mattaṛṛamawu si Tou wuṛṛu maddantinnu see makkuumannu suapan taumata apan tawe satia si Tou.

²³Ne i yami nappuasate see inumal᷊iomanna su Ruata maddorongnga tatilla'uppa wuṛṛu i Tou naddaringikka aal᷊iomanni yami.

²⁴Suwallattu manga imam apan apianne i ya'u namile 12 su atoune: Serebya, Hasabya, wuṛṛu 10 su atoune lai.

²⁵Wua'udde i mangitou ta'u nitimbangannu sal᷊a'a, wul᷊awanna wuṛṛu manga saranapa apan buatte nionggollu ratu, manga manantiro see tembonanne wuṛṛu anambon taumatan Israel, tadea'u ipaatta sulal᷊ummu Wal᷊en MAWU. Sarangkanambone udde ta'u nitantilla su manga imam udde.

²⁶Eteindi arannu manga aonggolla udde: sal᷊a'a — — — 22 ton 100 saranapa sal᷊a'a — — — 70 kg wul᷊awanna — — — 3.400 kg 20 mangko wul᷊awanna — — — 8,4 kg 2 mangko witu'a apan tumaniten mapia, apan areggane uasul᷊ungngu areggan mangko wul᷊awanna.

²⁸I ya'u nabbisara su manga imam udde, “I yamiu niṛṛae hunan MAWU, Ruata apan sasubbannu iupungngu al᷊amonnan kite, aroddi lai al᷊awo'u saranapa sal᷊a'a wuṛṛu wul᷊awanna apan nionggolla su MAWU uddewe niṛṛae hunan MAWU.

²⁹Lu'arete manga saranapa udde mapia-pia ma'oman sara i yamiu ma'omate su Wal᷊en MAWU. Napawe na'omate poiaroddi, manga saranapa udde ṛinone itimbangngi yamiu, wuṛṛu itantilla su manga imam tembonanne wuṛṛu manga piaṛṛa'u taumatan Lewi, see manga piaṛṛa'u taumatan Israel su Yerusalem.”

³⁰Ana see manga imam wuṛṛu manga taumatan Lewi udde manengkamma sal᷊a'a, wul᷊awanna wuṛṛu manga saranapa udde iapidda watukku Wal᷊en MAWU su Yerusalem.

³¹Su allo mapul᷊o dua wul᷊anna paarorone i yami nanantangngu Sal᷊ukku Ahawa wuṛṛu inaite watukku Yerusalem. Sulal᷊ummu amatanna udde i yami lal᷊u'arannu Ruatan kami wuassu pangalo wuṛṛu aampangngu seetta.

³²Napawe na'omate su Yerusalem, i yami nangillol᷊o al᷊annune tallu allo.

³³Wua'udde su allo aiappanne i yami inaite watukku Wal᷊en MAWU, ana see nanimbangngu sal᷊a'a, wul᷊awanna wuṛṛu manga saranapa udde. Wua'udde i yami nanantilla si Imam Meremot ana'i Uria ringannu aellehanni Eleazar ana'i Pinehas wuṛṛu ruan katou taumatan Lewi, eteudde Yozabad ana'i Yesua wuṛṛu Noaja ana'i Binui.

³⁴Anambon saranapa udde nireengnga wuṛṛu nitimbangnga, ana see niwoṛṛetaa abbi.

³⁵Su allo udde lai anambon taumata buatte nawelengnga wuassu pamamuanganna udde, nangonggollu sasamba itattambunna su Ruatan Israel. I mangitou nangonggollu 12 sapi esakka sasamban ahewallu Israel, 96 domba esakka wuṛṛu 77 ana'u domba; wal᷊ine wua'udde lai 12 ambinga maola'a sasamba aampungnga rosan batanganni mangitou sassane. Anambon winatangnga udde nitambunna maola'a sasamba su MAWU.

³⁶Ana see suratta apan nionggollu ratu si mangitou, niapasingkatta su manga gubernure wuṛṛu tembonannu propinsi Efrat Waṛṛatta. Ne manga tembonanne udde nangonggollu sasumbala su tumanangnge tadea'u i mangitou wotongnge sidutu mattaṛṛamawu su Wal᷊en MAWU.