Read Talaud SASABANGNGA 14 Bible Online

SASABANGNGA 14 - Talaud bible

SASABANGNGA 14

¹Wua'udde MAWU nabbisara si Musa,

²“Doloṛṛa'a taumatan Israel mabelengnga wuṛṛu maddasanna su saruannu soa Pi-Hahirot, su wallatu soa Migdol wuṛṛu Tahal᷊oangngu Gelagah, maranin soa Baal-Zefon.

³Ratu Mesir sarun massunna manungku taumatan Israel tantal᷊anna mammal᷊intaddu wanua indi wuṛṛu nilamammiṛṛante su wadda'a lol᷊okka.

⁴I Ya'u sarun mapaatikku naungngi tou, na'oman sara i tou mangenggenna si yamiu. Arawe I Ya'u sarun mapal᷊iatta'u taṛṛino-U su ratu Mesir wuṛṛu tantarane, wuṛṛu i mangitou sarun maasingkatta manungku ete i Ya'u MAWU.” Ana see taumatan Israel na'ola'a ere buatte nirolokku MAWU si mangitou.

⁵Napawe ratu Mesir naaringikka manungku balahannu Israel tinumal᷊angke, i tou wuṛṛu manga mammamanaran araratuanne sinumassilla wuṛṛu nabbisara, “Apate sarun olaanni ite? Anio i ite namalan manga taumatan Israel udde napul᷊e na'oman sara i ite niawul᷊iannu manga allangnga?”

⁶Ana see ratu nanaddiate keretan pangalo wuṛṛu tantarane.

⁷I Tou inaite ringannu anambon keretane nasutta lai annumu ṛasutta kereta apianne, apan sasa'eannu manga tembonannu tantarane.

⁸Atonna MAWU na'ola'a ratu naungnge maattikka, na'oman sara i tou nangenggenna taumatan Israel tatantal᷊anna sulal᷊ummu amatanna manantangngu wanua udde sulal᷊ummu lu'addu MAWU.

⁹Tantara Mesir ringannu anambon awal᷊o, kereta wuṛṛu sumasa'ene nangenggenna taumatan Israel, wuṛṛu nanantuṛṛutta si mangitou su rasanni mangitou su winggin tahal᷊oangnga maranin Pi-Hahirot.

¹⁰Napawe taumatan Israel naasilo ratu Mesir wuṛṛu tantarane nirumanta, i mangitou mangke nata'utta wuṛṛu mangngintul᷊i maiontolla su MAWU.

¹¹Unni mangitou si Musa, “Apa su Mesir tawe labbingnga, na'oman sara i'o nangapiddi yami tadea'u mate su tampa indi? Pa'ellege ana waugu inolaannu udde!

¹²Dorone su Mesir buatte niwal᷊on kami manungku olangnge udde sarun mariaddi! Yami buatte nabbal᷊o si'o tadea'u arie manal᷊asa'i yami, arawe mamalan kami sidutu maola'a allangnga su Mesir. Mappianne maola'a allangnga poiaroddi sul᷊ungnge'e mate su wadda'a indi!”

¹³I Musa sinumimbakka, “Arie pa'ata'utta! Paataṛṛange! I yamiu sarun maasilo apa inolaannu MAWU ipanal᷊amatta si yamiu. Taumata Mesir apan niasiloanni yamiu orassa indi, tate asiloanni yamiu apia.

¹⁴MAWU sarun manahekki yamiu, wuṛṛu i yamiu manin tawe ma'ola'a apa-apa.”

¹⁵Unnu MAWU si Musa, “Anio i'o mangngintul᷊i ma'iontolla? Doloṛṛa'e taumatan Israel paamata'a!

¹⁶Wattea'a ta'innu su wowon tahal᷊oangnga. Ne ua'e sarun matahia darua wuṛṛu taumatan Israel wotongnge lumewessa tahal᷊oangnga ringannu umamatta su wantane apan namarate.

