Read Talaud NEHEMIA 10 Bible Online

NEHEMIA 10 - Talaud bible

NEHEMIA 10

¹Taumata paarorone apan nabartanda eteudde Gubernure Nehemia ana'i Hakhalya. Wua'udde nanansunna Zedekia. Wua'udde manga taumata manansunna indi nabartanda lai:

²Manga imam Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maazya, Bilgai wuṛṛu Semaya.

⁹Manga taumatan Lewi Yesua ana'i Azanya, Binui papapulunnu ṛuanganni Henadad, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani wuṛṛu Beninu.

¹⁴Manga piaṛṛa'u walahanna Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, Ater, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim, wuṛṛu Baana.

²⁸I yami, tumana'u Israel, manga imam, manga taumatan Lewi, manga mandariagga ngara wahewalla su Wal᷊en MAWU, manga mananalangnga musikka wuṛṛu manga mamanara su Wal᷊en MAWU, wuṛṛu awingnga see al᷊aṛṛana'i yami apan saṛṛentumuwo wuṛṛu maasunnate see anambon taumata apan matuṛṛutta titan Duata wuṛṛu buatte naṛṛaen batanganne wuassu taumata raho apan uatana'a su wanuan kami.

²⁹I yami sarangkanambone naammulla ringannu manga piaṛṛa'i yami wuṛṛu nassalu tadea'u sidutu mabiakka tuttuṛṛutta titan Duata apan buatte nionggollu MAWU si Musa, allang-Nge. Antimanna Ruata mamontogga si yami amungkangngu i yami tawe nanipussu paaire indi. I yami nassalu sarun mapaamattu al᷊awo'u parenta, tita wuṛṛu atorannu MAWU, Ruatan kami.

³⁰I yami nassalu tadea'u tawe maawingnga ual᷊al᷊o'a ringannu manga walahanna raho apan uatana'a su wanuan kami.

³¹Amungkangngu pia balahanna raho apan mapullu mabbal᷊u'u gandumma ara'e saranapa waine si yami su allon Sabat ara'e allo susi waine, i yami tawe mamalli. Suapan tonna appitune, i yami tawe mammanara wailla wuṛṛu tawe maddorongnga awallassa.

³²Suapan tonna i yami sambau-sambau sarun mangonggollu lima haramma sal᷊a'a hunan hausannu Wal᷊en MAWU.

³³I yami sarun manaddia hausannu patataṛṛamawu su Wal᷊en MAWU, eteudde: roti sasaru, sasamba gandumma mamiallo, winatangnga maola'a sasamba itattambunna mamiallo, sasamba susi waine, manga sasamba aampungnga rosan Israel, wuṛṛu al᷊awo'u manga apa pappandummanna hunan Wal᷊en MAWU.

³⁴I yami, tumana'a, manga imam wuṛṛu manga taumatan Lewi, sarun mandammen undi suapan tonna ipanantunna ṛuanganna suapa apan ṛinone manaddia alu anutungnga ipallaha manga sasamba ionggolla su MAWU Ruatan kami, tumuṛṛuttu atorannu Tita.

³⁵Suapan tonna i yami sarun mangapidda watukku Wal᷊en MAWU hessin gandumma apan paarorone wuṛṛu manga wuan aaluanna apan paarorone nal᷊aha wuassu manga sasuanni yami.

³⁶I yami sarun mangapiddu ana'a esakki yami apan pahul᷊une su manga imam su Wal᷊en MAWU tadea'u itantilla su Ruata, uasul᷊ungngu atorannu Tita. I yami sarun manantillu lai ana'u sapi, ana'u domba ara'e ana'u ambinga i yami apan paarorone niṛṛana'a.

³⁷I yami sarun mangapidda su manga imam su Wal᷊en MAWU taponna wuassu gandumma apan paarorone niitingnga suapan tonna, see lai manga sasamba waine erenai anggore, lanan zaitun wuṛṛu al᷊awo'u hatin wuan aaluanna. Sasamba sepere mapul᷊o wuassu hessin wawail᷊anni yami sarun iapiddi yami su manga taumatan Lewi apan malluṛṛu manga sasamba sepere mapul᷊o su manga soan pabbail᷊anna.

³⁸Arawe sangkatou imam papapulunni Harun ṛinone uaringanna manga taumatan Lewi udde napawe i mangitou malluṛṛu manga sasamba udde. Wuṛṛu sepere mapul᷊o wuassu anambon sasamba udde ṛinone iapiddu manga taumatan Lewi watukku wabbo'an bal᷊unna su Wal᷊en MAWU.

³⁹Tumana'u Israel wuṛṛu manga taumatan Lewi ṛinone mangapiddu sasumbala sidutu erenai gandumma, anggore wuṛṛu lanan zaitun watukku wabbo'an bal᷊unna tampa pangaddoannu manga saranapa su Wal᷊en MAWU. Isudde lai tampan tatatanaannu manga imam apan tantal᷊anna mammanara, manga mandariagga ngara wahewalla su Wal᷊en MAWU wuṛṛu manga mangangantari. I yami tawe maabul᷊i mammaresi Wal᷊en MAWU.