Read Talaud SASABANGNGA 15 Bible Online

SASABANGNGA 15 - Talaud bible

SASABANGNGA 15

¹Ana see i Musa wuṛṛu manga taumatan Israel nangantarin aantari indi ipaddalo MAWU, “I Ya'u maapulu mangantari su MAWU, ana waugu i Tou naauntungke ringannu wahewalla. Anambon awal᷊o wuṛṛu sumasa'ene nituntungi Tou sulal᷊ummu tahal᷊oangnga.

²MAWU mananahe'u apan matohassa; ete i Tou nanal᷊amatta si ya'u. I Tou Ruata'u, i ya'u maapulu maddalo si Tou, Ruata sassubbannu iupungngu al᷊amona'u, wabbantuhangku i Tou.

³MAWU udde mamamagalo apan matohassa, MAWU, uddewe aran-Ne.

⁴Tantara Mesir wuṛṛu anambon keretane nituntungngi Tou sulal᷊ummu tahal᷊oangnga. Manga tembonannu tantara apan awaṛṛanianne nilumakkubba su Tahal᷊oangngu Gelagah.

⁵I mangitou niallupu tahal᷊oangnga apan mal᷊al᷊umma, wuṛṛu naal᷊ihidda watu niwontolla su wantane.

⁶Atatohan-Nu mangke ma'atiangnga, oh MAWU, I'o na'ola,a seetta nasue-sue.

⁷Ringannu awawantuga apan bahewalla I'o namate sarangkanambone apan lullawangnga Si'o. Asasa'u-Nu sussal᷊oi naal᷊ihidda putungnga, wuṛṛu nanutungnga si mangitou naal᷊ihidda laṛṛami.

⁸I'o nattiuppa tahal᷊oangnga, ua'e mallul᷊unna matanggakka, uarisikka matul᷊idda naal᷊ihidda darandungnga, na'oman sara wantan tahal᷊oangnga wotongnge amatanna.

⁹Unnu seetta, ‘I mangitou sarun ta'u enggenanna wuṛṛu ta'u sametanna, ta'u sawutanna hal᷊ele'u, wuṛṛu ta'u pateanna abbi i mangitou. Ana see anambon darotongngi mangitou ta'u anuanna, ta'u tahianna wuṛṛu ipaatta ma'oman sara mawusa.’

¹⁰Arawe MAWU ringannu paassa sumangngo nandantan allo ma'asusa su Mesir. I mangitou nilumakkuba naal᷊ihidda tima apan mawakkata sulal᷊ummu lua'a apan matandi'a.

¹¹Ruata suapane apan botongnge maasul᷊ungnga Si'o, oh MAWU Apan Lembon Mawantuga wuṛṛu na'ukkassa? Isai wotongnge mappa'ola'a manga al᷊aṛṛindu'a wuṛṛu inolaanna apan bahewalla ere MAWU?

¹²I'o nakkatadda lima uanannu, ne seetta nawul᷊ite niallupu runia.

¹³I'o nangehetta walahanna apan buatte niapasal᷊amatta indi, ana waugu I'o uanaungnga pa'aire-Nu. Ringannu atatohassa apan bahewalla i mangitou sasirungan-Nu, wuṛṛu niehen-Nu watukku leta'a apan susi.

¹⁴Manga walahanna naaringikka wuṛṛu mangngindo; taumatan Filistin wuṛṛu manga piaṛṛa'u Edom nata'utta. Taumatan Moab apan matohassa mangngiladda, taumatan Kanaan naungnge naadio'a.

¹⁶I mangitou tumaniten matta'utta nabbiala atatohassu MAWU. Su tempo al᷊aṛṛanang-Ngu sinumabbi, seetta tawe taṛṛino ipanaṛṛangnga; naal᷊iute walahanna apan buatte nipallossu MAWU.

¹⁷Ana see Israel niuntudda watukku tampa apan buatte nipile-Nu maola'a atatanaan-Nu. I mangitou namanua su wuiddu MAWU apan susi, su Wal᷊en apan buatte niolang-Ngu sassane.

¹⁸Ete I'o MAWU, Ratu, apan uaparenta saran mal᷊annu-l᷊annu.”

¹⁹Su tempo taumatan Israel namare tahal᷊oangnga, i mangitou niumamatta su wantane apan mamara. Arawe su tempo manga kereta wuassu Mesir ringannu awal᷊o wuṛṛu sumasa'ene nasutta sulal᷊ummu tahal᷊oangnga, MAWU na'ola'a uaene nangelekka apia na'oman sara i mangitou nilumakkubba.

²⁰Ana see i Miryam, sangkatou nabiah, iaangngi Harun, nanganu rebanane wuṛṛu anambon bawine nanengkella lai rebana apiddu massal᷊aingnga.

²¹I Miryam nangantarin aantari mangitou, “Pangantarite paddalo MAWU, ana waugu i Tou naauntungnga ringannu mapia atonna. Anambon awal᷊o wuṛṛu sumasa'ene nituntungngi Tou sulal᷊ummu Tahal᷊oangnga.”

²²Wua'udde i Musa nangapiddu walahannu Israel wuassu Tahal᷊oangngu Gelagah nabattuku wadda'u Syur. Al᷊annune tallu allo i mangitou u'amatta su wadda'a, ringannu tawe nasomba ua'e.

²³Ana see i mangitou na'omate su tampa aranne Mara, arawe ua'e isudde tumaniten mapetta, na'oman sara tawe ia'inumma. Ana waugu udde tampa udde nissago Mara, atappasanne mapetta.

²⁴Ne manga taumata udde sussawutulle si Musa wuṛṛu naiwal᷊o, “Apate inumanni ite?”

²⁵I Musa niumal᷊iomanna ringannu atonna-tonna su MAWU, ana see MAWU namantingidda si tou alu sampaddi. Alu udde nituntungngi Musa sulal᷊ummu ua'e, ana see ua'e udde nabbal᷊i maammi, na'oman sara wotongngete ia'inumma. Su tampa udde MAWU nangonggolu manga atoranna si mangitou, wuṛṛu isudde lai i Tou namono'a si mangitou.

²⁶Unnu MAWU, “Paatuṛṛutte si Ya'u ringannu atonna-tonna, wuṛṛu pa'ola'e apa apan aellehang-Ku mapia; paatuṛṛutte anambon parenta-U. Amungkangngu i yamiu ma'ola'a aroddi, yamiu tawe Ta'u iṛṛuumanna ringannu manga radda'a apan Ta'u niaparanta su taumata Mesir. Ete i Ya'u MAWU apan nangapia si yamiu.”

²⁷Wua'udde i mangitou na'omate su tampa aranne Elim. Isudde pia mapul᷊o dua al᷊imatang kua'e wuṛṛu pitu pul᷊o punnu alu kurma. I mangitou naddasanna maraning kua'e udde.