Read Talaud SASABANGNGA 30 Bible Online

SASABANGNGA 30 - Talaud bible

SASABANGNGA 30

¹MAWU nabbisara apia si Musa, “Pa'ola'e wuassu alu akasia sambau mezbah tampa pananutunganna amania.

²Saṛṛen mezbah udde ṛinone uataṛṛawu'u appata; al᷊o'engnge wuṛṛu al᷊alakke sambau-sambau 45 sentimetere, wuṛṛu atangngakke 90 sentimetere. Su wuune appata ola'ete manga tatandu'a apan uaṛṛaiddu mezbah udde.

³Wageangnge al᷊iu rosone, nasutta lai sandiṛṛanne appata wuṛṛu manga tatandungnge ṛinone oosannu wul᷊awanna tutune wuṛṛu olaanna wingkene wul᷊awanna ipamal᷊iwutta.

⁴Pa'ola'e hal᷊angnga darua su al᷊ungngu wingkene su sandiṛṛanne darua ipanaṛṛangnga alu papasannu mezbah udde.

⁵Alu papasanna udde ṛinone olaanna wuassu alu akasia apan aoosannu wul᷊awanna.

⁶Addoa'a mezbah udde su liuddu mal᷊aṛṛenessa su saruannu Wantallu Pa'aire, su tampa i Ya'u sarun maisasombanu.

⁷Suapan marua allo su tempo i Harun dumanta manaddia sol᷊o, i tou ṛinone manutungnga amania mawangngi su wowon mezbah udde.

⁸Olangnge udde sarun olaanne lai su tempo i tou mande'omma sol᷊o wawallo. Sasamba amania udde ṛinone sidutu mammanaranna su al᷊o'engngu tempo.

⁹Imbaṛṛangnga mangonggolu sasamba su wowon mezbah udde amania apan isassingadda, sasamba winatangnga ara'e sasamba ia'imbe; imbaṛṛangnga lai mallal᷊innu sasamba ua'en anggore su wowon mezbah.

¹⁰Santonna paassa i Harun ṛinone ma'ola'a lal᷊aghun pangangukassa mezbah ringannu mangalassu daṛṛan binatangnga apan niola'a sasamba su tatandungnge appata maola'a aampungnga rosa. Olangnge udde ṛinone olaanna suapan tonna su al᷊o'engngu tempo. Mezbah udde ṛinone susi sarangkahewalle wuṛṛu ṛaea'e si Ya'u.”

¹¹MAWU nabbisara si Musa,

¹²“Su tempo nandeengngu balahannu Israel, suapan taumata esakka ṛinone mamaekka si Ya'u roitta tatubussa watanganne tadea'u i tou tawe aṛṛinoannu asasilaka su tempon pandareengnga udde iapaamatta.

¹³Suapan taumata apan ireengnga sulal᷊ummu pandareengnga udde ṛinone mamaekku anambon doitta apan buatte tinantunna tumuṛṛuttu arega apan iappaatta su Rasang-Ku maola'a aonggola apan niṛṛae si Ya'u.

¹⁴Suapan taumata apan sarun ireengnga sulal᷊ummu pandareengnga udde, eteudde suapan taumata esakka apan uukke ruaten pul᷊o su tonnane ara'e nilumebete, ṛinone mangonggolu aonggola niṛṛae udde.

¹⁵Taumata ala ṛinone tawe mamaekka nilumebbe, taumata asiangnga tawe wotongnge mamaekka matul᷊ungnga su tempo i mangitou mamaekka roittu tatubbussu watanganne.

¹⁶Dorongete roitta udde su walahannu Israel, wuṛṛu paata'e su patataṛṛamawu sulal᷊ummu Rasang-Ku. Sarangkanambone udde eteudde roitta tatubussu watanganni mangitou, wuṛṛu i Ya'u sidutu uaanaungnga wuṛṛu ual᷊u'adda si mangitou.”

