Read Talaud ESTER 9 Bible Online

ESTER 9 - Talaud bible

ESTER 9

¹Panginsueanne nia'omante allo appul᷊one tallu wul᷊anna Adar, eteudde allo apan nitantunna mapaamattu parentan datu su manga taumatan Yahudi. Allo udde laṛṛaddoannu manga seettu walahannu Yahudi tadea'u mamaddon balahanna udde. Arawe wutte'e ete taumatan Yahudi apan namaddon mangitou.

²Suapan soa, manga taumatan Yahudi naammulla wuṛṛu nassanggal᷊oma tadea'u mamangalo anambon taumata pia pandumma lal᷊eo su saruanni mangitou. Manga walahanna su al᷊awo'u tampa nabbal᷊i matta'utti mangitou na'oman sara tawe saran sangkatou apan waṛṛani sumaruanna si mangitou.

³Ewe'e lai anambon tembonannu propinsi, manga gubernure, bupati wuṛṛu mamanaran araratuanna massumbala taumatan Yahudi ana waugu sarangkanambone matta'utti Mordekhai.

⁴Su ahewallu araratuanna taumata masingkatta manungku Mordekhai lembon pia taṛṛino su wal᷊en araratuanna wuṛṛu lembon uataṛṛino lai.

⁵Etearoddi walahannu Yahudi wotongnge ma'ola'a walate apulune ringannu seetti mangitou, i mangitou mammangalo ringannu hal᷊ele wuṛṛu namate.

⁶Su Susan, inangngusoan araratuanna, taumatan Yahudi namate lima ṛasutta suatoune.

⁷Suwallatti mangitou niasangkal᷊anna siri mapul᷊o ana'a esakki Haman ana'i Hamedata, seettu Taumatan Yahudi ahewal᷊anne. I mangitou eteudde; Parsandata, Dalfon, Aspata, Porata, Adalya, Aridata, Parmasta, Arisai, Aridai wuṛṛu Waizata. Arawe taumatan Yahudi tawe na'ola'a pangangaṛṛo.

¹¹Su allo udde lai taumata namasingkatta su ratu anambon manga taumata apan niapate su Susan.

¹²Wisaran tuangnga si Wo'i Ester, “Tumba'u su Susan taumatan Yahudi buatte namate 500 suatoune, nasutta siri mapul᷊o ana'i Haman. Nangillembote lai su manga propinsi! Waggate tanne apa apan niola'i mangitou poiaroddi! Ne, apa lai apan dorongannu orassa indi? Wal᷊oa'e, i'o sarun maasomba!”

¹³Ester sinumibakka, “Amungkangngu Tuangnga mal᷊uassa, ṛinone taumatan Yahudi matana'a su Susan indi tiṛṛabbi marua allo iwala manul᷊e apia apa apan buatte niolangnge su allo indi. See lai, ṛinone winal᷊unannu manga ana'i Haman ihantongnga su manga diṛṛin panggantonganna.”

¹⁴Ana see ratu nangonggollu parenta tadea'u mapaamattu darorongngi Ester; suratta parenta su soa Susan niapasabbangnga wuṛṛu winal᷊unannu siri mapul᷊o ana'i Haman nihantongnga.

¹⁵Nariaddi su allo appul᷊one appatta wul᷊anna Adar, manga taumatan Yahudi su Susan naammulla apia wuṛṛu namate 300 suatoune lai su soa udde. Wuṛṛu paassa indi lai i mangitou tawe nangaṛṛo.

¹⁶Manga taumatan Yahudi apan uatana'a su manga propinsi lai buatte naammulla wuṛṛu nanahekku watanganni mangitou. I mangitou namaddon seenne wuṛṛu namate 75.000 suatoune apan maddantinni mangitou. Arawe i mangitou tawe nangaṛṛo.

¹⁷Arariaddianna udde nariaddi su allo mapul᷊o tallu wul᷊anna Adar. Allo manansunna, su allo appul᷊one appatta, i mangitou tawe namate sisai-sai, ewe'e nallaghun allo udde ringannu lullala'a.

¹⁸Arawe taumatan Yahudi apan uatana'a su Susan nallaghun allo appul᷊one l᷊ima maola'a allo wahewalla, ana waugu i mangitou buatte namate seetta su allo appul᷊one tallu wuṛṛu appul᷊one appatta, ana see nangillol᷊o su allo appul᷊one tallu wuṛṛu appul᷊one appatta, ana see nangillolo su allo appul᷊one l᷊ima.

