Read Talaud SASABANGNGA 34 Bible Online

SASABANGNGA 34 - Talaud bible

SASABANGNGA 34

¹Wua'udde MAWU nabbisara si Musa, “Pamaangke ruan kul᷊appa watu ere dorone. Su watu udde i Ya'u sarun mamoṛṛettu manga wisara apan uasul᷊ungnga su watu appan buatte Ta'u nipesangnga udde.

²Pandiahite ana waugu tiṛṛabbi marua'allo saate su Wowon Sinai wuṛṛu saruante si Ya'u su puiddu wowone udde.

³Tawe wotongnge pia sangkatou tumantalongnga ringannu ara'e suwageangngu tampa su wowone udde. Manga sapi wuṛṛu manga domba esakka arie pabbala'a manioma ara'e umanna nannal᷊o su wawal᷊annu wowone udde.”

⁴Ana see i Musa namaangnga ruan kul᷊appa watu apia, wuṛṛu tiṛṛabbine marua'allo i tou nangapidde sinuma'a su puiddu Wowon Sinai ere buatte niparentan MAWU si tou.

⁵Ne MAWU sinumossoke i sulal᷊ummu sambau winabbawa; i Tou dirumarisikka ringanni Musa su tampa udde, wuṛṛu nabballon aran-Ne apan susi, eteudde MAWU.

⁶Wua'udde MAWU sinumabbi ringanni Musa wuṛṛu nabbisara, “I Ya'u MAWU, eteudde Ruata apan napenen naungnga mapia wuṛṛu darangngu. Darungngu-U nilumambalanna, i Ya'u satia wuṛṛu mal᷊iwue masa'u.

⁷I Ya'u sidutu mandangngu papapulunna su ṛiwune wuṛṛu mangngampungnga passal᷊a wuṛṛu rosa; arawe taumata nassal᷊a mangke tawe Ta'u ipallossa wuassu ṛuumanne, wuṛṛu Ta'u iṛṛuumanna lai manga anangnge wuṛṛu manga pulunne ma'oman sara papapulunne atallun ṛawanne wuṛṛu aiappanne ana waugu paddarosan hagurangnge”.

⁸Orassa udde lai i Musa niumal᷊intudda nassubba.

⁹Wisarane, “Mawu, amungkangngu I'o atonna-tonna ma'apulu'u, i ya'u sumal᷊ande, doronganna Mawu tumantalongnga si yami. Walahanna udde atonna mangke tawe maddaringikka, arawe ampungewe al᷊al᷊eo wuṛṛu rosan kami wuṛṛu sengkamawe yami maola'a al᷊aṛṛanang-Ngu sassane.”

¹⁰Unnu MAWU si Musa, “Orassa indi i Ya'u ma'ola'a pa'aire ringannu walahannu Israel. Su saruannu matan mangitou i Ya'u sarun ma'ola'a manga al᷊aṛṛindu'a apan taambe saran paassa niola'a su anambon balahanna su runia. Anambon balahanna sarun maasilo manga al᷊aṛṛindu'a apan sarun Ta'u olaanna, ana waugu i Ya'u, MAWU sarun ma'ola'a sambau apan ma'ata'utta si yamiu.

¹¹Paatuṛṛute manga tita apan Ta'u nionggola si yamiu allo indi. i Ya'u sarun mallimbuakka balahannu Amori, Kanaan, Het, Feris, Hewi wuṛṛu Yebus su tempo i yamiu umamatte.

¹²Imbaṛṛangnga ma'ola'a pa'aire ringannu manga taumata apan rantanni yamiu, ana waugu olangnge udde wotongnge maola'a wal᷊ati'a apan maapate si yamiu.

¹³Nariaddi, imbaṛṛangnga ma'ola'a aroddi, arawe paṛṛaa'a manga mezbah mangitou, ṛimunsa'a manga palem paal᷊uanni mangitou wuṛṛu tuwangke manga diṛṛin Asyera, monganni mangitou.

¹⁴Imbaṛṛangnga massubba MAWU waine, ana waugu i Ya'u MAWU, eteudde Ruata apan tawe iasul᷊ungngu manga apa su ruania indi.

¹⁵Imbaṛṛangnga ma'ola'a pa'aire ringannu balahannu wanua udde, ana waugu su tempo i mangitou massubba wuṛṛu mangngonggolu sasamba su manga MAWU mangitou, i mangitou sarun mangahe si yamiu, wuṛṛu i yamiu sarun tumantalongnga.

¹⁶Amungkangngu manga anangngu ma'awingngu manga wawinen taumata raho, i mangitou sarun isal᷊o'u manga wawine udde tadea'u manantang-Ku wuṛṛu massubba manga MAWU mangitou.

¹⁷Imbaṛṛangnga ma'ola'a wuṛṛu massubba manga MAWU wuassu atta'a.

