Read Talaud NEHEMIA 1 Bible Online

NEHEMIA 1 - Talaud bible

NEHEMIA 1

¹Eteindi watti'i Nehemia ana'i Hakhalya su ola'u manarane. Sulal᷊ummu wul᷊anna Kislew su tonna daruan pul᷊o pamamarentan Artahsasta ratu su Persia, i ya'u, Nehemia, uatana'a su Susan, inangngu soan araratuanna.

²Sutempo udde, tuṛṛangku Hanani, nirumanta wuassu Yehuda suaddio'a ringannu manga pira taumata. Ana see i mangitou ta'u niiwal᷊oanna su ola'u Yerusalem wuṛṛu manga taumatan Yahudi apan buatte nabbelengnga wuassu pamamuanganna su Babel.

³I mangitou nabbatti'a manungku manga taumata wua niwuangnga apan buatte nabbelengnga watukku wanuane udde, orassa indi mabbiakka susa wuṛṛu lallobbosannu manga walahanna raho apan uatana'a maranine. See lai, manga darandungngu soa Yerusalem ta'e naṛṛimunsa'a uatal᷊eṛṛongnga wuṛṛu manga ngaran passallanganne taambe niola'a apia ro'en nisoṛṛobba sutempo nal᷊iu.

⁴Naaringikka watti'a udde, i ya'u niuma'ianna wuṛṛu nilumuai. Manga pira allo al᷊annune naungku massusa. I ya'u sidutu mappuasa lapiddu u'al᷊imonna su Ruata,

⁵“Oh MAWU Ruata uataṛṛino su surga. I'o Ruata apan Wahewallua wuṛṛu i yami sumaruanna Si'o ringannu napenen apendamma matta'utta. I'o sidutu satia wuṛṛu uaagassa paaire-Nu su taumata apan marangngu Si'o wuṛṛu matuṛṛutta parenta-Nu.

⁶Pa'ellege si ya'u oh MAWU, wuṛṛu daringiṛṛewe aal᷊iomanna apan ta'u iruitta su saruan-Nu allo wuṛṛu ṛabbi hunan umattu Israel, manga allang-Ngu udde. I ya'u manga'u manungku i yami, umattu Israel, manga allang-Ngu udde. I ya'u manga'u manungku i yami, umattu Israel, buatte na'ola'a rosa; i ya'u wuṛṛu manga al᷊amona'u buatte na'ola'a rosa lai.

⁷I yami buatte na'ola'a al᷊al᷊eo Si'o wuṛṛu nilumawangnga manga parenta-Nu. I yami tawe tumuṛṛutta manga tita apan buatte nionggollu MAWU si yami wuassi Musa, allang-Ngu udde.

⁸Oh MAWU, naungewe manga wisara-Nu, manungku amungkangngu i yami, umattu Israel, tawe satia Si'o, i yami sarun isal᷊iwukku MAWU suwallattu manga walahanna waine.

⁹Arawe amungkangngu i yami mabbelengnga apia ringan-Nu wuṛṛu tumuṛṛutta manga parenta-Nu, ne i yami apan nassal᷊iawukke udde sarun iammullu MAWU apia, salaiwe i yami uatana'a su manga pentakku runia. See i yami sarun iweleng-Ngu watukku tampa apan buatte nipile-Nu maola'a tampa patataṛṛamawuanna Si'o.

¹⁰MAWU, i yami indi manga allang-Ngu, uman-Nu sassane apan buatte niapasal᷊aman-Nu ringannu taṛṛino wuṛṛu atatohan-Nu apan wahewalla.

¹¹Daringiṛṛewe aal᷊iomannu anambon allang-Ngu apan waine, apan mappulu mangaddatta Si'o. Onggol᷊aawe tul᷊ungan-Nu tadea'u su allo indi allang-Ngu indi maasomba darangngu wuassu ratu.” Sutempo udde i ya'u mammanara mangngimben ua'e ratu.