¹⁹Ana waugu udde taumatan Yahudi apan uatana'a su manga soa maraddio'a mannaungnga allo appul᷊one appatta wul᷊anna Adar maola'a allon lal᷊ala'a, allo al᷊al᷊uassa lapiddu i mangitou uaa'onggollu hadiah erenai anna.

²⁰Wua'udde Mordekhai namoṛṛettu al᷊awo'u arariaddianna udde wuṛṛu nangirimmu suratta su anambon taumatan Yahudi su ahewallu araratuannu Persia, mawae ingana'a marau, aroddi lai marani.

²¹Lal᷊oṛṛon suratta udde eteudde parenta mallaghu allo appul᷊one appatta wuṛṛu appul᷊one l᷊ima wul᷊anna Adar suapan tonna.

²²Ana waugu ete su manga allo udde i mangitou buatte namaddon manga seetti mangitou, na'oman sara asasusa wuṛṛu atataddu'i mangitou nawal᷊u naola'a al᷊al᷊uassa wuṛṛu lal᷊ala'a. Ana waugu udde i mangitou ṛinone mallaghun manga allo udde ringannu andeangnga wuṛṛu sal᷊iwangnga see uaa'onggollu anna wuṛṛu mattahia aonggolla su taumata asiangnga.

²³Taumatan Yahudi tinumuṛṛutta parentan Mordekhai udde wuṛṛu etearoddi ramea udde naola'a inanaramanna suapan tonna.

²⁴Haman ana'i Hamedata, papapulunni Agag, seettu taumatan Yahudi apan wahewalla, buatte nandammen undi apan isassaggo lai, “purim” hunan ipanantunnu allo paṛṛadda'a taumatan Yahudi; i tou buatte nanggol᷊aga mamate si mangitou.

²⁵Arawe Ester sinumaruanna ratu, wuṛṛu ratu nangonggollu parenta uawoṛṛetta na'oman sara hol᷊aga lal᷊eo apan niola'i Haman naṛṛia'a su watanganne sassane, wuṛṛu lai i tou see al᷊aṛṛanangnge nihantongnga su diṛṛin panggahantonganna.

²⁶Ana waugu udde manga allo wahewalla udde nisaggo Purim. Suratti Mordekhai wuṛṛu al᷊awo'a apan buatte niapendamannu taumatan Yahudi,

²⁷pangillul᷊eanne i mangitou na'ola'a sambau atoranna su watanganni mangitou sassane, su papapulunnu mangitou wuṛṛu su anambon taumata apan sarun maola'a reengannu walahannu Yahudi. Tumuṛṛuttu atoranna udde suapan tonna i mangitou ṛinone mallaghun allo darua apan buatte nitantunni Mordekhai.

²⁸Nitantunna lai manungku saran mal᷊annu-l᷊annu manga allon Purim udde sidutu nannaunganna wuṛṛu ilallaghun suapan amonannu Yahudi wuassu al᷊awo'u uukka sulal᷊ummu suapan propinsi wuṛṛu suapan soa.

²⁹Wal᷊ine wua'udde lai, suaddio'a ringannu suratti Mordekhai, Wo'i Ester ana'i Abihail namoṛṛettu suratta aruane, apan mannohassa lal᷊oṛṛon suratti Mordekhai su ola'u Purim udde.

³⁰Suratta udde niiringnga su anambon taumatan Yahudi, wuṛṛu manga suratta apan nial᷊inna niiringnga su 127 propinsi su araratuannu Persia. Suratta lal᷊apirannu aal᷊iomanna tadea'u walahannu Yahudi mal᷊uassa wuṛṛu mal᷊angnganna.

³¹Suratta udde mangngaṛṛa'a lai tadea'u i mangitou wuṛṛu papapulunni mangitou mallaghun manga allon Purim sutempo apan naṛṛino, su ereapa i mangitou mallaghun tempon puasa wuṛṛu tempon lullal᷊o. Eteudde lal᷊oṛṛon suratti Mordekhai wuṛṛu Wo'i Ester.

³²Parentan Ester apan nanantunnu manga atorannu Purim, niwoṛṛetta sulal᷊ummu buke.