Read Talaud SASABANGNGA 29 Bible Online

SASABANGNGA 29 - Talaud bible

SASABANGNGA 29

¹“Ete arendi olangnge i Harun wuṛṛu al᷊aṛṛanangnge nitenega maola'a imam tadea'u i mangitou wotongnge mangimbe si Ya'u. Panganute sambau sapi esakka saṛṛen tumuwo wuṛṛu darua domba esakka apan tawe angngone.

²Wuassu taponna apan apianne, luaṛṛa'e ringannu tawe mappaattu ragine. Sangkawageanganna taponna niluakka udde ṛinone olaanna roti ringannu lanan zaitun, sangkawageanganna lai tawe mappaattu lana, wuṛṛu lambene olaanna kukisse apan wuṛṛannu lana.

³Taṛṛoa'e su so'anna wuṛṛu onggol᷊a'e udde si Ya'u suadio'a ringannu aonggolla sapi esakka wuṛṛu darua domba esakka.

⁴Doloṛṛa'e i Harun wuṛṛu manga anangnge rumanta watukku ngaran Dasang-Ku wuṛṛu mamaresi wadangnga.

⁵Luṛṛea'e si Harun laubbu imam: kemeja, laubbu imam, jubah apan ual᷊indumma laubbu imam, lal᷊indumma ro'o wuṛṛu papeṛṛetta.

⁶Wa'isa'e paporongnga su puane wuṛṛu elea'a su paporongnge udde lal᷊ogakka wul᷊awanna ringannu ni'uitta ‘Niṛṛae hunan MAWU’.

⁷Ana see panganute lana ipangal᷊amatta, lal᷊ina'a su wowon puane wuṛṛu lanaite i tou.

⁸Wua'udde, doloṛṛa'e manga anangnge rumanta wuṛṛu luṛṛea'e kemeja

⁹wuṛṛu papeṛṛetti mangitou, ana see wa'isa'e paporongnga su puan mangitou. Etearoddi olangnge mapaatenegi Harun wuṛṛu manga anangnge. I mangitou wuṛṛu papapulunni mangitou ṛinone mangimbe si Ya'u maola'a imam saran mal᷊annu-l᷊annu.

¹⁰Wua'udde sapi esakka udde ṛinone iapiddu su saruannu Rasang-Ku. I Harun wuṛṛu manga anangnge ṛinone mangaddon lima mangitou su wowon puan binatangnga udde.

¹¹Ṛatate sapi esakka udde su saruang-Ku, su ngaran Dasanna.

¹²Panganute sambageanganna daṛṛan sapi udde wuṛṛu wuṛṛa'a wuṛṛu tal᷊imaddonu su manga tatandu'u mezbah. Lamben daṛṛa ṛinone ilal᷊innu su al᷊ungngu mezbah.

¹³Wua'udde panganute tawane apan uapi'unna lal᷊oṛṛon tianne, wageangnge apan apianne wuassu ate wuṛṛu wabbatune ringannu tawane wuṛṛu addoa'e sarangkanambone udde su wowon mezbah wuṛṛu tutungke maola'a aonggolla si Ya'u.

¹⁴Ṛemessa, pisi wuṛṛu tinain sapi esakka udde ṛinone itambunna su liuddu paddasananna. Eteudde maola'a aonggolla ipangampungnga rosan manga imam.

¹⁵Wua'udde panganute suwallatu sambau domba esakka udde. I Harun wuṛṛu manga anangnge ṛinone mangaddon lima mangitou su wowon pua binatangnga udde.

¹⁶Ana see ṛatate winatangnga udde, anute daṛṛane wuṛṛu wokka'a su mezbah sandiṛṛanne appata.

¹⁷Domba esakka udde ṛinone tattaranna. Lal᷊oṛṛon tianne wuṛṛu palangnge ukkasanna wuṛṛu iaddo su wowon puane wuṛṛu su manga abbuwune waine.

¹⁸Onggol᷊a'e domba esakka sarangkanambone udde su wowon mezbah maola'a sasamba itattambunna. Hal᷊urune ma'al᷊uassa naung-Ku.

¹⁹Panganute domba esakka sambau lai, eteudde domba esakka olaanna lal᷊aghun patatenega. Doloṛṛa'e i Harun wuṛṛu manga anangnge mangadon liman mangitou su wowon pua binatangnga udde.

²⁰Ana see ṛatate domba esakka udde, panganute addio'a daṛṛane wuṛṛu wuṛṛa'a su aikkatannu tal᷊ingan i Harun wuṛṛu manga anangnge, su inangngu talimaddo aikkatanna wuṛṛu inangngu tal᷊imaddon ledda aikkatanni mangitou. Lamben daṛṛa udde ṛinone iwokka su mezbah sandiṛṛanne appata.

²¹Panganute addio'a daṛṛa su wowon mezbah wuṛṛu lanan lal᷊aghu addio'a, ana see alasa'e si Harun wuṛṛu manga anangnge wuṛṛu su laubbi mangitou. Ringannu olange aroddi i Harun wuṛṛu manga anangnge see laubbi mangitou niṛṛae ana waugu i Ya'u.

²²Anute tawan domba esakka udde, tol᷊ene apan pia tawane, ṛiwungkalune wuṛṛu lal᷊oṛṛon tianne, wageangnge apianne wuassu atene, wabbatune darua ringannu tawane, wuṛṛu palangnge aikkatanna.

²³Wuassu ul᷊a'a pangadoannu roti apan buatte nionggola si Ya'u, panganute sambau roti wuassu al᷊awo'u hatine; sambau apan niola'a wuassu lanan zaitun, sambau lai tawe nappaattu lana, wuṛṛu sambau kukisse.

