Read Talaud NEHEMIA 2 Bible Online

NEHEMIA 2 - Talaud bible

NEHEMIA 2

¹Su allo sambau, appattu wul᷊anna wua'udde, eteudde su wul᷊anna Nisan, sutempo Ratu Artahsasta tantal᷊anna u'anna, i ya'u nanarun anggore si tou ringannu naungnga massusa. Taambe saran paassa i ya'u aellehanna massusa su saruanni tou ere su allo udde.

²Ana waugu udde i tou naiwal᷊o, “Anio i'o aellehanna aroddi massusa sumbali tawe maradda'a? Asinungka piaddu iraṛṛingiddu.” I ya'u niṛṛumindu'a,

³ana see, sinumimbakka, “Nabbiakke Tuangnga saran mal᷊annu-l᷊annu! Ereapa allangnga tawe masusa, amungkangngu soa tampa pallabbingannu iupungngu al᷊amonan allangnga orassa indi ete nallambe winal᷊alanna wuṛṛu manga ngarane wahewalla nepodde nisoṛṛobbu putungnga.”

⁴Ratu naiwal᷊o, “Nariaddi, apa apan ipaapulunu?” Sulal᷊ummu naungnga i ya'u u'al᷊iomanna su Ruata uataṛṛino su surga,

⁵ana see i ya'u nabbisara su ratu, “Amungkangngu Tuangnga mal᷊uassa wuṛṛu mangutungngu darorongngu allangnga, diloṛṛa'e allangnga watukku leta'u Yehuda tadea'u mapararisikku apia soa tampa lal᷊abbingannu al᷊amonan allangnga.”

⁶Ana see ratu apan tantal᷊anna ua'ianna daringanannu Wo'i, nangutungngu darorongku. I tou naiwal᷊o pira tempo al᷊annune i ya'u sarun matana'a poiaroddi wuṛṛu tingngera mabbelengnga, ne i ya'u namasingkatta si tou tempo apan buatte ta'u tinantunna.

⁷Wua'udde i ya'u naddorongnga suratta iapasilo su gubernure propinsi Efrat Waṛṛatta, tadea'u i mangitou massumbala amatangku maddatingngu Yehuda.

⁸Wal᷊ine wua'udde, i ya'u naddorongnga lai suratta ionggolla si Asaf, mandariaga mahurangngu araratuanna, tadea'u i tou mangonggollu alu ipa'ola'a ngara wahewallu tanda'a watu maranin Wal᷊en MAWU, wuṛṛu ipa'ola'a darandungngu soa see wal᷊en apan sarun ta'u atanaanna. Ratu nangutungngu anambon darorongku udde, ana waugu Ruata nantul᷊ungku.

⁹Suadi'o ringannu manga pira tembonannu tantara wuṛṛu tantara uasa'e awal᷊o, wuassu parentan ratu tumantalongnga si ya'u, inaite i ya'u watukku Efrat samba'a waṛṛatta. Poiaroddi surattu ratu udde ta'u nionggolla su manga gubernure.

¹⁰Arawe sutempo Sanbalat, taumatan Bet-Horon, wuṛṛu Tobia, sangkatou tembonanne wuassu Amon, naaringikka manungku i ya'u nirumata hunan hausannu walahannu Israel, i mangitou mangke sinumassilla.

¹¹I ya'u na'omate su Yerusalem, ana see nangillol᷊o tallu allo.

¹²Su al᷊annune udde i ya'u tawe namasingkatta sisai-sai manungku Ruata nangonggollu asingkatta si ya'u ipa'ola'a apia soa Yerusalem. Tiṛṛabine maranduma i ya'u napu'ote ana see nangahe manga pira hawe inai watukku liuddu soa. Wal᷊ine wuassu apan ta'u sasa'enna, i yami tawe nangapiddu winatangnga sasa'eanna wal᷊ine.

¹³Allo ta'e ṛabbi, sutempo i yami nanantangngu soa niumamattu Ngara Wahewalla su samba'a waṛṛatta. I yami mattudda watukku timukka, watukku Ngara Wahewallu Sapadda, niumamattu Al᷊imatan Ua'e Naga. Sulal᷊ummu amatanna udde i ya'u namarikissa manga loṛṛangnga su darandungngu soa wuṛṛu i ya'u naasilo lai manga ngara wahewalla apan nasuete niepoddu putungnga.

¹⁴Wua'udde wuassu wageangngu ra'i soa i yami nasal᷊a watukku sawannakka, watukku wageangngu ra'i soa i yami nasal᷊a watukku sawannakka, watukku Ngara Wahewalla Ua'e Mabbiassa wuṛṛu Li'un Datu. Arawe isudde tawe dal᷊anna amatannu keledai apan ta'u sasa'eanna udde, ana waugu tumaniten manambo tuiddu winal᷊alanna.

¹⁵Nariaddi, i yami sinumossokka watukku Wawal᷊annu Kidron wuṛṛu nanassu amatanna su ṛabbi udde lai, lapiddu mammarikissa darandungngu soa. Wua'udde udde i yami nabbeṛṛo wuṛṛu nabbelengnga watukku soa niumamatta Ngara Wahewallu Wawal᷊anne.

¹⁶Tawe saran sangkatou wuassu manga matatimmaddu wanua masingkatta watukku apa i yami niumamatta, wuṛṛu apa apan ta'u niṛṛiinna. Ana waugu na'oman sara orassa udde i ya'u taambe nabbtti'u manga apa su manga taumata sambalahangku, mawae ete manga imam aroddi lai su manga matatimmaddu wanua, ara'e su manga mamanaran araratuanna, wuṛṛu sisai-sai apan sarun mapararisikku lai soa Yerusalem.

¹⁷Arawe wua'udde i ya'u nabbisara si mangitou, “Pa'ellege pabbiaṛṛanni ite apan susa indi! Yerusalem ete nallambe winal᷊alanna wuṛṛu manga ngarane wahewalla nasue niepoddu putungnga. Wette i ite mapararisikku apia manga darandungngu soa Yerusalem tadea'u i ite tate lai lobbosanna.”

¹⁸Ana see i ya'u nabbatti'a si mangitou ereapa Ruata nantul᷊ungku wuṛṛu apa apan buatte niwisaran datu si ya'u. I mangitou sinumimbakka, “Wette i ite manattakke mapararisikka!” Ana see i mangitou nandiahite manattakka mammanara.

¹⁹Sutempo ṛiinani yami udde niasingkatanni Sanbalat, Tobia wuṛṛu Gesyem, sangkatou Arab, i mangitou nilumagge wuṛṛu mangngal᷊uandaga si yami. Unni mangitou, “Apate apan sarun olaanni yamiu? Apa i yamiu mappulu lumawangnga ratu?”

²⁰I ya'u sinumibakka, “Ruata tembonanne su surga sarun ma'ola'a manaran kami mahessi. I yami uddewe manga allang-Nge wuṛṛu i yamiu manattakke mapararisikka. Arawe i yamiu tawe taṛṛino ara'e pussa'a saran sambau su Yerusalem. Ewe'e lai amungkangngu pia taumata mabbisara su ola'u Yerusalem, arannu tate lai isaggo.”