Read Talaud SASABANGNGA 31 Bible Online

SASABANGNGA 31 - Talaud bible

SASABANGNGA 31

¹MAWU nabbisara si Musa,

²“I Ya'u buatte namile si Bezaleel ana'i Uri, pulunni Hur wuassu ṛuanganni Yehuda,

³wuṛṛu i Ya'u nangonggolu taṛṛino si tou. I tou Ta'u nionggol᷊annu asingkatta, apande wuṛṛu atatohassa sulal᷊ummu al᷊awo'u hatin manara mangnguitta;

⁴ipa'ola'a tul᷊adda apan mappandumma asingkatta see olaanna wuassu wul᷊awanna, sal᷊a'a wuṛṛu witu'a;

⁵tadea'u ipangasan batu permata apan ipamaangnga; ipanguitta alu wuṛṛu al᷊awou'u manaran panguitanna waine lai.

⁶Oholiab, ana'i Ahisamakh wuassu walagi Dan, buatte Ta'u nipile lai iapal᷊al᷊ima si tou. I Ya'u lai nangonggolu asingkatta apan bahewalla su manga tu'angnga apan pande, tadea'u i mangitou wotongnge ma'ola'a sarangkanambone apan Ta'u irolokka;

⁷Rasang-Ku, Wantallu Pa'aire wuṛṛu lal᷊umme, anambon saranapan Dasanna,

⁸eteudde medda wuṛṛu saranapane, leddan sol᷊o wuassu wul᷊awanna tutune ringannu saranapane, mezbah tampan panutunganna amania,

⁹mezbah tampan sasamba itattambunna wuṛṛu al᷊awo'u saranapane, tampan kua'e ringannu apampakke,

¹⁰laubbu patataṛṛamawun i Harun wuṛṛu manga anangnge, apan ṛinone iluṛṛe su tempo i mangitou mammanara maola'a imam,

¹¹lanan lal᷊aghu, wuṛṛu amania mawangngi su Wabbo'a Susi. Sarangkanambone udde ṛinone olaanni mangitou uasul᷊ungnga tumuṛṛuttu tatantiro apan Ta'u nionggola si'o.”

¹²MAWU namarenta si Musa

¹³tadea'u iapapasingkatta su walahannu Israel, “Laghua'e allon Sabat, allo apan butte tinantunna maola'a allon pangillol᷊oanna. Saran mal᷊annu-l᷊annu allo udde mabbal᷊i pananaunganna si yamiu wuṛṛu si Ya'u, tadea'u i yamiu maasingkatta manungku i Ya'u buatte na'ola'a si yamiu walahang-Ku sassane.

¹⁴Allon pangillol᷊oanna udde ṛinone addatanni yamiu maola'a sambau allo apan susi. I yamiu Ta'u nionggol᷊annu annummu allo ipammanara, arawe allo appitune eteudde allo wahewalla apan niṛṛae si Ya'u. Isai apan tawe mangaddata allo udde, arawe mammanara su allo udde ṛinone iṛṛuumanna pateanna.

¹⁶Walahannu Israel ṛinone mallaghun allo udde maṛṛana'a mappulunna maola'a tatialan pa'aire.

¹⁷Allo udde eteudde allon pananaunganna sidutu su walahannu Israel wuṛṛu si Ya'u, ana waugu i Ya'u, MAWU, apan buatte nandiadi langitta wuṛṛu runia sulal᷊ummu annumu allo al᷊annune, wuṛṛu su allo appitune i Ya'u naddo nammanara wuṛṛu nangillol᷊o.”

¹⁸Napawe buatte naggahatton i Musa su puiddu Wowon Sinai, Ruata nangonggola si tou ruan kul᷊appa watu apan buatte niwoṛṛetannu Ruata ringannu manga tita-Ne.