¹⁸Ramea'e Andeangngu Roti Tawe Ragine. Ere lai buatte Ta'u nirolokka si'o, i yamiu ṛinone umanna roti tawe ragine al᷊annune pitu allo sulal᷊ummu wul᷊anna Abib, ana waugu sulal᷊ummu wul᷊anna udde i yamiu nanantangngu Mesir.

¹⁹Suapan ana'a esakka pahul᷊une wuṛṛu winatangnga esakka apan paarorone nariaddi uddewe pussaa-U,

²⁰arawe i yamiu ṛinone mamaekka ana'u keledai apan paarorone nariaddi ringannu mangonggolu sambau ana'u domba maola'a hahantine. Amungkangngu i yamiu maddiri mamaekka, ullekkan keledai udde ṛinone latto'anni yamiu. Suapan anangngu esakka pahul᷊une ṛinone waeṛṛanni yamiu. Tawe sangkatou apan botongnge rumanta ringang-Ku amungkangngu i tou tawe uaapiddu sasamba.

²¹Pia annumu allo ipammanara; imbaṛṛangnga mammanara su allo appitune, salaiwe udde sulal᷊ummu tempo mammasolla ara'e tempo mangitingnga.

²²Ramea'e Andeangngu Pangangitingnga su tempo i yamiu mannattake mangitingnga wuan gandumma paarorone. Ramea'e lai Andeangngu Rasannu Rongnga su panginsueannu tonna, su tempo i yamiu mani'o manga wuang kaaluaanna.

²³Paatallu santonna anambon taumata esakka ṛinone rumanta massubba si Ya'u, Ruatan Israel.

²⁴Napawe i Ya'u buatte nallimbuakka manga balahanna wuassu saruannu wuṛṛu Ta'u hewal᷊anna letangngu, tawe saran sangkatou apan waṛṛani mangaṛṛo wanuanu su tempo i yamiu inai mallaghun Andeangngu Roti Tawe Ragine, Andeangngu Pangangitingnga wuṛṛu Andeangngu Rasannu Rongnga.

²⁵Su tempo i yamiu mangonggolu sasamba niṛṛata, imbaṛṛangnga mangonggolu saranapa apan niola'a nappaattu ragi. Winatangnga apan niṛṛata maola'a sasamba su ramean Paskah ṛinone insueanna ṛabbi udde lai; tawe wotongnge pia lambene ma'oman sara tiṛṛabbine marua allo.

²⁶Suapan tonna i yamiu ṛinone mangapidda watukku Wal᷊en MAWU Ruatanu wua paarorone wuassu hessin letangngu. Ṛemessu ana'u domba ara'e ana'u ambinga tawe wotongnge lahannu ua'en susun inangnge.”

²⁷Unnu MAWU si Musa, “Woṛṛeta'e manga wisara udde, ana waugu pinangianannu wisara udde i Ya'u na'ola'a pa'aire si'o wuṛṛu ringannu walahannu Israel.”

²⁸Appatu pul᷊o su allone appatu pul᷊o su ṛabbine i Musa uatana'a isudde suadio'a ringannu MAWU, wuṛṛu su al᷊annune udde i tou tawe umanna wuṛṛu tawe ma'inumma. Manga wisara pa'aire udde, eteudde Mapul᷊o Titan Duata, niwoṛṛetti su watu.

²⁹Su tempo i Musa sinumossokka wuassu Wowon Sinai uaapiddu Mapul᷊o Tita udde, hatine lullansiangnga ana waugu i tou buatte naggahato MAWU, arawe i Musa sassane wagga manungku hatine lullansiangnga.

³⁰I Harun wuṛṛu anambon tumana'u soa naasilo manungku i Musa lullansiangnga hatine, i mangitou matta'utta mangundanin i Musa.

³¹Arawe i Musa namaggo si mangitou, ne i Harun wuṛṛu anambon piaṛṛa'i mangitou nangundanin tou, wuṛṛu i Musa nabbisarate si mangitou.

³²Napawe wua'udde tumana'u Israel sarangkanambone na'ammula namal᷊iwutta si tou, wuṛṛu si mangitou sarangkanambone i Musa namasingkatu anambon tita apan nionggolu MAWU si tou su puiddu Wowon Sinai.

³³Napawe buatte naggahatton mangitou, i Musa nanaappa hatine ringannu mal᷊aṛṛenessa.

³⁴Suapan i Musa sumutta sulal᷊ummu Rasannu MAWU ana waugu maggahahaton MAWU, mal᷊aṛṛenessa udde wu'anna ma'oman sara i tou sumabbangnga. Napawe i tou buatte namasingkatta su walahannu Israel anambon tanatan MAWU,

³⁵wuṛṛu i mangitou naasilo hatin i Musa lullansiangnga. Ne i tou nanaappa hatine apia na'oman sara tempone manansunna amungkangngu i tou maggahaton MAWU apia.