Read Talaud SASABANGNGA 28 Bible Online

SASABANGNGA 28 - Talaud bible

SASABANGNGA 28

¹“Waggoite i Harun iaangngu suadio'a ringannu manga anangnge i Nadab, i Abihu, i Eleazar wuṛṛu i Itamar, wuṛṛu ṛaea'a i mangitou tadea'u wotongnge mangimbe si Ya'u maola'a sangkatou imam.

²Pa'ola'e laubbu imam anggola'a si Harun, tadea'u i tou asiloanna mawantuga.

³Waggoite anambon mananabbi'a apan buatte Ta'u monggol᷊annu asingkatta. I mangitou doloṛṛa'e manabbi'a laubbi Harun tadea'u i tou wotongnge iṛṛae maola'a imam mangngimbe si Ya'u.

⁴Doloṛṛa'a lai i mangitou ma'ola'a lal᷊indumma ro'o, laubbu imam, jubah, kameja nikarawanga, paporongnga wuṛṛu papeṛṛetta. Laubbu imam udde ṛinone olaanni mangitou hunan i Harun iaangngu wuṛṛu al᷊aṛṛanangnge tadea'u wotongnge mangimbe si Ya'u ere sangkatou imam.

⁵Laubba udde ṛinone olaanni mangitou wuassu wol ma'elomma, ungu wuṛṛu maṛṛamu, wananna wul᷊awanna wuṛṛu linen al᷊ussa. Wua'udde lai laubbu imam ṛinone loggaṛṛannu karawange.

⁷Darua tal᷊in bambangnga uaiitta laubbu imam ṛinone itabbi'a su sandiṛṛanne.

⁸Sambau papeṛṛetta niraddu'a al᷊ussa wuassu mal᷊aṛṛenessa apan uasul᷊ungnga ṛinone itabbi'a su laubbu imam tadea'u mabbal᷊i sambau.

⁹Anute darua watun delima. Paddea'e sangkatou mapapanden bul᷊awanna apan pia asingkatta manguitta su watu udde manga arannu siri mapul᷊o dua ana'i Yakub tumuṛṛuttu uukke, annumma aranna su watu sambau. Ana see darua watu permata udde ṛinone itaṛṛo sulal᷊ummu wingke wul᷊awanna wuṛṛu iaddo su tal᷊in bambangngu laubbu imam maola'a tatiala pananaunganna su siri mapul᷊o dua ṛuangannu Israel. Ringannu olangnge aroddi i Harun uaapiddu aranni mangitou su wambangnge, na'oman sara i Ya'u, MAWU, sidutu uanaungnga si mangitou. Waine lai waussu wingke wul᷊awanna udde,

¹³ṛinone olaanna lai darua ṛate wuassu wul᷊awanna tutune apan niandongnga ere tal᷊i, hunan itaṛṛo su wingke wul᷊awanna udde.”

¹⁵“Pa'ola'e su Imam Wahewa sambau lal᷊indumma ro'o tadea'u ipaatta su tempo i tou maapulu maasingkatta apulun Duata. Mal᷊aṛṛenessa wuṛṛu karawanga lal᷊indumma ro'o udde ṛinone uasul᷊ungngu mal᷊aṛṛenessa wuṛṛu karawanga laubbu imam.

¹⁶Saṛṛene uataṛṛawu'u appata wuṛṛu lappuanna darua, al᷊o'engnge wuṛṛu al᷊alakke sambau-sambau 22 sentimetere.

¹⁷Pasea'e lai appatu raddaga watu permata su lal᷊indummu ro'o udde. Su akkita paaororne watu delima, topas wuṛṛu baiduri sepah.

¹⁸Su akkita aruane watu zamrud, watu nilam wuṛṛu intan.

¹⁹Su akkita atallune watu lazuardi, watu akik wuṛṛu watu kecubung.

²⁰Su akkita aiappanne watu pirus, yakut wuṛṛu ratna cempaka. Mapul᷊o dua permata udde ṛinone wa'isannu wul᷊awanna.

²¹Suapan permata ṛinone uitannu su wallatu sambau aranna wuassu siri mapul᷊o dua ana'i Yakub maola'a tatialan pananaungannu manga ṛuangannu Israel.

²²Pa'ola'e su lal᷊indumma ro'o udde darua ṛate wuassu wul᷊awanna tutune apan niandongnga naal᷊ihidda tal᷊i.

²³Pa'ola'e lai darua hal᷊angnga wul᷊awanna wuṛṛu pasea'e su pentakke darua al᷊iurosone su lal᷊indumma ro'o udde

²⁴ana see pasutta'a darua ṛate wul᷊awanna udde sulal᷊ummu manga hal᷊angnga tanginna.

