Read Talaud ESTER 4 Bible Online

ESTER 4 - Talaud bible

ESTER 4

¹Sutempo Mordekhai naaringikka apa apan buatte nariaddi, i tou nanggesa'a laungnge wuṛṛu nalluṛṛen laubba karongnga tatialan massusa. I tou nanal᷊iawukku awu su puane, ana see niumamatta su soa lapiddu lulluai ringannu ma'ikkatta wuṛṛu massusa.

²Su saruannu ngara wahewallu araratuanna i tou nattaalla, ana waugu taumata apan ual᷊uṛṛen laubba karongnga imbaṛṛangnga sumutta.

³See lai su al᷊awo'u propinsi, manga taumatan Yahudi nilumallu napawe parentan datu udde nial᷊iata. I mangitou ual᷊uṛṛen laubba karongnga wuṛṛu ual᷊allowangnga su awu.

⁴Sutempo manga maṛṛuala wuṛṛu manga mamanara apianne apan mangngimbe si Wo'i Ester namasingkatta si tou apa apan tantal᷊anna a'olanni Mordekhai, Ester mangke nasusa atonna. I tou nangirimmu laubba si Mordekhai, Ester mangke nasusa. I tou nangirimmu laubba si Mordekhai ipangganti laubba karongnga udde, arawe Mordekhai maddiri manengkamma.

⁵Wua'udde Ester namaggo si Hatah, sangkatou suwallattu mamanara apianne apan nirolokku ratu tadea'u mangimbe si Ester. I tou nandolokki Hatah niapaiwal᷊o si Mordekhai apa apan tantal᷊anna nariaddi wuṛṛu anio i tou na'ola'a ereudde.

⁶Ne Hatah inaite ringanni Mordekhai su lapangannu soa su saruannu ngara suttanna su wal᷊en araratuanna.

⁷Mordekhai nabbatti'a si tou apa apan buatte nariaddi wuṛṛu pira roitta sal᷊a'a apan pina'iren Haman iaddo sulal᷊ummu kasen roittu araratuanna, napawe anambon taumatan Yahudi buatte nipate.

⁸Mordekhai nangonggolla lai si Hatah surattu ratu nial᷊inna apan buatte niapasabbangnga su Susan apan lal᷊oṛṛone parenta iapapate taumatan Yahudi. I tou nandolokki Hatah mangonggollu suratta udde si Ester wuṛṛu manal᷊a'an hatto udde si tou, wuṛṛu lai maddorongnga tadea'u Ester sumaruanna ratu sumal᷊ande aakkanna hunan balahanne.

⁹Ana see Hatah inaite ringanni Ester wuṛṛu namasingkattu tanatan Mordekhai si tou.

¹⁰Arawe Ester nandolokki Hatah mabbelengnga apia ringanni Mordekhai uaapiddu tanata indi,

¹¹“Suapan taumata, mawae esakka aroddi lai wawine, apan ringannu tawe niwaggoanna, sumaruanna ratu su rallakku lal᷊ummu wal᷊en araratuanna, ṛinone iṛṛuumanna mate. Uddewe manga atoranna wuṛṛu anambon taumata manattakka wuassu mananantiro ratu maddatingngu tumanangnge su manga propinsi, masingkattu atoranna udde. Tumba'u pia sambau dal᷊anna tadea'u mal᷊iu wuassu manga atoranna udde, eteudde napawe ratu mangul᷊ukku ta'inne wul᷊awanna su taumata udde. Amungkangngu udde nariaddi, i tou sarun masal᷊amatta. Arawe sambul᷊ante indi i ya'u tawe niwaggoannu ratu.”

¹²Ana see Hatah namasingkattu tanatan Ester udde si Mordekhai.

¹³Ne Mordekhai nangirimmu pananaungnga indi si Ester, “Arie massunna i'o sarun lembon matammudda wuassu taumatan Yahudi waine, tumba'u ana waugu i'o uatana'a su wal᷊en araratuanna!

¹⁴Taumatan Yahudi sarun maasomba aontolla ringannu manambo lal᷊anne na'oman sara i mangitou masal᷊amatta. Arawe amungkangngu i'o sidutu mal᷊annabba sulal᷊ummu olangnge ereindi, i'o sassane sarun mate wuṛṛu amonannu iamangngu sarun masue wattinge. Isai masingkatta, asinungka sutempo ereindi i'o buatte nipile maola'a wo'i!”

¹⁵Ne Ester nangirimmu watti'a indi si Mordekhai,

¹⁶“Ammul᷊a'e anambon taumatan Yahudi apan uatana'a su Susan tadea'u umal᷊iomangku. Imbaṛṛangnga umanna wuṛṛu ma'inumma al᷊annune tallu allo tallu ṛabbi. I ya'u sassane wuṛṛu manga maṛṛuala mangangimbe'u sarun mappuasa lai. Wua'udde i ya'u sumaruante ratu, salaiwe udde lumawangnga atoranna. Amungkangngu i ya'u ṛinone mate ana waugu udde, wala'e i ya'u mate!”

¹⁷Ana see Mordekhai inaite wuṛṛu na'ola'e anambon apan nitanatan Ester si tou.