²⁴Addoa'e anambon anna udde su liman i Harun wuṛṛu manga anangnge wuṛṛu doloṛṛa'e i mangitou mangapida si Ya'u, maola'a sambau sasamba iattogokka.

²⁵Ana see anute roti udde wuassi mangitou wuṛṛu tambuna'e su wowon mezbah, su wowon aonggolla itattambunna udde. Hal᷊urun sasamba udde ma'al᷊uassa naung-Ku.

²⁶Anute ro'on domba esakka udde wuṛṛu onggol᷊a'e maola'a sasamba iattogokka si Ya'u. Wuṛṛu eteudde wageangngu.

²⁷Sulal᷊ummu lal᷊aghun patatenegu imam, sabba'a wuṛṛu palangngu domba esakka apan nipaatta su lal᷊aghu udde ṛinone ionggola maola'a sasamba iattogokka si Ya'u wuṛṛu iṛṛa'e su manga imam.

²⁸Ete indi apulu-U apan tate wotongnge iawal᷊u; Su tempo al᷊aṛṛana-U nirumanta mangonggolu sasamban paddarame, samba'a wuṛṛu palangngu winatangnga udde maola'a wageangngu manga imam. Eteudde aonggolu al᷊aṛṛana-U si Ya'u.

²⁹Laubbu patataṛṛamawun i Harun ṛinone maola'a pussa'an manga anangnge, tadea'u wotongnge iluṛṛen mangitou su tempo itenega.

³⁰Ana'i Harun apan maola'a imam mallol᷊ossa iamangnge wuṛṛu sumutta su Rasang-Ku mattaṛṛamawu su Wabbo'a Susi, ṛinone malluṛṛen laubba udde pitu allo al᷊annune.

³¹Panganute ṛemessu domba esakka apan nipaatta su patatenegi Harun wuṛṛu manga anangnge wuṛṛu lahate ṛemessa udde su sambau tampa apan susi.

³²Ṛemessa udde ṛinone inasanni mangitou su ngaran Dasang-Ku ringannu roti apan nallambe su ul᷊a'a.

³³I mangitou ṛinone umanna anna apan nionggola sulal᷊umm lal᷊aghu pangangampunga rosa su tempo patatenega. Tumba'u imam botongnge umanna anna apan buatte niṛṛa'e si Ya'u udde.

³⁴Amungkangngu tiṛṛabine marua'allo ṛemessa ara'e roti udde ta'e pia lambene, ne lambene udde masue itambunna, wuṛṛu tawe wotongnge annananna, ana waugu buatte niṛṛae.

³⁵Lal᷊aghun patatenegi Harun wuṛṛu manga anangnge ṛinone olaanna pitu allo al᷊annune, ere buatte Ta'u nirolokka si yamiu.

³⁶Miallo-miallo ṛinone ionggola sambau sapi esakka ipangampungnga rosa. Ringannu sasamba udde mezbah maola'a ma'ukkassa. Ana see i'o ṛinone mallana mezbah udde ringannu lanan zaitun tadea'u iṛṛa'e hunane si Ya'u.

³⁷Ola'e udde miallo-miallo al᷊annune pitu allo. Ne ahewallu mezbah mabbal᷊i susi; sarangkanambone apan ma'eṛṛetta su mezbah udde ṛinone itantilla su MAWU, wuṛṛu isai-sai apan nangeṛṛetta, sarun maasomba asasilaka ana waugu atatohassu asasusine.”

³⁸“Miallo-miallo saran mal᷊annu-l᷊annu su wowon mezbah udde ṛinone olaanna sasamba darua domba uukke santonna.

³⁹Sambau maola'a sasamba maru'allo, wuṛṛu waine maola'a sasamba wawallo.

⁴⁰Suadio'a ringannu ana'u domba olaanna sasamba marua'allo, ṛinone ionggola lai sangkilo taponna apianne wuṛṛu lo'annu sanlitere lanan zaitun tutune. Wal᷊ine wua'isudde lai sanlitere ua'en anggore.

⁴¹Ana'u domba olaanna sasamba wawallo ṛinone ionggola ringannu olangnge apan uasul᷊ungnga, raringanannu taponna, lanan zaitun wuṛṛu ua'en anggore. Hal᷊urun sasamba udde naal᷊uassa naung-Ku.

⁴²Wua'udde manansunna wuassu al᷊o'engngu tempo, sasamba itattambunna udde ṛinone ionggola su saruang-Ku su su ngaran Dasang-Ku. Ete isudde i Ya'u sarun massomban al᷊aṛṛana-U wuṛṛu maggahattonu.

⁴³Isudde i Ya'u sarun massomban balahannu Israel, wuṛṛu semakku daranta-U sarun maaola'a tampa udde mabbal᷊i susi.

⁴⁴I Ya'u sarun ma'ola'a Rasanna wuṛṛu mezbah indi susi. I Harun wuṛṛu manga anangnge sarun iṛṛae wuassi ngana'a waine tadea'u i mangitou mangimbe si Ya'u maola'a sangkatou imam.

⁴⁵I Ya'u sarun matana'a su pattangnganu balahannu Israel, wuṛṛu maola'a Ruata mangitou.

⁴⁶I mangitou sarun maasingkatta manungku ete i Ya'u Ruata mangitou apan nangapiddi mangitou sinumabbangnga wuassu Mesir, tadea'u i Ya'u wotongnge matana'a su pattangnganni mangitou. Ete i Ya'u Ruata mangitou.”