Read Talaud ESTER 5 Bible Online

ESTER 5 - Talaud bible

ESTER 5

¹Su allo atallune i tou nappuasa, Ester nalluṛṛen laubbu wo'ine, ana inaite watukku rallakku lal᷊ummu wal᷊en araratuanna wuṛṛu dirumarisikka su saruannu ngaran balairung. Ratu tantal᷊anna ua'ianna su adderan araratuanna uasaruanna ngara udde.

²Napawe i tou naasilo si Wo'i Ester uarisikka su liudde, i tou naapendamma niumakkanni tou wuṛṛu nangul᷊ukku ta'inne wul᷊awanna si Ester. Ne Ester niumamatte, ana see nangeṛṛetta pentakku ta'inna udde.

³Wua'udde ratu naiwal᷊ote, “Pia apa, Awingku? Apa apan ipaapulunu? Wal᷊oa'e! Salaiwe i'o maddorongnga sambageanganna wuassu araratuangku, sarun ta'u ionggolla lai.”

⁴Ester sinumimbakka, “Amungkangngu Tuangnga maluassa, ṛinone ṛabbi indi Tuangnga wuṛṛu Haman rumanta su sal᷊iwangnga apan niola'u allangnga hunan Tuangnga.”

⁵Ratu nandolokki Haman paal᷊ihakka rumanta, tadea'u itarua wotongnge ma'itu'a noten Ester. Ne itarua nirumantate su sal᷊iwangnga apan niola'i Ester udde.

⁶Sutempo ma'inumma anggore, ratu naiwal᷊o, “Orassa indi wal᷊oa'e apa apan ipaapulunu. Suapa apan raddorongannu sarun ta'u ionggolla, salaiwe sambageanganna wuassu araratuangku!”

⁷Ester sinumibakka,

⁸“Amungkangngu Tuangnga mal᷊uassa manuungngu sasal᷊anden allangnga, ṛinone Tuangnga wuṛṛu Haman rumanta apia su sal᷊iwangnga apan olaannu allangnga tiṛṛabbi ṛabbi. Mantewe su sal᷊iwangnga udde allangnga mangapiddu darorongngu allangnga si Tuangnga.”

⁹Haman napul᷊ete wuassu sal᷊iwangngi Wo'i Ester ringannu naungnga apan lulluassa. Arawe napawe su ngara sasuttannu Wal᷊en araratuanna i tou naasilo si Mordekhai apan tawe dirumarisikka mangaddatta si tou, i tou mangke nasa'u atonna.

¹⁰Arawe i tou naṛṛaddannu naungnge wuṛṛu napul᷊ete watukku wal᷊ene. Napawe na'omate poiaroddi i tou nandolokku manga hawene niaparanta wuṛṛu naddorongnga si Zeres, awingnge, tadea'u u'ma'ianna suaddio'a ringanni mangitou.

¹¹Ana see i Haman mammahiate si mangitou wuṛṛu mammungaten paa'alane, pangkanne wahewalla apan nionggollu ratu, wuṛṛu pangkanne apan marau mattangngaṛṛanne wuassu manga mamanara waine.

¹²Wisarane lai, “Ewe'e lai Wo'i Ester tumba'u nannote si ya'u wuṛṛu ratu watukku sal᷊iwangnge apan niolangnge hunang kami, wuṛṛu tiṛṛabbi ṛabbi iambua ninoteanne apia.

¹³Arawe sarangkanambone udde tawe atappasanne, amungkangngu su al᷊annune indi i ya'u ta'e maasilo si Mordekhai, taumatan Yahudi udde, ua'ianna su ngara sasuttannu wal᷊en araratuanna.”

¹⁴Naaringikka udde awingnge wuṛṛu anambon manga hawene naṛṛingidda arendi, “Doloṛṛa'e ma'ola'a diṛṛi panggahantonganna atanggakke daruan pul᷊o dua su meterene. Ana see tiṛṛabbine, marua allo atonna paddorongke su ratu tadea'u manggantongngi Mordekhai su diṛṛi udde. Ringannu aroddi i'o wotongnge inai watukku sal᷊iwangnga udde ringannu naungnga apan matammudda.” Ṛingidda udde mapia atonna tumuṛṛuttu addapatti Haman, ana waugu i tou lapiddu napaola'u diṛṛi panggahantonganna udde.