Read Talaud SASABANGNGA 18 Bible Online

SASABANGNGA 18 - Talaud bible

SASABANGNGA 18

¹I Yitro la'iananni Musa, imam su Midian, naaringikka su ola'u sarangkanambone apan nimanara MAWU si Musa wuṛṛu balahannu Israel, su tempo udde i tou namiaṛṛa'i mangitou sinumabangnga wuassu Mesir.

²Ne Yitro inaite nattembo si Musa, uaapiddi Zipora, awingngi Musa apan ta'e uatana'a su Midian,

³suadio'a ringanni Gersom wuṛṛu i Eliezer, ruan katou anangnge esakka. Anangnge paarorone nisago Gersom ana waugu i Musa nabbisara, “I ya'u sangkatou rumaratingnga su wanua waine”,

⁴ana'a aruane nisago i Eliezer ana waugu i Musa nabbisara, “Ruata wabbantuhannu iupungngu al᷊amona'u buatte nantul᷊ungnga wuṛṛu nanal᷊amatta si ya'u na'oman sara i ya'u tawe niapaten ratun Mesir”.

⁵I Yitro nirumanta suadio'a ringannu awingngi Musa wuṛṛu anangnge darua watukku wadda'a su tampa i Musa naddasanna maranin bowone na'ukkassa.

⁶I Musa nipasingkatanna manungku i mangitou rumanta,

⁷ne sinumabbangke i tou nanal᷊oho si mangitou. I tou niumal᷊intudda su saruanni Yitro wuṛṛu nangari'a. I mangitou uaaiwal᷊ote al᷊al᷊uassu wadangngu sangkatou-sangkatou, ana see sinumuttate sulal᷊ummu rasanni Musa.

⁸I Musa nabbatti'a su la'iananne sarangkanambone apan niola'u MAWU su saruannu ratu wuṛṛu walahannu Mesir tadea'u ipanal᷊amatta taumatan Israel. I tou lai nabbatti'a su la'iananne su ola'u manga asasusa apan sasaruanannu walahannu Israel su tangngan amatanna, wuṛṛu ereapa MAWU nanal᷊amatta si mangitou.

⁹Naaringikka sarangkanambone udde, i Yitro mangke lulluassa,

¹⁰wuṛṛu nabbisara, “Dalo su MAWU apan nanal᷊amatta si yamiu wuassu liman datu wuṛṛu walahannu Mesir! Dalo su MAWU apan namallossu walahannu Israel wuassu patataṛṛualanga!

¹¹Orassa indi ya'u masingkatte manungku MAWU maggewal᷊anna wuassu anambon MAWU, ana waugu sarangkanambone udde niolang-Nge su tempo taumatan Mesir inolaanne tumaniten mawunga su saruannu taumatan Israel.”

¹²Wua'udde i Yitro nangapiddu manga pira sasamba itattambunna wuṛṛu sasamba pappototanna maola'a sambau sasamba su Ruata. I Harun wuṛṛu anambon piaṛa'u walahannu Israel nirumanta wuṛṛu niumanna suadio'a ṛinganni Yitro sulal᷊ummu darantan Duata.

¹³Su allo tiṛabbine i Musa naṛṛunnu manga hatto suwallatu manga taumatan Israel. Manara udde nanganu tempo wuassu marua'allo naddatingngu ṛabbi.

¹⁴Sutempo i Yitro naasilo sarangkanambone apan mammanaranni Musa, i tou naiwal᷊o, “Apate ṛinone manarannu su walahanna indi? Ṛinone sarangkanambone indi manarannu sassane, na'oman sara madorongnga al᷊aṛṛangu lai, manga taumata udde sarun dumarisikka isindi wuassu marua'allo maddatingngu ṛabbi?”

¹⁵I Musa sinumimbakka, “Manga taumata udde nirumanta ringangku madea'a maasingkatta apulun Duata.

¹⁶Amungkangu i mangitou matatiakka, i mangitou sumaruanna si ya'u tadea'u makkawessu hatton mangitou, wuṛṛu ta'u iapasingkatta si mangitou manga parenta wuṛṛu manga titan Duata.”

¹⁷Unni Yitro, “Dal᷊eo aroddi.

¹⁸Ringannu olangnge aroddi i'o mallotakka watangannu sassane, wuṛṛu lai manga taumata udde. Manara udde tumaniten manambo agasannu sangkatou.

¹⁹Paddaringikke al᷊aṛṛa'u, ana see Ruata sarun mantul᷊ungngu. Atonna i'o mapia uapiaṛṛa'u walahanna indi su saruannu Ruata wuṛṛu mangapiddu hatton mangitou si Tou.

²⁰I'o ṛinone mangaṛṛa'a si mangitou manga parentan Duata manal᷊a'an ola'u ereapa mabbiakka mapia wuṛṛu apa apan ṛinone olaanni mangitou.

²¹Arawe su liuddu udde lai i'o ṛinone mamile manga pira taumata esakka apan pande, wuṛṛu manebbo'i mangitou maola'a piaṛṛa'u saṛṛiwu su atoune, maṛṛasutta su atoune, liman pul᷊o su atoune wuṛṛu mapul᷊o su atoune. I mangitou ṛinone manga taumata apan matta'utta wuṛṛu matuṛṛutta MAWU, wotangnge pangimananna wuṛṛu maddiri manengkamma aonggola.

²²Doloṛṛa'e i mangitou mammanara maola'a mallaṛṛuungngu walahanna indi, sangkatou-sangkatou su wageangnge. Manara indi ṛinone olaanni mangitou ringannu uaatokka. Manga hatto apan asaharanne wotongnge iapiddi mangitou ringannu, arawe pattatatiakka maradio'a wotongnge insuanni mangitou sassane. Olangnge udde ma'aṛṛanna manaranu ana waugu i mangitou niawuatannu manarane.

²³Amungkangngu i'o ma'ola'a aroddi, wuṛṛu olangnge udde niatokku Ruata si'o, i'o sarun botongnge maaola'a manaranu, wuṛṛu anambon taumata sarun mapul᷊e ringannu naungnga mal᷊uassa ana waugu hatton mangitou niola'a ringannu mapia.”

²⁴I Musa naddaringikka al᷊aṛṛa'i Yitro,

²⁵wuṛṛu namile manga taumata apan pande su wallatu walahannu Israel. I tou nanebo'i mangitou naola'a piaṛṛa'u saṛṛiwu su atoune, maṛṛasutta su atoune, liman pul᷊o su atoune, wuṛṛu mapul᷊o su atoune.

²⁶I mangitou napaamattu manarane naola'a manga mallaṛṛuungnga su walahannu Israel. Manga hatto apan asaharanne iapiddi mangitou si Musa, arawe pattatatiakka maradio'a insueanni mangitou sassane.

²⁷Wua'udde i Musa nandolokken i Yitro inai watukku wanuane.