²⁵Pentakke darua waine wuassu ṛate udde ṛinone ii'itta su wingke darua, tadea'u lal᷊indumma ro'o udde wotongnge isampa'a ringannu saruannu tal᷊in bambangngu laubbu imam.

²⁶Pa'ola'e darua hal᷊angnga wul᷊awanna lai, ana see pasea'e su lal᷊indummu ro'o su pentakke wowane wageangngu lal᷊umme apan naṛṛiaannu laubbu imam.

²⁷Wua'udde, pa'ola'e darua hal᷊angnga wul᷊awanna lai wuṛṛu pasea'e su wageangngu saruannu darua tal᷊in bambangngu laubbu imam maranin passampaannu tatabingnge maranin bowane, al᷊iu rosone wuassu papeṛṛetta niraddu'a al᷊ussa.

²⁸Hal᷊angngu lal᷊indumma ro'o ṛinone isampa'u tal᷊i ma'elomma su hal᷊angngu laubbu imam tadea'u lal᷊indumma ro'o udde sidutu uaraddo su wowon papeṛṛetta wuṛṛu tawe mapallossa.

²⁹Su tempo i Harun sinumutta watukku tampa susi, i tou ṛinone mangapiddu manga arannu ṛuangannu Israel apan ni'uitta su lal᷊indummu roone, tadea'u i Ya'u MAWU, sidutu uanaungnga al᷊aṛṛana-U.

³⁰Addoa'e Urim wuṛṛu Tumim sulal᷊ummu lal᷊indummu ro'o udde tadea'u ipaatti Harun amungkangngu i tou sumaruanna si Ya'u. Su manga tempo ereudde i tou ṛinone sidutu ual᷊uṛṛen lal᷊indumma ro'o, tadea'u i tou sidutu maasingkata apulu-U su ṛuangannu Israel.”

³¹“Juba apan niluṛṛen su laubbu imam ṛinone sarangkanambone niola'a wuassu wol ma'elomma.

³²Loṛṛangngu ullekkane tohasannu tal᷊i niraddu'a tadea'u tawe mahesa'a.

³³Su uapal᷊iwutta wiwikke wowane ṛinone olaanna hambarannu wuan delima wuassu wol ma'elomma, ungu wuṛṛu maṛṛamu, wawal᷊atannu wul᷊ele wuassu wul᷊awanna.

³⁵Jubah udde ṛinone iluṛṛen i Harun amungkangngu i tou mammanara maola'a imam. Su tempo i tou rumanta su saruang-Ku su Wabbo'a Susi ara'e manantangngu tampa udde, sarun aringiṛṛanna tingikku wul᷊ele udde, tadea'u i tou tawe mate.

³⁶Pa'ola'e sambau hambaranna wuassu wul᷊awanna tutune wuṛṛu uiten manga wisara ‘Niṛṛae hunan MAWU.’

³⁷Wa'isa'a su paporongnga ringannu tal᷊i ma'elomma.

³⁸Lal᷊oggakka wul᷊awanna udde ṛinone iluṛṛe si Harun su pakkanne tadea'u i Ya'u, MAWU, ma'apulu manengkamma anambon aonggola apan iapiddu taumatan Israel si Ya'u, salaiwe sulal᷊ummu mangngapiddu aonggolla udde i mangitou buatte na'ola'a pasasal᷊a.

³⁹Kamejan i Harun ṛinone iraddu'a wuassu linen al᷊ussa. Pa'ola'e lai sambau paporongnga wuassu linen al᷊ussa wuṛṛu papeṛṛetta apan nikarawanga.

⁴⁰Pa'ola'e kameja, papeṛṛetta wuṛṛu paporongnga su manga ana'i Harun tadea'u i mangitou lai aellehanna mawantuga.

⁴¹Luṛṛea'e laubba udde si Harun tuṛṛangngu wuṛṛu manga anangnge. Lanaite i mangitou ringannu lanan zaitun; ringannu aroddi i mangitou nitenega wuṛṛu niṛṛae maola'a imam mangangimbe si Ya'u.

⁴²Ana see i mangitou ola'ete lai sal᷊ana maautta wuassu linen al᷊ussa, al᷊o'engnge wuassu lawassa maddatingngu palangnga tadea'u ipallindumma wageangngu wadangnga apan tawe suṛṛinone ellehanna.

⁴³Sal᷊ana udde ṛinone sidutu ilalluṛṛen mangitou su tempo sumutta sulal᷊ummu Rasang-Ku ara'e mangundanin mezbah wuṛṛu ma'ola'a patataṛṛamawu sangkatou imam su Wabbo'a Susi, tadea'u i mangitou tawe mate ana waugu niasiloanna wageangngu wadangnga apan tawe suṛṛinone ellehanna. Atoranna udde sidutu iappaamatta si Harun wuṛṛu papapulunne.”