Read Talaud SASABANGNGA 16 Bible Online

SASABANGNGA 16 - Talaud bible

SASABANGNGA 16

¹Ana see anambon walahannu Israel nanantangken Elim, wuṛṛu su allo appul᷊one lima wul᷊anna aruane napawe i mangitou buatte nanantangngu Mesir, i mangitou na'omate su wadda'u Sin, su wallatu Elim wuṛṛu Wowon Sinai.

²Su wadda'a udde i mangitou sarangkanambone sussawutulla si Musa wuṛṛu si Harun.

³Unni mangitou, “Mappianne unnu wisara yami buatte nipate MAWU su Mesir. Poiaroddi yami mattingkadio'a wotongnge umaianna uminasa ṛemessa wuṛṛu umanna roti ma'oman sara mal᷊aidda. Arawe i yamiu nangapidi yami isindi tadea'u yami sarangkanambone mate amal᷊unusana.”

⁴Unnu MAWU si Musa, “Orassa indi Ya'u manossokku anna apan manambo naal᷊ihidda uranna si yamiu sarangkanambone. Miallo-miallo i yamiu ṛinone mangammulu anna udde tumba'u ipaatta allo massallo. Ringannu olangnge udde i Ya'u ma'annammu walahang-Ku tadea'u i Ya'u masingkatta tanne i mangitou matuṛṛutta manga parenta-U ara'e tawe.

⁵Su allo aiannumme i mangitou ṛinone i mangitou mangammulu anna paarua anambone wuassu allo nangkal᷊iu.”

⁶Ne nabbisarate i Musa wuṛṛu i Harun su anambon taumatan Israel, “Wawallo indi yamiu sarun maasingkatta manungku ete MAWU nangapiddi yamiu sinumabbangnga wuassu Mesir.

⁷Tiṛṛabbi marua allo i yamiu sarun maasilo semakku darantan MAWU. MAWU ma'aringikka si yamiu mangke massa'u si Tou; ore, su MAWU, ana waugu yami indi tumba'u tuttuṛṛutta apa apan buatte nirolokku MAWU.

⁸MAWU sarun mangonggolu ṛemessa si yamiu su tempo wawallo, wuṛṛu roti su tempo marua'allo ma'oman sara i yamiu mal᷊aidda, ana waugu MAWU buatte naaringikke si yamiu massa'u si Tou. Amungkangngu i yamiu massa'u si yami, i yamiu ere massa'u MAWU.”

⁹Wua'udde i Musa nabbisara si Harun, “Doloṛṛa'a i mangitou sarangkanambone sumaruanna MAWU, ana waugu i Tou naaringikke sasungkutti mangitou.”

¹⁰Tantal᷊anna i Harun mabbisara si mangitou sarangkanambone, i mangitou nanaile watukku wadda'a wuṛṛu inaṛṛombanganne semakku MAWU niasiloanna sulal᷊ummu winabbawa.

¹¹Unnu MAWU si Musa,

¹²“I Ya'u naaringikke sasungkuttu taumatan Israel. Wal᷊oa'e si mangitou manungku su orassu wawallo i mangitou wotongnge uminassa ṛemessa, wuṛṛu su tempo marua allo i mangitou wotongnge umanna roti maddatingngu mal᷊aidda. Ne i mangitou sarun maasingkatta manungku ete i Ya'u MAWU, Ruata mangitou.”

¹³Su tempo wawallo nirumantate manga manu'a puyuh aroddi anambone na'oman sara ahewallu padasanana tate asiloanna, wuṛṛu su tempo marua'allo sinumossokke wal᷊angngukka namal᷊iwutta paddasananna.

¹⁴Napawe wal᷊angngukka udde nawul᷊ite, niasiloante su wowon badda'a apa-apa apan manipissa naal᷊ihidda onappa wuṛṛu al᷊ussa naal᷊ihidda anggukka apan namarate.

¹⁵Napawe taumatan Israel naasilo, i mangitou wagga tanne apa udde. Ne i mangitou uaaiwal᷊ote sangkatou ringannu waine, “Apa udde?” Ana see i Musa nabbisara si mangitou, “Eteudde anna apan nionggolu MAWU si yamiu.

¹⁶MAWU nandolokka tadea'u sangkatou-sangkatou mangammulu anambone apan hagausanne, eteudde dua literre su sangkatou sulal᷊ummu amonanna udde.”

¹⁷Taumatan Israel tinumuṛṛutte aroddi; arawe piaddu mangngammula nilumebbe wuassu dua literre su sangkatou wuṛṛu piaddu lai apan matul᷊ungnga.

