Read Talaud SASABANGNGA 12 Bible Online

SASABANGNGA 12 - Talaud bible

SASABANGNGA 12

¹MAWU nabbisara si Musa wuṛṛu si Harun su leta'u Mesir. Wisara-Ne,

²“Wul᷊anna indi maola'a wul᷊anna paarorone wuassu tonna pananaungannu.

³Wal᷊oa'e parenta indi su anambon Israel: Su allo appul᷊one wul᷊anna indi, suapan taumata esakka ṛinone mamototta sambau ana'u domba inasanna su sambau ringannu amonanne.

⁴Amungkangngu lal᷊oṛṛon amonannu udde tumanite addio'a manginsue sambau ana'u domba, ne amonanna udde wuṛṛu al᷊indonganne apan aranianne wotongnge suadio'a uminassa ana'u domba udde. Ana'u domba udde ṛinone tahianna tumuṛṛuttu anambon taumata apan uminassa.

⁵I yamiu wotongnge mamile domba ara'e ambinga, arawe ṛinone esakka, uukke santonna wuṛṛu tawe sangkulle.

⁶I yamiu sarun manahipunna maddatingngu allo appul᷊one appata. Su allo udde, wawallone, Israel sarangkanambone ṛinone mamototta ana'u domba udde.

⁷Daṛṛane addio'a wuṛṛa'a su darua diṛṛi ngara wuṛṛu su pua ngaran bal᷊e su tampa i mangitou u'inassa.

⁸Ṛabbi udde lai remene ṛinone itambunna wuṛṛu inasanna ringannu sayore mapetta wuṛṛu roti tawe ragine.

⁹Ana'u domba udde ṛinone pangganganna tal᷊impu'u suadio'a ringannu puane, leddane wuṛṛu lal᷊oṛṛon tianne. Inasse remene apan buatte nipangganga udde, arie piaddu uminassa tata ara'e itunna.

¹⁰Arie pallambea'a saran addio'a wuassu remene udde maddatingngu marua allo; amungkangngu pia lambene, ṛinone itambunna ma'oman sara masue.

¹¹Su tempo umanna i yamiu uapeddete peddetu amatanna, ringannu silope su ledda wuṛṛu ta'inna su lima. I yamiu rinone paasaṛṛawutta umanna. Eteudde ramean Paskah ipangadatta si Ya'u, MAWU.

¹²Su tempo ṛabbi Ya'u sarun mamal᷊intaddu ahewallu leta'u Mesir, wuṛṛu mamate suapan ana'a esakka pahul᷊une, mawae ete taumata aroddi lai winatangnga. I Ya'u ṛinone makkuumannu anambon mawu su Mesir, ana waugu ete i Ya'u MAWU.

¹³Daṛṛa su ngaran bal᷊enu sarun maola'a tiala wuassu manga wal᷊en atatanaannu. Amungkangngu i Ya'u maasilo daṛṛa udde, i yamiu Ta'u sabbianna wuṛṛu tawe pateanna su tempo i Ya'u makkuumannu Mesir.

¹⁴Allo udde ṛinone maola'a pananaunganni yamiu maola'a allo wahewa su MAWU. Su sarangkal᷊o'engnge allo udde ṛinone ilallaghun kamiu suapan tonna.”

¹⁵MAWU nabbisara, “Pitu allo al᷊annune i yamiu imbaṛṛangnga umanna roti pia ragine. Su allo paarorone anambon ragi ṛinone iapasabangnga wuassu wal᷊enu, ana waugu al᷊annune pitu allo udde pia sangkatou niumanna roti pia ragine, i tou tawe wotongnge mareengnga su al᷊aṛṛana-U.

¹⁶Su allo paarorone, wuṛṛu lai su allo appitune, i yamiu ṛinone ma'ammulla mattaṛṛamawu. Su allo udde imbaṛṛangnga i yamiu mammanara tabene'e mallaha anna.

