Read Talaud NEHEMIA 9 Bible Online

NEHEMIA 9 - Talaud bible

NEHEMIA 9

¹Su allo darua pul᷊o appatta wul᷊anna udde lai, tumana'u Israel naammulla. I mangitou nappuasa tadea'u mapal᷊iatta'u sasassilla ana waugu manga rosan mangitou. I mangitou naṛṛaen batanganne wuassu anambon taumata raho. Naola'a tatiala massusa, i mangitou nalluṛṛen nasa karongnga wuṛṛu nanal᷊iawukku leta'a su pua. Wua'udde i mangitou dirumarisikka wuṛṛu nanga'u al᷊awo'u rosan mangitou wuṛṛu rosan al᷊amonan mangitou.

³Iraraṛṛangngo al᷊annune tallun ka'orassa, buke Titan MAWU, Ruatan mangitou, niwasa si mangitou wuṛṛu al᷊annune talun ka'orassa manansunna i mangitou nanga'u manga rosan mangitou. Wua'udde i mangitou niumal᷊intudda wuṛṛu nassuba MAWU, Ruatan mangitou.

⁴Isudde pia mimbare hunan manga taumatan Lewi wuṛṛu rosone uarisikka Yesua, Bani, Kadmiel, Sebanya, Buni, Serebya, Bani wuṛṛu Kenani. Ringanu tingikka matelengnga i mangitou u'al᷊iomanna su MAWU Ruatan mangitou.

⁵Patataṛṛamawu su allo udde nitattakku manga taumatan Lewi manansunna indi; Yesua, Kadmiel, Bani, Hasabneya, Serebya, Hodia, Sebanya, wuṛṛu Petahya. I mangitou nabbisara, “Darisikke wuṛṛu paddalote MAWU Ruatan kite! Onggol᷊eten daralo si Tou saran mal᷊annu-l᷊annu! Dalo su aran-Ne apan napenen awawantuga, aranna apan wahewalla, nagillembo wuassu al᷊awo'u daralo!”

⁶Wua'udde tumana'u Israel niumal᷊iomanna arendi, “Ete I'o MAWU, Ete I'o apan Lembontinggassa; I'o na'ola'a anumpitanna wuṛṛu ahewallu winalanganna, see lai tahal᷊oangnga wuṛṛu runia see al᷊awo'u lal᷊oṛṛone, see I'o nangonggollu pabbiaṛṛanna wuṛṛu I'o nappaddul᷊i. Ete Si'o al᷊awo'u taṛṛino su langitta u'al᷊intudda massubba; i mangitou niumaruutta Si'o wuṛṛu massaṛṛubbawa.

⁷Ete I'o Ruata, MAWU Apan Lembontinggassa. I'o namile si Abram wuassu pattangngannu walahanne. Ur su Babel buatte nitantangnge, ana waugu I'o sassane apan uapiaṛṛa'a si tou. Ana see I'o nangonggolla si tou aranna apan wakku: Abraham, eteudde aranne nanattakka tempo udde.

⁸Niasangkal᷊an-Nu i tou satia Si'o wuṛṛu matuṛṛutta. Ana see niolang-Ngu ringanni tou paaire apan matohassa. Leta'u Kanaan, Het wuṛṛu Amori, leta'u Feris, Yebus wuṛṛu Girgasi, sarangkanambone udde I'o mangonggolla si tou; maola'a tampa tatanaannu anambon papapulunne. Wua'udde I'o nanipussu, paaire udde si tou, ana waugu I'o matul᷊idda wuṛṛu satia.

⁹I'o na'ellega asasusa al᷊amonan kami sutempo nanangkal᷊iu; I'o naddaringikka lal᷊uaine su Mesir wuṛṛu su Tahal᷊oangngu Teberau.

¹⁰Su saruannu ratun Mesir I'o na'ola'a manga inolaanna apan maatiangnga, wuṛṛu lai su saruannu mamanaran araratuanna see tumana'u wanuane, ana waugu I'o masingkatta ereapa uman-Nu sassansaranni mangitou. Ana see tinumelengke aran-Nu naddatingngu allo indi.

¹¹Su ipa'ola'a lal᷊anna hunan uman-Nu, tahal᷊oangnga niwaa-Nu; I'o nal᷊ium mangitou niapaamattu wantan tahal᷊oangnga apan masabbu. Manga mangangenggene nawul᷊ussa sulal᷊umme, ua'e apan mal᷊al᷊umma, naal᷊ihidda watu apan nawontolla su tahal᷊oangnga apan maata'utta.

¹²Ringannu sambau winabbawa I'o nangehetta si mangitou sutempo allo. Wuṛṛu sutempo ṛabbi I'o nanemakka lal᷊anne ringannu pal᷊iaṛṛannu putungnga.