¹⁸Su tempo i mangitou manu'atta, inauranna manungku taumata apan nangammulu manambo, tawe nilumebbe, wuṛṛu apan nangammulu matul᷊ungnga, tawe niasueanne. Sangkatou-sangkatou mangngammulla tumuṛṛuttu haggausanne.

¹⁹I Musa nabbisara si mangitou, “Salaiwe isai tawe wotongnge manahipunna anna iaddo tiṛṛabbi.”

²⁰Arawe siri pira taumata su wallatti mangitou tawe naddaringikka wisaran i Musa. I mangitou lai nanahipunna sambageanganna wuassu anna udde. Tiṛṛabbine inauranna anna udde piate ul᷊idde wuṛṛu hal᷊urune mawukku'a; ne i Musa nasa'ute si mangitou.

²¹Suapan marua'allo i mangitou mangngammulu anna udde tumuṛṛuttu hagausanni mangitou, wuṛṛu napawe allo masal᷊ihampe, anna apan natantangnga su leta'a udde nilumolokke.

²²Su allo aiannumme i mangitou nangammulu anna udde paarua anambone wuassu allo nal᷊iu, eteudde appatu literre sangkatou. Anambon piaṛṛa'i mangitou nirumanta wuṛṛu namasingkattu olangnge udde si Musa.

²³Unni Musa si mangitou, “Indiwe parenta MAWU; Tiṛṛabbi eteudde allo apan niṛṛae pangillol᷊oanna, allon Sabat, allo apan ionggolla su MAWU. Sarangkanambone apan itambunni yamiu allo indi, tambuna'e, wuṛṛu apa apan lahanni yamiu, lahate. Apan nilumebbe wuassu hagausanni yamiu allo indi, ṛaea'e wuṛṛu sahipunte ipaatta tiṛabbi.”

²⁴Nariaddi wiakka apan nilumebbe udde niaddon mangitou tiṛabbine ere buatte nirolokki Musa; anna udde tawe nal᷊assima wuṛṛu tawe niul᷊iranna.

²⁵I Musa nabbisara, “Indite annu allo indi, ana waugu allo indi allon Sabat, allo pangillol᷊oanna ipangaddata MAWU, wuṛṛu i yamiu tawe maasomba anna udde saran kadio'a suliuddu paddasananna.

²⁶Annumu allo al᷊annune i yamiu ṛinone mangammulu anna, arawe allo appitune eteudde allo pangillol᷊oanna, wuṛṛu tawe anna umonto'a su allo udde.”

²⁷Su allo appitune manga pira taumatan Israel mappulu mangammulu anna, arawe i mangitou tawe naasangkala apa-apa.

²⁸Ana see MAWU nabbisara si Musa, “Ma'oman sara tingngera i yamiu tawe tumuṛutta manga parenta-U?

²⁹Paanaungete manung-Ku i Ya'u nangonggola si yamiu allo massalo ipangillol᷊o. Ana waugu udde su allo aiannume i Ya'u nangonggolu anna apan uatimu su rua allo. Su allo appitune suapan taumata ṛinone matana'a su wal᷊en, wuṛṛu tawe wotongnge sumabbanga.”

³⁰Ana waugu udde su allo appitune i mangitou tawe nammanara.

³¹Anna udde nisaggon taumatan Israel manna. Lihidde naal᷊ihidda watu maradio'a mawira wuṛṛu temangnge naal᷊ihidda kukisse niola'a nappaattu pul᷊a.

³²I Musa nabbisara, “MAWU nandolokki ite iapaanu darua su literene manna iapasahipunna su papapulunni ite, tadea'u i mangitou lai maasilo anna apan nionggolu MAWU si ite su wadda'a, sutempo i ite niapiddi Tou sinumabbanga wuassu Mesir.”

³³I Musa nabbisara si Harun, “Panganute sambau urinna, taṛṛoa'e darua su literene manna sulal᷊umme wuṛṛu addoa'e su saruannu MAWU tadea'u sahipunanna su papapulunni ite.”

³⁴Ne i Harun nangaddon urinna udde su saruannu Wantallu Pa'aire tadea'u sahipunanna uasul᷊ungngu parentan MAWU si Musa.

³⁵Manna udde nabbal᷊i wiakku taumatan Israel al᷊annune appatu pul᷊o su tonnane manansunna, ma'oman sara i mangitou maddatingke su Kanaan, sutampa i mangitou mamanua. (

³⁶Aul᷊aannu saranapa apan inanaramanna ipappaattu taumata sutempo udde, lal᷊oṛṛone ruan pul᷊o su lieterene.)