¹⁷Su allo udde walahannu sarangkanambone Ta'u iapidda sumabbangnga wuassu Mesir. Ana waugu udde sarangkal᷊o'engnge, suapan tonna, allo udde ṛinone nanaunganni yamiu maola'a sambau allo wahewa.

¹⁸Su wul᷊anna paarorone, manattakka su allo appul᷊one appata ṛabbi, maddatingngu allo ruan pul᷊o assa ṛabbi, imbaṛṛangnga i yamiu umanna roti apan pia ragine. Al᷊annune pitu allo udde anambon ragi ṛinone iapasabangnga wuassu wal᷊enu. Taumatan Israel ara'e taumata raho apan su al᷊annun damea udde u'anna roti pia ragine tawe mareengnga al᷊aṛṛana-U.”

¹⁹

²⁰

²¹I Musa namago anambon piaṛṛa'u Israel wuṛṛu nabbisara si mangitou, “Roote wuṛṛu panganute hausannu amonannu sambau ana'u domba ipallaghun ramean Paskah.

²²Panganute lai samba'issa hisop, ammoa'a sulal᷊ummu mangko apan lal᷊oṛṛoannu daṛṛa domba udde, ana see wuṛṛa'a su darua sal᷊aba'u ngara wuṛṛu pua ngara al᷊iurosone wuassu wal᷊enu. Maddatingngu marua'allo imbaṛṛangnga pia sangkatou su wallati yamiu manantangngu wal᷊en.

²³Su tempo MAWU mamal᷊intaddu wanua indi mamate manga taumata Mesir, MAWU sarun ma'elega daṛṛa su sal᷊aba'u wuṛṛu su pua ngaran bal᷊enu; ne i Tou sarun sumabbi wuṛṛu tawe mamalan Mala'ekattu Papate sumutta su wal᷊enu wuṛṛu mamate si yamiu.

²⁴I yamiu wuṛṛu manga anangngu ṛinone tumuṛṛutta parenta udde saran mal᷊annu-l᷊annu.

²⁵Amungkangngu i yamiu sumuttate su wanua apan pina'ire MAWU si yamiu, i yamiu ṛinone ma'ola'a lal᷊aghu indi.

²⁶Amungkangngu manga anangngu maiwal᷊o, ‘Apa atappasanne lal᷊aghu indi?’

²⁷I yamiu ṛinone sumimbakka, ‘Indi sasamban Paskah ipangaddata MAWU, ana waugu wal᷊en manga taumatan Israel sinabbian-Ne, su tempo i Tou namate manga ana'a esakka pahul᷊u su Mesir, wuṛṛu i ite niwala-Ne wiakka!’ ” Ne niumal᷊intuddate manga taumatan Israel massubba.

²⁸Ana see i mangitou inaite wuṛṛu na'ola'a apa apan nirolokku MAWU si Musa wuṛṛu si Harun.

²⁹Ṛabbi mattangnga udde MAWU namate anambon ana'a esakka pahul᷊un balahannu Mesir, manattakka wuassu ana'u ratu, maddatingngu ana'u manga taumata sulal᷊ummu tutupanna. Anambon binatangnga apan paarorone niasungkangnga lai nipate.

³⁰Ṛabbi udde ratu, manga mammamanaran araratuanna wuṛṛu anambon taumata Mesir napu'o. Su ahewallu wanua Mesir niaringikka tingikku lal᷊allu apan ma'ikkata ana waugu tawe saran sambau wal᷊en tawe niapateannu sangkatou ana'a esakka.

³¹Ṛabbi udde lai, ratu namago si Musa wuṛṛu si Harun wuṛṛu nabbisara, “Pangingkatte wua isindi, i yamiu sarangkanambone! Tantanga'e wanua'u! Roote passubba Ruatanu ere buatte niroronganni yamiu.

³²Apira'e lai anambon sapi, domba, wuṛṛu ambingngi yamiu, wuṛṛu roote! I ya'u lai doronge al᷊amatta!”

³³Manga taumata Mesir mammata'u taumatan Israel tadea'u paal᷊ihakka manantangngu wanua udde. Unni mangitou, “Yami sarangkanambone sarun mate amungkangu i yamiu tawe inai!”

