Read Talaud NEHEMIA 11 Bible Online

NEHEMIA 11 - Talaud bible

NEHEMIA 11

¹Manga piaṛṛa'a namanuate su Yerusalem wuṛṛu tumana'a nandammen undi ipamile sambau amonanna wuassu suapan mapul᷊o amonanna apan ṛinone matana'a su soa susi Yerusalem. Apan tawe niapile wotongnge matana'a su manga soa waine.

²Suwallatti mangitou piaddu mappulu matana'a su Yerusalem wuṛṛu i mangitou raddaloannu tumana'a.

³Su manga soa waine, tumana'u Israel, manga imam, manga taumatan Lewi, manga mamanara Wal᷊en MAWU, wuṛṛu papapulunni mangangimben Salomo uatana'a su leta'a pussa'an mangitou wuṛṛu su manga soan mangitou sassane.

⁴Manga pira taumata wuassu ṛuanganni Yehuda wuṛṛu Benyamin natana'a su Yerusalem. Eteindi manga aranni mangitou: Manga taumatan ruanganni Yehuda: Ataya ana'i Uzia wuṛṛu puluni Zakharia. Manga pira suwallattu iupungngu al᷊amonane eteudde; Amarya, Sefaca wuṛṛu Mahalaleel, Peres, Yehuda. Sarangkanambone 468 su atoune apan matatohassa. Maaseya ana'i Barukh wuṛṛu pulunni Kolhoze. Manga pira suwallattu iupungngu al᷊amonane eteudde: Hazaya, Adaya, Yoyarib, Zakharia, Syela, Yehuda.

⁷Manga taumatan ṛuanganni Benyamin: Salu ana'i Mesulam wuṛṛu pulunni Yoëd. Manga pira suwallattu iupungngu al᷊amonane eteudde: Pedaya, Kolaya, Maaseya, Itiel wuṛṛu Yesaya. Gabai wuṛṛu Salai. I mangitou sangkatuṛṛangnga marani ringanni Salu. Sarangkanambone 928 suatoune nipiaṛṛa'i

⁹Yoel ana'i Zikhri wuṛṛu tepellene, Yehuda ana'i Hasenua.

¹⁰Manga imam: Yedaya ana'i Yoyarib wuṛṛu Yakhin. Seraya ana'i Hilkia wuṛṛu pulunni Mesulam. Manga pira suwalattu iupungngu al᷊amonane eteudde: Zadok, Merayot, Ahitub apan uamanara Imam Bahewa.

¹²Sarangkanambone pia 822 imam apan mammanara su Wal᷊en MAWU. Adaya ana'i Yeroham wuṛṛu pulunni Pelalya. Manga pira suwallattu iupungngu al᷊amonane eteudde: Amzi, Zakharia, Pasyhur wuṛṛu Malkia.

¹³Manga tembonannu amonanna sulal᷊ummu wawosoanna udde sarangkanambone 242 suatoune. Amasai ana'i Asareel wuṛṛu pulunni Ahzai. Iupungngu al᷊amonane eteudde: Mesilemot wuṛṛu Imer.

¹⁴Wuassu wawosoanna indi pia 128 suatoune atumannaṛṛanne apan waṛṛani. Piaṛṛa'i mangitou eteudde Zabdiel, ana'i Gedolim.

¹⁵Manga taumatan Lewi: Semaya ana'i Hasub wuṛṛu pulunni Azrikam. Iupungngu al᷊amonane eteudde Hasabya wuṛṛu Buni. Sebatai wuṛṛu Yozabad, manga taumatan Lewi apianne apan uariagga su liuddu Wal᷊en MAWU. Matanya ana'i Mikha wuṛṛu pulunni Zabdi, wuassu papapulunni Asaf. I tou piaṛṛa'u mangangantari su aal᷊iomannu aadiangkamanna. Bakbukya tepelli Matanya. Abda ana'i Samua wuṛṛu pulunni Galal, wuassu papapulunni Yedutun. Sarangkanambone 284 suatoune.

¹⁹Manga mandariagga ngara wahewalla: Akub, Talmon wuṛṛu manga hawen mangitou. Sarangkanambone 172 suatoune.

²⁰Tumana'u Israel, manga imam wuṛṛu manga taumatan Lewi apan lambene natana'a su leta'i mangitou su al᷊awo'u soa su Yehuda.

²¹Manga mamanara su Wal᷊en MAWU uatana'a su wageangngu soa Yerusalem aranne Ofel. I mangitou mammanara su al᷊ungngu piaṛṛa'i Ziha wuṛṛu Gispa.

²²Mandariagga manga taumatan Lewi apan uatana'a su Yerusalem eteudde Uzi ana'i Bani wuṛṛu pulunni Hasabya. Iupungngu al᷊amonane eteudde Matanya wuṛṛu Mikha. I tou nasutta su wawosoanni Asaf apan mamanara nallu'adda musikka sutempo mattaṛṛamawu su Wal᷊en MAWU.

²³Hilirannu suapan wawosoanna ipallu'adda musikka su Wal᷊en MAWU miallo-miallo nitantunna tumuṛṛuttu atorannu ratu.

²⁴Petahya ana'i Mesezabeel wuassu wawosoanni Zera wuṛṛu ṛuangannu Yehuda, naola'a tepellu walahannu Israel su wal᷊en araratuannu Persia.

²⁵Manambo suwallatu tumana'a uatana'a su manga soa apan maranin manga wawail᷊anni mangitou. Manga siri pira wuassu ṛuanganni Yehuda natana'a su wageangngu leta'a suwallattu Bersyeba samba'a timukka wuṛṛu Wawal᷊annu Hinom samba'a sawannakka. I mangitou natana'a su manga soa manansunna indi ringannu manga ampungnga maranine: Kiryat-Arba, Dibon, Yekabzeel Yesua, Molada, Bet-Pelet Hazar-Sual, Beryeba Ziklag, Mekhona En-Rimon, Zora, Yarmut, Zanoah, Adulam, Azeka, Lakhis.

³¹Manga pira taumata wuassu ṛuanganni Benyamin uatana'a su Geba, Mikhmas, Ai, Betel wuṛṛu manga ampungnga maranine,

³²su Anatot, Nob, Ananya,

³³Hazor, Rama, Gitaim,

³⁴Hadid, Zeboim, Nebalat,

³⁵Lod, Ono wuṛṛu su Wawal᷊annu Manga Tu'angnga.

³⁶Manga pira ammul᷊annu taumata Lewi apan dorone uatana'a su wageangngu leta'u Yehuda nirolokka niapatana'a ringannu manga taumatan Benyamin.