Read Talaud SASABANGNGA 22 Bible Online

SASABANGNGA 22 - Talaud bible

SASABANGNGA 22

¹“Isai apan nanna'o sambau sapi ara'e domba ana see niṛṛata ara'e niwal᷊u'i tou, ṛinone sapi sambau lannaannu sapi lima wuṛṛu suapan sambau domba lannaannu appatta domba.

²I tou ṛinone mallanna'a saranapa apan nita'one. Amungkangngu i tou tawe saranapa, i tou sassane sarun iwal᷊u'a maola'a allangnga ipallanna'a saranapa apan nita'one. Amungkangngu nita'one udde erenai sapi, keledai ara'e domba, wuṛṛu niasangkal᷊anna ringannu taumata udde wuṛṛu ta'e wiakka, i tou ṛinone mallanna'a suapan sambau winatangnga lannaannu darua winatangnga. Amungkangngu su tempo ṛabbi sangkatou taṛṛa ta'o niasametanna sulal᷊ummu sambau wal᷊en, ana see i tou niapate, taumata apan namate udde tawe nassal᷊a. Arawe amungkangngu olangnge udde mariaddi su tempo allo, taumata apan namate udde nassal᷊a.

⁵Isai apan namalan binatangnge u'anna nannal᷊o su wawail᷊anne ara'e su waillu anggore, ana see winatangnga udde lullalele wuṛṛu niumanna hessin bawail᷊annu taumata waine, ne tatahuannu winatangnga udde ṛinone mamaekka arugianna ringannu hessin apan apianne wuassu wawail᷊anne ara'e wuassu waillu anggori tou sassane.

⁶Isai apan nakkunuttu putungnga su wawail᷊anne sassane ana see putungnga udde nilumewa watukku waillu taumata waine wuṛṛu naasoṛṛobba gandumma apan tantal᷊anna tuttuwo ara'e gandumma niwa'issa apan wakkute nipototta, ne taumata apan nakkunuttu putungnga udde ṛinone mamaekka arugianna.

⁷Unnu wisara pia taumata apan ma'apulu manahipunna saranapa ereinai roitta ara'e saranapa maarega. Arawe wua'udde saranapa sinahipunna udde nita'o wuassu wal᷊ene. Amungkangngu taṛṛa ta'one niasametta, i tou ṛinone mamaekka paarua anambone wuassu saranapa apan nita'o udde.

⁸Arawe amungkangngu taṛṛa ta'one tawe niasametta, taumata apan nipangadoanna saranapa udde ṛinone iapidda watukku tampan patataṛṛamawuanna, wuṛṛu isudde i tou ṛinone massalu manungku i tou tawe nanna'o saranapa apan niapaaddo si tou.

⁹Sulal᷊ummu al᷊awo'u pattatatiakka su ola'u darotongnga, mawae ete sapi, keledai, domba, laubba ara'e al᷊awo'a apan nawul᷊i ana see niasombanganna apia, manga taumata apan nanga'u naola'a tatahuanne ṛinone iapidda su tampan patataṛṛamawuanna. Taumata apan nita'en Duata nassal᷊a, ṛinone mamaekka paarua anambone su tatahuanne.

¹⁰Isumandinga pia sangkatou nappadul᷊i keledai, sapi, domba ara'e winatangnga waine tatahuanannu sansul᷊ungnge. Wua'udde winatangnga udde nate, nal᷊essa ara'e niaṛṛon seetta, sumbal᷊i tawe matattialane.

¹¹Su olangnge udde i tou ṛinone inai watukku tampan pattataṛṛamawuanna wuṛṛu massalu ringannu arannu MAWU manungku i tou tawe nanna'o winatangnga apan buatte niapal᷊u'adda si tou. Amungkangngu atonna-tonna i tou tawe nanna'o, tatahuanne ṛinone mamasanna arugianna udde, wuṛṛu taumata apan uapadul᷊i salaiwe tate mamaekka arugianna.

¹²Amungkangngu winatangnga udde nita'on taumata waine, ne taumata apan uapadul᷊i ṛinone mamaekka arugianna su tatahuanne.