³⁴Ana see manga taumatan Israel nanganu manga panci mangitou apan lal᷊oṛṛoannu roti tawe ragine, nipi'unnu mal᷊aṛṛenessa, wuṛṛu nipasanna.

³⁵I mangitou lai tinumuṛṛutta apa apan niwal᷊o i Musa, eteudde madorongnga manga lal᷊ogakka wul᷊awanna wuṛṛu sal᷊a'a wuṛṛu laubbu manga taumata Mesir.

³⁶MAWU na'ola'a naungngu taumata Mesir masaṛṛionto'a su taumatan Israel, na'oman sara i mangitou nangonggolu al᷊awo'a apan raddorongannu taumatan Israel. Ringannu olangnge udde taumatan Israel nangapiddu pa'a'alan taumata Mesir sinumabbangnga wuassu wanua udde.

³⁷Taumatan Israel inaite wuṛṛu niumamattu ledda wuassu soa Raamses watukku soa Sukot. Reenganni mangitou sarangkanambone 600.000 su atoune, tawe nareengnga wawine wuṛṛu al᷊aṛṛana'a.

³⁸I mangitou uaapiddu manambo sapi, domba wuṛṛu ambinga. Taumata waine lai manambo tinumantalongnga.

³⁹I mangitou nallol᷊o roti tawe ragine wuassu taponna apan niapiddi mangitou wuassu Mesir. I mangitou nilimbuaṛṛanna wua isudde ringannu namaṛṛindu'a, na'oman sara tawe naasaddia wal᷊unna.

⁴⁰Walahannu Israel buatte natana'a su Mesir 430 su tonnane al᷊annune.

⁴¹Su allo panginsueannu tonna 430 udde, anambon barisannu al᷊aṛṛana'u MAWU nanantangngu leta'u Mesir.

⁴²Ṛabbi udde MAWU sidutu uataṛṛapa manguntuddi mangitou sumabangnga wuassu Mesir. Wuṛṛu eteudde lai ṛabbi apan sarangkal᷊o'engnge ionggola su MAWU maola'a sambau ṛabbi pananaunganna. Su ṛabbi udde walahannu Israel ṛinone uatehamma.

⁴³MAWU nabbisara si Musa wuṛṛu si Harun, “Eteindi atorannu ramean Paskah. Taumata raho tawe wotongnge uminassa ṛemessu domba apan nionggola sasamba su allon Paskah.

⁴⁴Arawe allangnga apan niwallianni yamiu wotongnge lai uminassa, amungkangngu i tou buatte nisunatta.

⁴⁵Taumata rumaranta ara'e taumatan sewa tawe wotongnge uminassa.

⁴⁶Ṛemessu domba sarangkanambone udde ṛinone inasanna sulal᷊ummu wal᷊en, wuṛṛu imbaṛṛangnga iapidda su liudde. Arie pappadi saran sambau duṛṛine.

⁴⁷Walahannu Israel sarangkanambone ṛinone mallaghun andeangnga udde.

⁴⁸Taumata apan tawe nisunatta tawe wotongnge umanna su andeangnga udde. Amungkangngu sangkatou taumata raho apan uatana'e ringanni yamiu maapulu mallaghun Paskah ipangaddata si Ya'u, MAWU, anambon esakka sulal᷊ummu amonanne ṛinone sunatanna dorone. Wua'udde i mangitou naola'e taumatan Israel tutune, wuṛṛu wotongnge mallaghun ramean Paskah.

⁴⁹Atoranna apan uasul᷊ungnga ia'amatta su taumatan Israel tutune wuṛṛu taumata raho apan namanuate su wallati yamiu.”

⁵⁰Taumatan Israel sarangkanambone matuṛṛutta wuṛṛu maddaringikka sarangkanambone apan niparenta MAWU si Musa wuṛṛu si Harun.

⁵¹Su allo udde MAWU nangapiddu anambon balagu Israel sinumabbangnga wuassu Mesir.