¹³Wuassu langitta I'o sinumossokka su puiddu Wowon Sinai, ana see I'o naggahatton uman-Nu sassane. I'o nangonggollu tita, atoranna wuṛṛu parenta apan matul᷊idda, naṛṛino wuṛṛu pia gunane.

¹⁴Allon Sabat apan na'ukkassa ṛinone ilaghu mangitou, wuṛṛu wuassi Musa Tita-Nu I'o nangonggolla.

¹⁵Sutempo i mangitou mal᷊unussa wuṛṛu niasueannu anna, roti wuassu langitta I'o nanossokka. Wuṛṛu wuassu watu napene, matohassa wuṛṛu maattikka ua'e aul᷊e rou niapa'elek-Ku ringannu masassagga I'o nandolokki mangitou mamanua su leta'a apan nipa'ire-Nu si tou ringannu sasalu.

¹⁶Arawe al᷊amonan kami mawunga wuṛṛu naungnge maattikka; manga parenta-Nu tawe daringiṛṛanni mangitou.

¹⁷I mangitou tawe tumuṛṛutta, al᷊awo'u apapia-Nu tinimbul᷊iannana, wuṛṛu anambon inolaan-Nu apan maatiangnga nawul᷊i wuassu naungnga. Ringannu mawunga i mangitou namile sangkatou piaṛṛangnge, ipangapiddi mangitou watukku Mesir, mabbelengnga maola'a allangnga. Arawe I'o Ruata apan apulune mangngampungnga, masabbare, masaṛṛionto'a wuṛṛu napenen darangngu. Darangngu-Nu atonna tawe pattaal᷊anne; I'o tawe nanantangngi mangitou.

¹⁸I mangitou mallanginnu paal᷊uanna lihidde ere sapi. Ana see i mangitou mabbisara, ‘Eteindi Ruatanu, apan nangapiddi yamiu wuassu Mesir, wuassu patataṛṛuallangnga.’ Oh Ruata, I'o sassane apan nilobbossi mangitou!

¹⁹Arawe su wadda'a udde I'o tawe nanantangngi mangitou, ana waugu I'o napenen darangngu. Pal᷊iaṛṛannu winabbawa wuṛṛu putungnga tawe nisawun-Nu apia, mammiaṛṛa'u lal᷊anni mangitou sutempo allo wuṛṛu ṛabbi.

²⁰Ringannu taṛṛino-Nu apan mapia I'o mangngaṛṛa'a si mangitou. I mangitou u'anna manna wuṛṛu ma'inumma ua'e apan natimu.

²¹Al᷊annune appatu pul᷊o su tonnane su wadda'a mal᷊alangnga, I'o nanuungngu hausanni mangitou. Laubbi mangitou tawe saran paassa mahesa'a, leddan mangitou tawe humiadda ara'e maggandalla,

²²I'o mangonggollu auntunganna si mangitou su anambon araratuanna wuṛṛu walahanna su passarannu leta'i mangitou. Hesybon wanuan Ratu Sihon, niwanuanni mangitou; Basan wanuan Ratu Og, niatanaanni mangitou.

²³I'o na'ola'a papapulunni mangitou anambone ere manga anumpitanna su winalanganna. I'o nangonggollu leta'a si mangitou maola'a tampa atatanaanne, leta'a apan buatte nipa'ire-Nu su iupungngu al᷊amonane.

²⁴Papapulunni mangitou namaddon leta'u Kanaan; tumanangnge poiaroddi niapasuṛṛubawa-Nu. Uman-Nu I'o nangonggollu taṛṛino walate apulun naungnge su saruannu manga walahanna Kanaan wuṛṛu manga ratune.

²⁵Uman-Nu nangaṛṛo manga tanda batu pattillindumanna, leta'a apan masuwukka wuṛṛu wal᷊en apan napenen paa'ala. Manga paṛṛihi wuṛṛu al᷊imatan kua'e niaṛṛon mangitou, waillu anggore, punnu zaitun wuṛṛu manga wuan kalu waine. I mangitou natawa ana waugu u'anna walate apulun naungnge. Anambon aonggolu MAWU apan mapia niatemmanni mangitou.

²⁶Arawe uman-Nu nilumawangnga wuṛṛu tate tumuṛṛutta Si'o, tawe maddaringikka tita wuṛṛu atoran-Nu, namate manga nabi apan napaanaungngi mangitou, wuṛṛu apan nadolokki mangitou mabbelengnga ringan-Nu, Ruatane. Oh Mawu, masokka lai I'o lallobbosanni mangitou,

²⁷ne I'o nanantilli mangitou su seenne apan ringannu maṛṛagissa uataṛṛino wuṛṛu mangngallangnga si mangitou. Arawe sulal᷊ummu asasusa apan masaddatta, i mangitou sussal᷊ande Si'o maddorongnga sasumbala. Wuassu surga I'o naddaringikka; ringannu napenen darangngu I'o sinumibakka. I'o nandolokku piaṛṛa'a wuṛṛu tumannaṛṛanne apan mamallossi mangitou wuassu seetta.

