Read Talaud SASABANGNGA 25 Bible Online

SASABANGNGA 25 - Talaud bible

SASABANGNGA 25

¹MAWU nabbisara si Musa,

²“Doloṛṛa'e taumatan Israel mangapiddu sasamba si Ya'u. Isai apan niumal᷊ore naungnge, ṛinone mangapiddu sasamba

³ereinai: wul᷊awanna, sal᷊a'a wuṛṛu witu'a;

⁴mal᷊aṛṛenessa linen al᷊ussa, mal᷊aṛṛenessa wol ma'elomma, ungu wuṛṛu maṛṛamu, mal᷊aṛṛenessa wuassu pisin ambinga,

⁵pisin domba esakka apan niwuṛṛannu maṛṛamu, pisi al᷊ussa, wuṛṛu alu akasia,

⁶lanan sol᷊o, rampa-rampa maola'a lanan daramea wuṛṛu hunan dupa apan mawangngi,

⁷al᷊awotu hatin batu permata ireetta su laubbu imam wuṛṛu lal᷊indumma ro'on Imam Bahewa.

⁸Doloṛṛa'e walahanna udde ma'ola'a rasang-Ku, tadea'u i Ya'u wotongnge matana'a suadio'a ringanni mangitou.

⁹Rasanna wuṛṛu manga aolangnge ṛinone olaanni mangitou tumuṛṛuttu olangnge apan sarun iapaasingkatta si'o.”

¹⁰“Pa'ola'e sambau wantalla wuassu alu akasia al᷊o'engnge 110 sentimetere, al᷊alakke wuṛṛu atanggakke sambau-sambau 66 sentimetere.

¹¹Wageangngu lal᷊umme wuṛṛu liudde oossu wul᷊awanna tutune wuṛṛu ola'ete bingkene wuassu wul᷊awanna.

¹²Su alu papasannane, ola'ete hal᷊angnga wul᷊awanna appata wuṛṛu aita'a su leddane appata, hal᷊angnge pattaṛṛa darua su sandiṛṛanne.

¹³Pa'ola'e lai papasannane wuassu alu akasia wuṛṛu pi'unnu wul᷊awanna,

¹⁴ana see sutta'a alu papasanna udde sulal᷊ummu hal᷊angnge suapan sandiṛṛannu wantalla udde.

¹⁵Alu papasannane udde ṛinone sidutu uasuṛṛi sulal᷊ummu manga hal᷊angnga, wuṛṛu tawe wotongnge iapasabangnga.

¹⁶Ana see sulal᷊ummu wantalla udde ṛinone iaddonu watu darua ringannu manga tittita apan sarun Ta'u ionggolla si'o.

¹⁷Wantalla udde ola'ete lal᷊aamme wuassu wul᷊awanna tutune, al᷊o'engnge 110 sentimetere wuṛṛu al᷊alakke 66 sentimetere.

¹⁸Pa'ola'e darua mala'ekatta wuassu wul᷊awanna nisassala,

¹⁹sambau suapan pentakku lal᷊ubbu wantalla udde. Mala'ekatta darua udde ṛinone olaanna uaṛṛaitta sambau ringannu lal᷊u'umme,

²⁰wuṛṛu olaanna uasasaruanna ringannu papaidda apan uasiappaka su wantalla udde.

²¹Addoa'e watu darua sulal᷊ummu wantalla udde wuṛṛu paseiten lal᷊uube rosone.

²²Su tampa udde i Ya'u sarun maisasombanu, wuṛṛu wuassu wowon, su wallatu mala'ekatta darua udde, i'o Ta'u onggol᷊annu manga tita-U hunan balahannu Israel.”

²³“Pa'ola'e sambau medda wuassu alu akasia al᷊o'engnge 88 sentimetere, al᷊alakke 44 sentimetere, wuṛṛu atanggakke 66 sentimetere.

²⁴Pi'unten bul᷊awanna tutune wuṛṛu pasea'a sambau bingke wul᷊awanna pamal᷊iwuta'a.

²⁵Wiwikku medda al᷊alakke 7,5 sentimetere wuṛṛu passaranne ola'a wuassu wul᷊awanna uapal᷊iwutta winggine udde.

²⁶Pa'ola'e appata hal᷊angnga wuassu wul᷊awanna wuṛṛu suṛṛia'a su wuune appatta su leddane, maranin binggine.

²⁷Hal᷊angnga udde ipanaṛṛangnga alu papasannane tadea'u medda udde wotongnge iapasanna.

²⁸Alu papasannane udde ṛinone olaanna wuassu alu akasia wuṛṛu lapisannu wul᷊awanna.

²⁹Pa'ola'e lai manga lama'a, manga mangko, manga wensada wuṛṛu manga mangko pangadoannu sasamba ua'en anggore. Saranapa sarangkanambone wuassu medda udde ṛinone olaanna wuassu wul᷊awanna tutune.

³⁰Medda udde ṛinone iaddo su saruannu Wantallu Pa'aire, wuṛṛu su wowon medda udde ṛinone sidutu uaraddo roti annananna.”

³¹“Pa'ola'e leddan sol᷊o wuassu wul᷊awanna tutune. Apampakke wuṛṛu pangagasanne ṛinone olaanna wuassu wul᷊awanna nisassala; manga bunga lal᷊ogakke, nasutta lai lal᷊uwone wuṛṛu sasabangannu wungane ṛinone iṛṛaitta sambau ringannu apampakke wuṛṛu pangagasanne.

³²Su pangagasanne udde ṛinone olaanna annumma pengane, pengane tatallu suapan sandiṛṛanne.

³³Suapan pengane ṛinone olaanna hambarannu tatallu wunga badam ringannu lal᷊uwone wuṛṛu sasabanganne.

³⁴Su pangagasanne ṛinone olaanna hambaranna appata bunga badam ringannu lal᷊uwone wuṛṛu sasabanganne.

³⁵Su wowane suapan sampare pengane udde ṛinone olaanna sambau lal᷊uwone.

³⁶Anambon leddan sol᷊o udde ringannu manga lal᷊uwone wuṛṛu manga pengane ṛinone olaanna wuassu sambau potottu wul᷊awanna tutune nisassala.

³⁷Pa'ola'e pitu sol᷊o su leddan sol᷊o udde wuṛṛu addoa'e paapia-pia tadea'u semakke manawo su saruanna.

³⁸Pa'ola'e wawaresi nanal᷊i ara'e sumbun sol᷊o wuṛṛu pangangadoanne lai wuassu wul᷊awanna tutune.

³⁹Paata'e tallun pul᷊o lima su kilone wul᷊awanna tutune ipa'ola'a sol᷊o udde ringannu al᷊awo'u saranapane.

⁴⁰Paariagaite tadea'u leddan sol᷊o udde ola tumuṛṛuttu tul᷊adda apan nipasingkatta si'o su puiddu wowone udde.”