¹⁷MAWU nabbisara si Musa,

¹⁸“Paa'ola'e sambau tampan ua'e witu'a ringannu apampakke wuassu witu'a lai. Addoa'e tampan ua'e udde su wallatu Rasanna wuṛṛu mezbah, ana see loṛṛoiten kua'e.

¹⁹Ua'e udde ua'en i Harun wuṛṛu manga anangnge tadea'u i mangitou wotongnge mamaresi lima wuṛṛu ledda

²⁰tantal᷊anna taambe sumutta su Rasanna ara'e mangundanin mezbah mangapiddu sasamba itattambunna. I mangitou ṛinone ma'ola'a udde tadea'u tawe pateanna. Atoranna udde ṛinone tattuṛṛutanni mangitou wuṛṛu papapulunni mangitou saran mal᷊annu-l᷊annu.”

²²MAWU nabbisara si Musa,

²³“Panganute manga rampah apan apianne, annummu kilo mur mal᷊ua'e, tatallu su kilone alu manisse, tatallu su kilone tuwu mawangngi,

²⁴wuṛṛu annumma su kilone alu teja. Sarangkanambone itimbangnga tumuṛṛuttu timbangana apan ipappaatta su Rasang-Ku. Tambaite lai appatu litere lanan zaitun,

²⁵wuṛṛu pa'ola'e lanan lal᷊aghu, apan ilallo'a naal᷊ihidda lanan mawangngi.

²⁶Paata'e lanan nilo'a udde pallana'a Rasang-Ku, Wantallu Pa'aire,

²⁷medda wuṛṛu saranapane sarangkanambone, leddan sol᷊o wuṛṛu saranapane, mezbah tampan pananutunganna amania,

²⁸mezbah pangadoannu sasamba itattambunna ringannu al᷊awo'u saranapane, wuṛṛu tampan kua'e ringannu apampakke.

²⁹Ringannu olangnge udde ṛinone iṛṛaenu manga saranapa-U, tadea'u sarangkanambone mabbal᷊i susi. Al᷊awo'a apan na'eṛṛetta su mezbah udde ṛinone itantilla su MAWU, wuṛṛu isai-sai apan naaeṛṛetta sarun maasomba asasilaka ana waugu atatohassu asasusine.

³⁰Lanaite lai i Harun wuṛṛu manga anangnge tadea'u i mangitou itenega maola'a imam mangimbe si Ya'u.

³¹Wal᷊oa'a su walahannu Israel manungku su al᷊o'engngu tempo lanan lal᷊aghu udde tumba'u si Da'u.

³²Lanan udde imbaṛṛangnga ilal᷊inna su manga taumata wiasa. Imbaṛṛangnga ma'ola'a lanan ereudde ringannu mappaattu lal᷊o'ane udde lai. Lanan udde susi, wuṛṛu ṛinone ellehanna maola'a sambau saranapa na'ukkassa.

³³Taumata apan na'ola'a lana ereudde, ara'e mappaatta su taumata apan bal᷊ine imam, tate lai mareengnga al᷊aṛṛana-U.”

³⁴MAWU nabbisara si Musa, “Panganute mangapira hatin rampa-rampa anambone uasul᷊ungnga, eteudde pul᷊uttu damar, pisin lokan, pul᷊uttu rasamab wuṛṛu amania tutune.

³⁵Paata'e sarangkanambone udde ipa'ola'a amania ipallalo'a apan mawangngi. Tambaite asimma tadea'u amania udde sidutu tutune wuṛṛu wotongnge ipaatta si Ya'u.

³⁶Sambageanganna wuassu amania udde ṛinone tummaanna mabbal᷊i al᷊ussa. Apira'e udde su Rasang-Ku wuṛṛu sal᷊iawuṛṛa'e su saruannu Wantallu Pa'aire. Amania udde ṛinone ellehanna maola'a sambau saranapa susi apan niṛṛa'e si Ya'u. Imbaṛṛangnga ma'ola'a amania apan nilo'annu manga rampa ereudde lai ana see ipaatti yamiu sassane.

³⁸Isai apan ma'ola'a saranapa mawangngi ereudde, tate mareengnga reengannu al᷊aṛṛana'-U.”