²⁸Arawe napawe wanuane matammudde apia, i mangitou na'ola'e rosa apia. Ne I'o nanantilli mangitou lai su seetta apan mangngallangnga si mangitou. Arawe, sutempo i mangitou maatutukka wuṛṛu sumassilla, i mangitou sumal᷊ande Si'o maddorongnga iapasal᷊amatta. Ne wuassu surga I'o naddaringikka, wuṛṛu masokka-sokka I'o nantul᷊ungnga, ana waugu I'o tuttal᷊antuppi mangitou wuṛṛu lembon marangngu.

²⁹I'o nanaggu si mangitou tadea'u al᷊aṛṛang-Ngu daringiṛṛanna, arawe i mangitou nanol᷊a'u tita-Nu wuṛṛu naungnge mawunga. Sumbal᷊i, amungkangngu tita-Nu daringiṛṛanna, atonna sarun maola'a pabbiaṛṛanna. I mangitou puane maattikka wuṛṛu matanggakka, tawe maddaringikka, wuṛṛu maddiri tumuṛṛutta.

³⁰Tonna uahahanti tonna I'o masabbare mapaanaungngi mangitou; napaattu manga nabi, Ghaṛṛaho-Nu nabbisara si mangitou. Arawe uman-Nu udde nanappingnga tal᷊inga, ana see I'o nanantilli mangitou su manga walahannu al᷊awo'u wanua.

³¹Arawe ana waugu darangngu-Nu tumaniten bahewalla, I'o tawe nanantangnga ara'e nakkimunsa'a si mangitou. Atonna, ete I'o Ruata apan taweddu panumandinganne; tumaniten bahewalla aakkan-Nu, napenen darangngu!

³²Oh Ruata, Ruatan kami apan matohassa! Ruata apan bahewalla wuṛṛu masiṛṛungnga! Ringannu satia I'o uaaggassa al᷊awo'u paaire; manga paaire-Nu I'o nanipussa wuṛṛu niapaaman-Nu. Ro'en tempon manga ratun Asyur mangngallangnga si yami na'oman sara orassa indi, manambo asasusa apan naṛṛia'a si yami. Manga ratun kami, imam, nabi wuṛṛu manga matatimmaddu wanua, wuṛṛu lai al᷊amona wuṛṛu tumana'a, buatte natataṛṛangnga sarangkanambone. Arie paabul᷊iane anambon asasusa udde! Arie timbul᷊ianan-Nu wuassu naung-Ngu!

³³Manara-Nu matul᷊idda, niṛṛuuman-Nu i yami apan marosa; I'o sidutu satia salaiwe i yami napenen sangkulla.

³⁴Al᷊amonan kami, ratu, imam wuṛṛu manga matatimmaddu wanua, nilumawangnga tita-Nu see tawe maddaringikka tita. Al᷊awo'u parenta wuṛṛu tataggu apan I'o buatte nangonggolla, tawe niapaamanne, tawe lai niraringiṛṛanna.

³⁵I'o nanggolla su manga ratu apan uaparenta uman-Nu, sutempo i mangitou uatana'a su leta'a apan mal᷊alangnga wuṛṛu masuwukka I'o nangonggolla. Arawe i mangitou tawe nanantangngu mabbiakka su al᷊al᷊eo, maddiri mangimanna Si'o see mattaṛṛamawu.

³⁶Ne orassa indi i yami naola'e allangnga su leta'a apan nionggollu MAWU maola'a pussa'a. Leta'a indi masuwukka, napenen hessine, apan ṛinone temmanni yami.

³⁷Al᷊awo'u hessin leta'a indi ṛinone itantilla su manga ratun banua. Manga tembonanne udde nipile-Nu wuassu uman-Nu maola'a ṛuumannu rosan kami su saruan-Nu. I mangitou mammrenta walate apulun naungnge su watanganni yami wuṛṛu winatangnga apan tatahuananni yami. Ana waugu udde orassa indi i yami uatataṛṛangnga, napenen sasassilla wuṛṛu asasusa!”

³⁸Pinangianannu al᷊awo'u arariaddianna udde, i yami tumana'u Israel na'ola'a paaire apan matohassa wuṛṛu uawoṛṛetta, ringannu nicappanna manga piaṛṛa'i yami, manga taumatan Lewi wuṛṛu sangkatou imammi yami.