Read Talaud SASABANGNGA 11 Bible Online

SASABANGNGA 11 - Talaud bible

SASABANGNGA 11

¹MAWU nabbisara si Musa, “I Ya'u sarun mangema'u sambau asasilaka lai su ratu Mesir wuṛṛu tumanangnge. Wua'udde, i tou sarun mamallossi yamiu inai mapul᷊e. Ewe'e i yamiu sarangkanambone sarun limbuaṛṛanni tou wua isindi.

²Ana waugu udde paggahattoten balahannu Israel; doloṛṛa'e i mangitou madorongnga lal᷊ogakka wul᷊awanna wuṛṛu sal᷊a'a wuassu al᷊indonganni mangitou.”

³MAWU na'ola'a taumata Mesir masaṛṛionto'a su taumatan Israel. Wuṛṛu i Musa nabbal᷊i taumatan apan a'adatannu manga mammamanaran araratuanna wuṛṛu anambon tumana'u Mesir.

⁴I Musa nabbisara ratu, “Etearendi wisara MAWU, ‘Iraṛṛangngo mattanangan alloarane i Ya'u sarun mamal᷊intaddu leta'u Mesir.

⁵Suapan ana'a esakka pahul᷊une su Mesir sarun mate, manattakka wuassu ana'u ratu maddatingngu ana'u manga allangnga wawine apan manggilingu gandumma. Ana'a apan paarorone niasungkangnga wuassu anambon binatangnga sarun mate lai.

⁶Su ahewallu Mesir sarun aringiṛṛanna tingikku lal᷊uai apan ma'ikkatta, ere lai taambe nariaddi wuṛṛu sarun tate mariaddi apia.

⁷Arawe su pattangngannu Israel, mawae ete taumata aroddi lai winatangnga taweddu manalawa'a. Ne i yamiu sarun maasingkatta manungku i Ya'u, MAWU, na'ola'a uapapaṛṛala su taumata Mesir wuṛṛu taumatan Israel.’ ”

⁸Panginsuenne i Musa nabbisara, “Anambon mammamanaran araratuanni Tuangku sarun dumanta wuṛṛu sarun umal᷊intudda su saruangku wuṛṛu madorongnga tadea'u i ya'u wuṛṛu balatiangku manantangngu wanua indi. Wua'udde i ya'u inaite mapul᷊e.” Ana see ringannu nasa'u atonna i Musa nanantangngu ratu.

⁹MAWU nabbisara si Musa, “Ratu tawe maddaringikka wisaranu, tadea'u i Ya'u wotongnge ma'ola'a mannamboanna lai al᷊aṛṛindu'a su ahewallu Mesir.”

¹⁰I Musa wuṛṛu i Harun na'ola'a anambon al᷊aṛṛindu'a udde su saruannu ratu, arawe MAWU na'ola'a si tou naungnge maattikka, na'oman sara i tou maddiri mamalan taumatan Israel manantangngu wanuane.