Read Talaud SASABANGNGA 13 Bible Online

SASABANGNGA 13 - Talaud bible

SASABANGNGA 13

¹MAWU nabbisara si Musa, “Onggol᷊a'e sasamba anambon ana'a esakka pahul᷊u si Ya'u. Suapan ana'a esakka pahul᷊u su Israel, wuṛṛu suapan binatangnga esakka wuṛṛu paarorone niasungkangnga, udde tatahuanang-Ku.”

³I Musa nabbisara su balahannu Israel, “Su allo indi MAWU namallossi yamiu ringannu taṛṛino-Ne apan bahewalla, na'oman sara i yamiu wotongnge sumabbangnga wuassu Mesir, su tampa i yamiu a'allanganna. Ana waugu udde, allo indi ola'e allo pananaunganna. Imbaṛṛangnga umanna roti apan pia ragine.

⁴Su allo indi, allo paarorone su wul᷊anna Abib ara'e wul᷊anna paarorone, i yamiu nanantangngu wanua Mesir.

⁵Ringannu sasalu MAWU naddiandi su iupungngu al᷊amonanu tadea'u manantilla si yamiu wanuan balahannu Kanaan, Het, Amori, Hewi wuṛṛu Yebus. Napawe MAWU nangapiddi yamiu su wanua apan ala wuṛṛu masuwukka udde, suapan tonna sulal᷊ummu wul᷊anna Abib, i yamiu ṛinone ma'ola'a lal᷊aghun ramea indi.

⁶Al᷊annune pitu allo ṛinone i yamiu umanna roti apan tawe ragine, wuṛṛu su allo appitune olaanna lal᷊aghun damea ipangaddata MAWU.

⁷Al᷊annune pitu allo i yamiu imbaṛṛangnga umanna roti apan pia ragine, wuṛṛu su ahewallu wanuanu imbaṛṛangnga pia ragi ara'e saranapa apan pia ragine.

⁸Su panattaṛṛannu ramea udde i yamiu ṛinone mabbatti'a su anangngu esakka manungku sarangkanambone udde niola'i yamiu ana waugu al᷊awo'a apan buatte niola'u MAWU si yamiu su tempo i yamiu nanantangngu wanua Mesir.

⁹Ramea indi maola'a pananaunganna si yamiu naal᷊ihidda tatiala apan niwa'issa si ta'iakka ara'e su pakkannu. Ramea indi mapaanaungnga si yamiu tadea'u sidutu mabbatti'a wuṛṛu mangngurumma manga Tita MAWU, ana waugu MAWU napaasabbangngi yamiu wuassu Mesir ringannu taṛṛino-Ne apan bahewalla.

¹⁰Laghua'e andeangnga indi suapan tonna su tempo apan buatte nitantunna.”

¹¹I Musa nabbisara su walahannu Israel, “MAWU sarun manguntuddi yamiu watukku wanua Kanaan apan nipa'ire-Ne ringannu sasalu si yamiu wuṛṛu iupungngu al᷊amonanu. Napawe leta'a udde naola'e pussaanu,

¹²i yamiu ṛinone mangonggolu ana'a esakka pahul᷊une wuṛṛu suapan binatangnga esakka apan niasungkangnga paarorone. Sarangkanambone udde tatahuanannu MAWU,

¹³arawe suapan keledai esakka apan paarorone niasungkangnga ṛinone waeṛṛanna su MAWU ringannu mamate sambau ana'u domba maola'a hahantine. Amungkangngu i yamiu maddiri mamaekka keledai udde, ullekkane ṛinone paddianna. Suapan anangngu esakka apan paarororne niasungkangnga ṛinone waeṛṛanna.

¹⁴Amungkangngu su allo sal᷊immurine anangngu maiwal᷊o apa atappasanne sarangkanambone udde, i yamiu ṛinone sumimbakka arendi, ‘Ringannu taṛṛino apan bahewalla MAWU nangapiddi ite sinumabbangnga wuassu wanua Mesir, su tampa i ite niallangnga.

¹⁵Su tempo ratu Mesir maatikka naungnge wuṛṛu maddiri mamallossi ite mapul᷊e, MAWU namate suapan ana'a esakka pahul᷊une su Mesir, mawae ete taumata aroddi lai winatangnga. Ana waugu udde i ite mangonggollu sasamba su MAWU suapan binatangnga esakka apan paarorone niasungkangnga, arawe waeṛṛanni ite ana'i ite pahul᷊une.’

¹⁶Inanaramanna udde nabbal᷊i pananaunganna si ite naal᷊ihidda tatiala apan niwa'issa su ta'iakka ara'e su pakkanni ite. Ringannu aroddi i ite sidutu iapaanaungnga manungku MAWU buatte napassabangngi ite wuassu Mesir ringannu taṛṛino apan bahewalla.”

¹⁷Napawe ratu Mesir buatte namallossu walahannu Israel napul᷊e, Ruata tawe nangapiddi mangitou umamattu lal᷊anna sumabbi wanua Filistin, salaiwe udde lal᷊anna aranianne. Ruata naṛṛingidda, “Aṛṛengenne manga taumata udde sumasilla amungkangngu maasilo manungku i mangitou ṛinone mapapangalo, ana see mabelengke su Mesir.”

¹⁸Ana waugu udde MAWU nangapiddi mangitou umamattu lal᷊anna mamal᷊iwutta wadda'a lol᷊okka mattuddan Tahal᷊oangngu Gelagah. Su tempo manantangngu Mesir, manga taumatan Israel udde pia lutangnge naal᷊ihidda mappapangalo.

¹⁹I Musa nangapiddu manga duṛṛin i Yusuf, ana waugu su tempo i tou wiakka, i Yusuf nandolokku taumata Mesir nassalu manungku ma'ola'a aroddi. Arendi tanatan i Yusuf, “Su tempo MAWU mamallossi yamiu, winal᷊unangku ṛinone iapiddi yamiu wuassu tampa indi.”

²⁰Taumatan Israel nanantangngu Sukot wuṛṛu naddasanna su soa Etam, su winggin badda'a lol᷊okka.

²¹Su tempo allo MAWU u'amatta su saruanni mangitou sulal᷊ummu pal᷊iaṛṛanna winabbawa wuṛṛu su tempo ṛabbi i Tou nalliu ṛoro si mangitou sulal᷊ummu pal᷊iaṛṛanna putungnga tadea'u mamantingiddu lal᷊anna. Ringannu aroddi i mangitou wotongnge umamatta allo wuṛṛu ṛabbi.

²²Su al᷊o'engngu allo pal᷊iaṛṛannu winabbawa udde su saruannu walahanna udde wuṛṛu su al᷊o'engngu ṛabbi pal᷊iaṛṛannu putungnga uarundinganna si mangitou.