Read Talaud ESTER 6 Bible Online

ESTER 6 - Talaud bible

ESTER 6

¹Su ṛabbi udde lai ratu tawe naatiilla. Ana waugu udde i tou nandolokka niapaanu wuke woṛṛettu watti'u araratuanna wuṛṛu nandolokku taumata mabbasan wuke udde.

²Sulalumme niasangkal᷊anne woṛṛetta manungku Mordekhai buatte namasingkattu hol᷊agu pamamate ratu apan niṛṛiinni Bigtan wuṛṛu Teres, ruan katou tembonanne apan niṛṛae mandiagga wabbo'an ratu.

³Ratu naiwal᷊o, “Aaddatta wuṛṛu wawaekku inasaharanna apa apan buatte nionggolla si Mordekhai udde?” Manga mangangimbe sinumibakka, “I tou tawe nanengkamma apa-apa.”

⁴Ana see ratu naiwal᷊o, “Isai wuassu mamanara'u apan orassa indi sulal᷊ummu wal᷊en araratuanna?” Inauranna Haman wakkute sinumutta su rallakku wal᷊en araratuanna; i tou inai maddorongnga su ratu manggantongngi Mordekhai su diṛṛi apan buatte niaparisikka udde.

⁵Manga mangangimbe udde sinumibakka ratu, “Haman udde su wal᷊en araratuanna wuṛṛu i tou pia pandumma sumaruanna si Tuangnga.” “Doloṛṛa'a pasutta'a i tou,” unnu ratu.

⁶Napawe Haman sinumutta, ratu nabbisara si tou, “Pia taumata apan ta'u onggol᷊annu aaddatta wahewalla. Apa apan sarun ta'u olaanna si tou?” Haman naṛṛingidda, “Isai lai apan sarun onggol᷊annu ratu aaddatta aroddi ahewalle? Tumba'u i ya'u!”

⁷Ana waugu udde i tou sinumibakka, “Rinone taumata udde luṛṛeannu laubbu awawantuga apan inanaramanna ilalluṛṛen Tuangnga sassane. Ana see awal᷊on Tuangnga logaṛṛannu manga hamabarannu araratuanna.

⁹Sangkatou tembonannu araratuanna wuassu ṛuangannu papunna ṛinone malluṛṛen laubba udde su taumata apan sarun addatanni Tuangnga udde, ana see mangapiddu taumata udde mammal᷊iwutta soa ringannu uasa'e awal᷊on Tuangnga umamattu lapangannu soa. Tembonanne udde sarun uamamatta su saruanne lapiddu mabbisara, ‘Etearendi ratu mangonggollu aaddatta su taumata apan aaddatanne!’ ”

¹⁰Wua'udde ratu nabbisarate si Haman, “Pasaṛṛawutta, panganu laubba wuṛṛu awal᷊o udde wuṛṛu onggol᷊a'e anambon aaddatta udde si Mordekhai, taumatan Yahudi udde. Ola'e ere apan niwisaranu tanginna, ringannu tawe manggaingnga saran sambau. I tou wotongnge sombannu tantal᷊anna ua'ianna su saruannu ngara sasuttannu wal᷊en araratuanna.”

¹¹Ana see Haman nanganu laubba wuṛṛu awal᷊o udde see niluṛṛe si Mordekhai. Napawe Mordekhai uasa'ete awal᷊o udde, Haman nangapiddi tou namal᷊iwutta niumamattu lapangannu soa, lapiddu mangngintul᷊i, “Pa'ellege, etearendi ratu mangngonggollu awawantuga su taumata apan aaddatanne!”

¹²Wua'udde Mordekhai nabbelengke watukku ngaran wal᷊en araratuanna. Arawe Haman nasasaṛṛawutta napul᷊e. I tou maddiri asiloannu taumata ana waugu i tou tumamiten massili, ne i tou nanaappa hatine.

¹³Su awingnge wuṛṛu manga hawene i tou nabbatti'a apa apan buatte niapendamanne. Wua'udde awingnge wuṛṛu manga hawene apan pande udde nabbisara si tou, “I'o mannattakke iawaddon Mordekhai. I tou taumatan Yahudi wuṛṛu i'o tawe maaro'appa si tou. I tou atonna sarun mamaddonu.”

¹⁴Tantal᷊anna i mangitou ta'e uahahatton Haman, manga tembonannu wal᷊en araratuanna nirumanta ringannu uasasaṛṛawutta inai manguntuddi Haman watukku sal᷊iwangnga apan niola'i Ester.