¹⁷Taumata Mesir sarun Ta'u olaanna naungnge maatikka na'oman sara i mangitou sidutu mangenggenna taumatan Israel, wuṛṛu i Ya'u sarun mapal᷊iatta'u taṛṛino-U su ratu Mesir, tantarane, manga kereta wuṛṛu manga sumasa'ene.

¹⁸Ne taumata Mesir sarun maasingkatta manungku ete i Ya'u MAWU.”

¹⁹Ana see mala'ekattu Ruata, apan su saruannu tantaran Israel, nangingkatta su liudde. Wuṛṛu nangingkatte lai pal᷊iaṛṛannu winabbawa na'oman sara naaddo,

²⁰su wallatu tantara Mesir wuṛṛu tantaran Israel. Winabbawa udde naarandummam runia, na'oman sara al᷊o'engngu ṛabbi wuntuannu tantara darua udde tawe mapangundani sambau ringannu waine.

²¹Ana see i Musa namatten limane su wowon tahal᷊oangnga, wuṛṛu MAWU na'ola'a anginna ra'i tinumiuppa ringannu ma'ikkata na'oman sara ua'en tahal᷊oangnga neṛṛetta. Su al᷊o'engngu ṛabbi anginna udde tuttiuppa, wuṛṛu namal᷊u tahal᷊oangnga nabbal᷊i leta'a mamara.

²²Ua'e natahia darua, wuṛṛu taumatan Israel tinumumbete tahal᷊oangnga, i mangitou u'amatta su wantane apan mamara, wuṛṛu ua'e su aikatanna wuṛṛu aiṛṛi naal᷊ihidda darandungnga.

²³Taumata Mesir ringannu anambon awal᷊o, kereta wuṛṛu samasa'ene sidutu mangngenggenna wuṛṛu nanantuṛṛutta taumatan Israel watukku tangngan tahal᷊oangnga.

²⁴Maranin nallo MAWU na'ellega wuassu pal᷊iaṛṛannu putungnga wuṛṛu winabbawa su tantara Mesir wuṛṛu nanongkakki mangitou.

²⁵I Tou na'ola'a manga bolan kereta mangitou tawe tumiri, na'oman sara ringannu masahadda i mangitou umamatta. Unnu taumata Mesir, “MAWU mannahekku taumatan Israel mandoappa si ite. Weete i ite tumal᷊angke wua isindi!”

²⁶Unnu MAWU si Musa, “Wattea'e limanu su wowon tahal᷊oangnga, ne ua'e sarun massul᷊e apia, wuṛṛu mallammissa taumata Mesir, manga kereta wuṛṛu manga sumasa'ene.”

²⁷Ana see i Musa namatten limane su wowon tahal᷊oangnga wuṛṛu su tempo matannallo sumabangke, ua'e nassul᷊ete apia olangnge ere paarorone. Taumata Mesir mattinsahadda manal᷊amatta watanganne, arawe MAWU nallammissa si mangitou sulal᷊ummu tahal᷊oangnga.

²⁸Ua'en tahal᷊oangnga nabbal᷊i'a wuṛṛu nanaappa manga kereta, manga sumasa'ene, wuṛṛu anambon tantara Mesir apan mangngenggenna taumatan Israel su tangngan tahal᷊oangnga, na'oman sara i mangitou sarangkanambone nate.

²⁹Arawe su tempo taumatan Israel malliu tahal᷊oangnga, i mangitou u'amatta su wantane apan mamara, wuṛṛu ua'e naola'a darandungnga su aikkatanna wuṛṛu su aiṛṛine.

³⁰Su allo udde MAWU nanal᷊amatta balahannu Israel wuassu pangalon taumata Mesir, wuṛṛu i mangitou naasilo manga winal᷊unannu taumata Mesir nirangkalle su apanne.

³¹Napawe taumatan Israel naasilo ereapa MAWU ringannu taṛṛino-Ne apan bahewalla naparugin taumata Mesir, i mangitou tinumiangnga na'oman sara mangngimante si Tou wuṛṛu si Musa, allang-Nge udde.