¹³Amungkangngu winatangnga udde niaṛṛattu winatangnga mal᷊aṛṛaga, taumata apan uapadul᷊i ṛinone mamasilon manga lampen duṛṛine maola'a tatialane su tatahuanne, i tou salaiwe tate mamaekka arugianna su winatangnga udde.

¹⁴Amungkangngu pia sangkatou nabballasa winatangnga sambau ana see winatangnga udde nal᷊essa ara'e nate su tempo tatahuanne tawe su tampa arariadianna udde, iapa nabballasa ṛinone mamaekka arugianna udde.

¹⁵Arawe amungkangngu udde nariaddi su tempo tatahuanne isudde, iapa nabballasa salaiwe tate mamaekka arugianna. Amungkangngu winatangnga udde winatangnga sinewanna, arugianne awaeṛṛannu sewane.”

¹⁶“Isai apan nassal᷊o'u sangkatou ana'a maṛṛuala apan taambe natatunanga matiilla suadio'a ringanni tou, ṛinone mamaekka wul᷊awannu awingnge wuṛṛu ma'awingngi tou.

¹⁷Arawe amungkangngu iamangnge maddiri mamalan esakka udde ma'awingngu anangnge, esakka udde ṛinone mamaekku roitta su iamangnge udde maola'a wul᷊awannu awingnga su ana'a apan ta'e maṛṛuala.

¹⁸Suapan bawine apan ma'ola'a wal᷊i'immata ṛinone pateanna

¹⁹Taumata apan nassawa winatangnga ṛinone pateanna.

²⁰Isai apan mangonggolu sasamba su manga MAWU waine, tabbene'e si Ya'u, MAWU, ṛinone iṛṛuumanna pateanna.

²¹Imbaṛṛangnga mangallangnga ara'e ma'inolaanna sal᷊a su saruannu taumata raho; naungete manungku dorone i yamiu lai taumata raho su Mesir.

²²Imbaṛṛangnga ma'ola'a wawine wal᷊u ara'e ana'a asisitimpal᷊ussa ringannu walate apulu.

²³Amungkangngu i yamiu mandal᷊eo si mangitou, i Ya'u, MAWU sarun maddaringikka si mangitou napawe i mangitou sumal᷊ande maiontolla si Ya'u.

²⁴I Ya'u sarun masa'u wuṛṛu mamate si yamiu sulal᷊ummu pangalo, na'oman sara manga awingngu mabbal᷊i wawine wal᷊u, wuṛṛu manga anangngu mabbal᷊i asisi.

²⁵Amungkangngu i yamiu mapawallassu roitta su taumata asiangnga wuassu wallatu walahanna-Ku, ariewe i yamiu naal᷊ihidda mananusi utangnga apan maddorongnga wungane.

²⁶Amungkangngu i yamiu manganu juban taumata waine maola'a wataṛṛun utangnga, juba udde ṛinone iapawelengnga tantal᷊anna matannallo taambe nattuppa,

²⁷ana waugu ete mal᷊aṛṛenessa sambau udde apan ipanal᷊ihangnga watanganne. Amungkangngu tawe iapawelengnga si tou, i tou malluṛṛeten nasa suapa ipaatta matiilla? Amungkangngu i tou umui maiontolla si Ya'u, ne i Ya'u sarun maddaringikka ana waugu i Ya'u maakkanna.

²⁸Imbaṛṛangnga massalun Duata wuṛṛu imbaṛṛangnga mamontoga piaṛṛa'u walahannu.

²⁹Su tempo apan nitantunna, pangonggolen sasamba si Ya'u sambageanganna wuassu hessin gandumma, ua'en anggore wuṛṛu lanan zaitunni yamiu. Tantil᷊a'e si Ya'u manga anangngu esakka pahul᷊u,

³⁰see lai sapi wuṛṛu domba esakka apan paarorone niasungkangnga. Wala'e manga winatangnga udde matana'a ringannu inangnge al᷊annune pitu allo, ana see tantil᷊a'e si Ya'u su allo aual᷊une.

³¹I yamiu al᷊aṛṛana-U, ana waugu udde al᷊awo'u winatangnga apan niaṛṛattu winatangnga mal᷊aṛṛagga, imbaṛṛangnga inasanni yamiu remenne; onggola'e udde su manga asu.”